ភ្ជាប់​ទៅ​គេហទំព័រ​ទាក់ទង

លោក​ Jones សន្យា​សាមគ្គី​ភាព​បន្ទាប់​ពីឈ្នះ​ជា​សមាជិក​ព្រឹទ្ធ​សភា​នៅ​រដ្ឋ Alabama


សមាជិក​ព្រឹទ្ធសភា​គណបក្ស​ប្រជាធិបតេយ្យ​ឈ្នះ​ឆ្នោត​នៅ​រដ្ឋ Alabama កាលពី​ថ្ងៃទី១២ ធ្នូ ២០១៧។

បន្ទាប់ពីយុទ្ធនាការ​ឃោសនា​បោះឆ្នោត​មិន​ស្រុះ​ស្រួល​គ្នា​មួយ​មក​ លោក Doug Jones ខាង​គណបក្ស​ប្រជាធិបតេយ្យ​បាន​មានប្រសាសន៍​ថា​លោកសង្ឃឹមថាលោក Roy Moore ខាង​គណបក្សសាធារណរដ្ឋនឹង​ «ធ្វើត្រូវ» ដោយ​ទទួល​ស្គាល់​បរាជ័យ​របស់​លោក​នៅ​ក្នុង​ការ​បោះឆ្នោត​ពិសេស​សម្រាប់​អាសនៈ​មួយ​ក្នុង​ព្រឹទ្ធសភា​ស.រ.អា.នៅ​ក្នុងរដ្ឋ Alabama នាផ្នែក​ខាង​ត្បូង​នៃ​ប្រទេស​អាមេរិក។​

លោក​ Jones បាន​ឈ្នះនៅ​ក្នុង​ការ​បោះឆ្នោត​កាល​ពីថ្ងៃអង្គារ​ដោយ​លោក​បាន​ទទួល​សន្លឹក​ឆ្នោត​គាំទ្រ​ ៤៩,៩ភាគ​រយ​ទល់​នឹង​៤៨,៤ភាគ​រយ​ហើយ​កាល​ពី​ថ្ងៃពុធ​លោក​បានសន្យា​អំពី​ការ​ធ្វើឱ្យមាន​ឯកភាព​ដោយ​លោក​បានមាន​ប្រសាសន៍​ថា «នេះ​ជា​ពេល​វេលា​មួយ​សម្រាប់សម្រុះ​សម្រួលគ្នា» និងជា «ពេល​វេលា​មួយសម្រាប់ឈោង​ដៃ​រក​គ្នា»។

លោក Moore បាន​ចេញ​ផ្សាយ​វីដេអូ​មួយចែងថា​ការ​រាប់សន្លឹក​ឆ្នោត​នៃ​ក្រុម​យោធា​និង​សន្លឹក​ឆ្នោត​បណ្តោះ​អាសន្នមិន​ទាន់​ចប់សព្វគ្រប់នៅឡើយ​ទេ​ហើយ​ថា​ក្រុមអ្នក​ឃោសនា​បោះឆ្នោត​ឱ្យលោកកំពុង​រង់ចាំ​រដ្ឋមន្ត្រី​ការ​បរទេស​នៃ​រដ្ឋ​ Alabama បញ្ជាក់​ថា​លទ្ធផល​នៃការ​បោះឆ្នោត​នេះជាការ​ទុក​ចិត្តបាន។​គេ​រំពឹង​ថា​ដំណើរការនេះនឹង​ចប់ក្នុង​រយៈពេល​ប្រមាណពីរ​សប្តាហ៍​ទៀត។

លោក Terry Latham ប្រធានគណបក្ស​សាធារណរដ្ឋ​ប្រចាំ​រដ្ឋ Alabama បាន​និយាយនៅ​ក្នុងសេចក្តី​ថ្លែង​ការណ៍​មួយ​ថា​លោក​មិនគាំទ្រ​ការរាប់សន្លឹក​ឆ្នោត​ជា​ថ្មីទេ៕

XS
SM
MD
LG