លោក John Sidney McCain ត្រូវបានគេស្គាល់ថា ជាអ្នកទោសរួចជីវិត ពីសង្រ្គាមវៀតណាមខាងជើង ហើយជាបេក្ខជនប្រធានាធិបតីខាងគណបក្សសាធារណរដ្ឋកាលពីឆ្នាំ២០០៨។
នៅមជ្ឈមណ្ឌល National Constitution កាលពីខែតុលា ជាច្រើនខែ បន្ទាប់ពីលោកបានទទួលការធ្វើរោគវិនិច្ឆ័យថា មានកើតជំងឺមហារីក លោក McCain បានថ្លែងថា៖ «យើងត្រូវបានប្រទានពរ។ យើងកំពុងរស់នៅលើទឹកដីសេរីភាព ទឹកដីដែលអ្វីៗក៏ដោយអាចកើតឡើង។ យើងក៏ជាពរសម្រាប់មនុស្សជាតិវិញដែរ»។
ក្នុងការថ្លែងដដែលនេះដែរ លោកMcCain ក៏បានព្រមានពីគ្រោះដែលនឹងកើតមានក្នុងយុគសម័យរបស់លោកប្រធានាធិបតី Donald Trump។ សមាជិកព្រឹទ្ធសភារូបនេះបានមានប្រសាសន៍ថា៖
«ការបដិសេធកាតព្វកិច្ចនៃភាពជាអ្នកដឹកនាំនៅលើឆាកអន្តរជាតិ និងកាតព្វកិច្ចរបស់យើង ដើម្បីរក្សាការដើរតួជាក្តីសង្ឃឹមដ៏ប្រសើរបំផុតចុងក្រោយបង្អស់មួយជាថ្នូរនឹងភាពជាតិនិយមបំផុសឡើងដោយក្រុមមនុស្ស ដែលស្វែងរកអ្នកសម្រាប់ទម្លាក់កំហុសដាក់ ជាជាងការដោះស្រាយបញ្ហា គឺស្មើនឹងកង្វះខាតភាពជាតិនិយម ដែលសហរដ្ឋអាមេរិកធ្លាប់បានផ្សារភ្ជាប់នៅអតីតកាល»។
លោក Allan Lichtman ប្រវត្តិវិទូផ្នែកនយោបាយនៃសាកលវិទ្យាល័យ American University បាននិយាយថា៖ «លោក John McCain តំណាងឲ្យការបម្រើជូនសាធារណជន។ លោកជាវីរបុរសអាមេរិកាំងពិតប្រាកដម្នាក់ ហើយមិនមែនគ្រាន់តែជាវីរបុរសក្លែងក្លាយតាមប្រព័ន្ធផ្សព្វផ្សាយនោះទេ»។
ជាកូនប្រុសរបស់ឧត្តមនាវីសហរដ្ឋអាមេរិកម្នាក់ លោក McCain បានក្លាយជាអាកាសយានិកជើងទឹកហើយបានធ្វើបេសកកម្មទម្លាក់គ្រាប់បែកជាច្រើនអំឡុងសង្រ្គាមវៀតណាម។ បន្ទាប់យន្តហោះរបស់លោកត្រូវបានបាញ់ទម្លាក់ ហើយលោកត្រូវបានទាហានវៀតណាមខាងជើងចាប់ខ្លួនក្នុងឆ្នាំ១៩៦៧ លោកស៊ូទ្រាំនឹងការធ្វើទារុណកម្មអស់រយៈពេលជាង៥ឆ្នាំ ក្នុងនាមជាអ្នកទោសសង្រ្គាម។
អស់រយៈពេលជាច្រើនទសវត្សរ៍ក្រោយមក លោក McCain បានត្រឡប់ទៅវៀតណាមក្នុងនាមជាសមាជិកព្រឹទ្ធសភាគណបក្សសាធារណរដ្ឋនិង បានផ្សះផ្សាទំនាក់ទំនងរវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងហាណូយ ដោយលោកបានប្រាប់ VOA ថា អតីតកាលត្រូវបានបំភ្លេចចោលហើយ។
«មានបុគ្គលមួយចំនួនដែលបានប្រព្រឹត្តអាក្រក់មកលើខ្ញុំនៅក្នុងគុក ហើយខ្ញុំសង្ឃឹមថា ខ្ញុំនឹងមិនឃើញទង្វើអាក្រក់ទាំងនោះទៀតទេ។ ប៉ុន្តែវាមិនអាចផ្លាស់ប្តូរគំនិតខ្ញុំបានទេ ដែលថា ប្រជាជនវៀតណាមគឺជាមនុស្សអស្ចារ្យ និងជាមិត្តដ៏ល្អ។ ពួកយើងត្រូវការពួកគេ ហើយពួកគេត្រូវការពួកយើង»។
បន្ទាប់ពីការវាយប្រហារភេរវកម្មកាលពីថ្ងៃទី១១ ខែ កញ្ញា ឆ្នាំ២០០១ លោក McCain បានរិះគន់យុទ្ធសាស្រ្តប្រើទារុណកម្មទៅលើជនសង្ស័យភេរវកម្ម ស្របពេលគាំទ្រសង្រ្គាមនៅប្រទេសអាហ្វហ្គានីស្ថាននិងអ៊ីរ៉ាក់។
លោក Lichtman ប្រវត្តិវិទូផ្នែកនយោបាយបាននិយាយថា៖
«ចំណុចខ្សោយរបស់លោក John McCain ក្នុងរយៈពេលប៉ុន្មានឆ្នាំមកនេះគឺលោកប្រហែលជាមានឆន្ទៈខ្លាំងពេកក្នុងការប្រើប្រាស់យោធាដើម្បីដោះស្រាយបញ្ហា។ អ្នករិះគន់លោកមួយចំនួនថែមទាំងបានហៅគាត់ថា ជាមនុស្សចូលចិត្តសង្រ្គាម។ ប៉ុន្តែ [ការយកយោធាទៅធ្វើអន្តរាគមន៍] ជាអ្វីដែលលោក McCain មានការជឿជាក់យ៉ាងខ្លាំង មិនមែនត្រឹមតែសម្រាប់ហេតុផលនយោបាយប៉ុណ្ណោះទេ»។
នៅវិមានរដ្ឋសភា Capitol Hill លោក McCain ត្រូវបានគេស្គាល់ថាជា មនុស្សឆាប់ខឹងនិងមានសម្តីមុតស្រួច។
«ចេញពីទីនេះទៅ ពួកអាថោកទាប» លោក McCain បានស្តីឲ្យបាតុករប្រឆាំងនឹងសង្រ្គាម ដែលកំពុងរំខានដល់សវនាការរបស់គណកម្មាធិការព្រឹទ្ធសភា។
សមាជិកព្រឹទ្ធសភារូបនេះក៏បានបង្ហាញពីទឹកចិត្តតស៊ូក្នុងឆាកនយោបាយផងដែរ។ លោក McCain បានឈរឈ្មោះជា បេក្ខជនប្រធានាធិបតីគណបក្សសាធារណរដ្ឋចំនួនពីរដង។ នៅអំឡុងយុទ្ធនាការឃោសនាបោះឆ្នោត លោកក៏ធ្លាប់បានការពារគូប្រជែងពីគណបក្សប្រជាធិបតេយ្យគឺលោក Barack Obama ផងដែរ។
«គាត់គឺជាជនជាតិអារ៉ាប់» ស្រ្តីម្នាក់បានស្រែកពីលោក Obama នៅក្នុងយុទ្ធនាការរបស់លោក McCain មួយខែមុននឹងការបោះឆ្នោតចាប់ផ្តើម។
លោក McCain បានយកមេក្រូពីនាងហើយនិយាយថា៖ «មិនមែនទេអ្នកស្រី។ គាត់គឺជាបុរសម្នាក់ដែលស្រឡាញ់គ្រួសារ គ្រាន់តែជាពលរដ្ឋម្នាក់ ដែលខ្ញុំត្រូវប្រកែកគ្នាជាមួយប៉ុណ្ណោះ»។
លោក McCain បានចាញ់ការបោះឆ្នោត ប៉ុន្តែលោកបានត្រឡប់មកព្រឹទ្ធសភា និងបានបន្តធ្វើការគាំទ្រការចូលរួមដ៏សកម្មរបស់សហរដ្ឋអាមេរិកនៅលើពិភពលោក ក្នុងឋានៈជាប្រធានគណៈកម្មាធិការសេវាកម្មយោធាព្រឹទ្ធសភា។
លោក McCain មិនបានឆ្លើយតបនឹងលោក ត្រាំ ដែលនៅពេលនោះ បានចោទសួរ អំពីឋានៈជាវីរបុរសសង្រ្គាមរបស់លោក។
លោក ត្រាំ បាននិយាយតាមទូរទស្សន៍ជាតិកាលពីខែ កក្កដា ឆ្នាំ ២០១៥ ថា «គាត់ [McCain] ជាវីរបុរសសង្រ្គាមដោយសារគាត់ត្រូវបានគេចាប់ខ្លួន។ ខ្ញុំចូលចិត្តមនុស្ស ដែលមិនត្រូវបានគេចាប់ខ្លួន។ យល់ទេ? ខ្ញុំមិនចង់ប្រាប់អ្នកនោះទេ»។
យ៉ាងណាក្តី លោក McCain បានក្លាយជា អ្នករិះគន់ឥតសំចៃទៅលើគោលនយោបាយ និងអភិបាលកិច្ចរបស់លោកត្រាំ និងបានបោះឆ្នោតទម្លាក់ចោលគម្រោងផ្នែកសុខាភិបាលរៀបរៀងឡើងដោយលោកត្រាំ។ កាលពីខែ ធ្នូ លោក គឺជាសមាជិកព្រឹទ្ធសភាម្នាក់ ដែលមិនធ្វើការបោះឆ្នោតក្នុងការអនុម័តចុងក្រោយនៃកំណែទម្រង់ពន្ធដារ ដោយបានវិលត្រឡប់ទៅរដ្ឋ Arizona វិញ ដើម្បីសម្រាកព្យាបាលជំងឺមហារីក។
លោក McCain ទទួលបានគោរពទាំងពីសមាជិកគណបក្សប្រជាធិបតេយ្យនិងគណបក្សសាធារណរដ្ឋ។
លោក Joe Biden អតីតអនុប្រធានាធិបតីបាននិយាយនៅក្នុងការថ្លែងបើកវេទិកានៅមជ្ឈមណ្ឌល National Constitution Center ថា «កម្លាំងចិត្តនិងភាពស្មោះត្រង់។ ខ្ញុំគិតមិនឃើញពាក្យអ្វីដែលល្អជាងនេះ ដើម្បីពណ៌នាពីបុរសម្នាក់ ដែលយើងកំពុងរំឭកនៅក្នុងយប់នេះទេ គឺមិត្តសម្លាញ់របស់ខ្ញុំ លោក John McCain»។
លោក Lichtman ប្រវតិ្តវិទូផ្នែកនយោបាយ បាននិយាយថា៖ «ប្រហែលជាក្នុងចំណោមអ្នកនយោបាយក្នុងពេលថ្មីៗនេះ លោក John McCain ហ៊ានធ្វើរឿងដែលល្អសម្រាប់ប្រទេស ដូចជាកំណែទម្រង់ផ្នែកអន្តោប្រវេសន៍ និងកំណែទម្រង់ហិរញ្ញវត្ថុផ្នែកយុទ្ធនាការឃោសនាបោះឆ្នោត»។
មនុស្សជាច្រើននឹងធ្វើការកាន់ទុក្ខ ហើយលោក McCain នៅតែជាក្តីសង្ឃឹមមួយរហូតដល់ទីបញ្ចប់។
លោក McCain បាននិយាយថា៖ «ខ្ញុំជាបុរសដែលសំណាងជាងគេបំផុតលើលោកនេះ។ ខ្ញុំបានបម្រើសហរដ្ឋអាមេរិក»៕
ប្រែសម្រួលដោយ ទុំ ម្លិះ
