នៅថ្ងៃអង្គារនេះ រដ្ឋាភិបាលជប៉ុនបានព្រមានប្រឆាំងនឹងការគំរាមកំហែងដ៏ខ្លាំងក្លារបស់កម្មវិធីអាវុធនុយក្លេអ៊ែររបស់ប្រទេសកូរ៉េខាងជើង ដោយសារតែរដ្ឋាភិបាលក្រុងព្យុងយ៉ាងនៅតែបន្តធ្វើការសាកល្បងបាញ់គ្រាប់មីស៊ីល និងនុយក្លេអ៊ែរជាបន្តបន្ទាប់ ដោយមិនខ្វល់ពីការដាក់ទណ្ឌកម្មរបស់អង្គការសហប្រជាជាតិ។
រដ្ឋាភិបាលជប៉ុនបានផ្សព្វផ្សាយនូវគម្រោងយុទ្ធសាស្ត្រការពារជាតិរបស់ខ្លួន បន្ទាប់ពីប្រទេសកូរ៉េខាងជើងបាញ់គ្រាប់ផ្លោងមីស៊ីលឆ្លងទ្វីបចំនួនពីរគ្រាប់កាលពីខែមុនធ្លាក់ចូលក្នុងសមុទ្រភាគខាងលិចប្រទេសជប៉ុន។
ក្រសួងការពារជាតិជប៉ុនបានបញ្ជាក់ថា៖ «វាអាចទៅរួចដែលថា កម្មវិធីអាវុធនុយក្លេអ៊ែររបស់កូរ៉េខាងជើង បានឈានដល់កម្រិតខ្ពស់ ហើយកូរ៉េខាងជើងទទួលបានជោគជ័យនៅក្នុងការធ្វើអាវុធនុយក្លេអ៊ែរឲ្យមានរាងតូច និងផលិតបាននូវក្បាលគ្រាប់នុយក្លេអ៊ែររួចហើយ»។
ក្រសួងការពារជាតិជប៉ុនបានបញ្ជាក់បន្ថែមនៅក្នុងឯកសារគម្រោងយុទ្ធសាស្ត្រការពារជាតិដែលមានកម្រាស់ ៥៦៣ ទំព័រថា៖ «ចាប់តាំងពីឆ្នាំមុនមក នៅពេលដែលកូរ៉េខាងជើងធ្វើការសាកល្បងអាវុធនុយក្លេអ៊ែរចំនួនពីរលើក និងសាកល្បងគ្រាប់ផ្លោងមីស៊ីលចំនួនជាង ២០ លើក ការគំរាមកំហែងផ្នែកសន្តិសុខបានឈានដល់ដំណាក់កាលថ្មីមួយទៀត»។
កាលពីខែមីនាកន្លងទៅនេះ ដោយសារតែកូរ៉េខាងជើងជំរុញទៅមុខនូវការសាកល្បងគ្រាប់មីស៊ីលទាំងនេះ ក្រុមតំណាងរាស្ត្រគណបក្សកាន់អំណាចជប៉ុន ដែលដឹកនាំដោយលោក Itsunori Onodera ដែលទើបនឹងក្លាយជារដ្ឋមន្ត្រីក្រសួងការពារជាតិកាលពីថ្ងៃព្រហស្បតិ៍សប្ដាហ៍មុន បានជំរុញឲ្យលោកនាយករដ្ឋមន្ត្រី Shinzo Abe ពិចារណាធ្វើយ៉ាងណាសម្រេចឲ្យបាននូវសមត្ថភាពដែលអាចវាយប្រហារមូលដ្ឋានរបស់សត្រូវបាន៕
