អង្គការសហប្រជាជាតិចោទប្រកាន់ថារដ្ឋាភិបាលកំពុងកាន់អំណាចនៃប្រទេស កូតឌីវ័រ កំពុងរំលោភការដាក់ទណ្ឌកម្មលក់អាវុធអន្តរជាតិ ហើយការចោទប្រកាន់នេះកំពុងបង្កើនការតានតឹងរវាងពួកអ្នកគាំទ្ររដ្ឋាភិបាលនិងកងថែរក្សាសន្តិភាពអង្គការសហប្រជាជាតិក្នុងប្រទេសកូតឌីវ័រ។ ពួកមន្រ្តីអង្គការសហប្រជាជាតិជឿជាក់ថា រដ្ឋាភិបាលបច្ចុប្បន្នកំពុងបំពាក់អាវុធដល់ជនស៊ីវិល។
ប្រធានាធិបតីកំពុងកាន់អំណាច ឡូរ៉ង់ បាក់បូ (Laurent Gbagbo) បានព្យាយាមបណ្តេញបេសកម្មអង្គការសហប្រជាជាតិទាំងមូលភ្លាមៗបន្ទាប់ពីអង្គការនេះ បានបញ្ជាក់ជាផ្លូវការថាគូប្រកួតប្រជែងរបស់លោក គឺលោក អាឡាសាន វ៉ាត់តារ៉ា (Alassane Ouattara) ជាអ្នកឈ្នះក្នុងការបោះឆ្នោតប្រធានាធិបតីនៅខែវិច្ឆិកា។
ក៏ប៉ុន្តែអង្គការសហប្រជាជាតិបានបដិសេធមិនបញ្ឈប់បេសកម្មនោះ ពីព្រោះអង្គការសហប្រជាជាតិលែងទទួលស្គាល់រដ្ឋអំណាចរបស់លោក បាក់បូ តទៅទៀតហើយ។ កងថែរក្សាសន្តិភាពបានត្រូវពង្រីក ម៉្យាងដើម្បីធ្វើឲ្យប្រសើរឡើងដល់ការការពារសណ្ឋាគារលំហែកាយ ដែលជាទីកន្លែងកងទ័ពរបស់ បាក់បូ កំពុងឡោមព័ទ្ធលោក វ៉ាត់តារ៉ា។
ខណៈពេលដែលកងទ័ពរដ្ឋាភិបាលកំពុងប្រយុទ្ធនឹងពួកកងទ័ពឧទ្ទាមរបស់លោក វ៉ាត់តារ៉ា នៅជិតព្រំដែនជាមួយប្រទេសលីបេរីយ៉ា (Liberia) ហើយនិងការបន្តមានការប៉ះទង្គិចថ្មីក្នុងរដ្ឋធានី អាប៊ីហ្សង់ ចូលដល់សប្តាហ៍ទី២ រដ្ឋាភិបាលលោកបាក់បូកំពុងបង្កើនយុទ្ធនាការរបស់ខ្លួនដើម្បីបង្ហាញឲ្យគេឃើញថា អង្គការសហប្រជាជាតិជាសត្រូវរបស់ប្រជាពលរដ្ឋកូតឌីវ័រ។
នៅពេលដែលលោក បានគឺមូន (Ban Ki-moon) អគ្គលេខាធិការអង្គការសហប្រជាជាតិបានចោទប្រកាន់លោក បាក់បូ ពីការរំលោភការហាមប្រាមការលក់អាវុធអន្តរជាតិដោយបានទទួលឧទ្ធម្ភាគចក្រវាយប្រហារពីប្រទេសបេលារុស (Belarus) លោក Ahoua Don Mellon អ្នកនាំពាក្យលោក បាក់បូ និយាយថា ការចោទប្រកាន់នេះជាការភូតកុហក ក្នុងគោលបំណងធ្វើឲ្យគេឃើញថា ការវាយប្រហាររបស់អង្គការសហប្រជាជាតិប្រឆាំងអ្នកគាំទ្រលោកបាក់បូ ជាការត្រឹមត្រូវ។
លោក Charles Ble Goude មេដឹកនាំយុវជនរបស់លោក បាក់បូ និយាយថាកងថែរក្សាសន្តិភាពរបស់អង្គការសហប្រជាជាតិ កំពុងធ្វើសង្គ្រាមជំនួសឲ្យពួកឧទ្ទាម។
«លោក Goude និយាយថា វាជាបញ្ហាដូចគ្នាដែលបានកើតមានឡើងជាមួយកងទ័ពអង្គការសហប្រជាជាតិនៅក្នុងប្រទេសលីបេរីយ៉ា (Liberia) និងក្នុង ប្រទេសកុងហ្គោ ហើយនឹងក្នុងប្រទេសរ្វ៉ាន់ដា (Rwanda)។ លោកនិយាយថា ប្រជាពលរដ្ឋត្រូវគេសម្លាប់ក្នុងពេលមានវត្តមានរបស់កងទ័ពអង្គការសហប្រជាជាតិ។ លោក Goude និយាយទៀតថា ពួកអ្នកគាំទ្រលោក បាក់បូ នឹងមិនអនុញ្ញាតិឲ្យរឿងនេះកើតឡើងក្នុងប្រទេសកូតឌីវ័រទេ»។
លោក Goude កំពុងអំពាវនាវដល់ពួកអ្នកគាំទ្រលោក បាក់បូ បង្អាក់ការធ្វើដំណើររបស់បុគ្គលិកអង្គការសហប្រជាជាតិ។ កងថែរក្សាសន្តិភាព៣នាក់បានត្រូវរបួសនៅពេលត្រូវគេបាញ់ក្នុងពេលយាមល្បាត។ លោក Kenneth Blackman អ្នកនាំពាក្យរងរបស់បេសកម្មអង្គការសហប្រជាជាតិនៅក្នុងប្រទេសនោះនិយាយថា ស្ថានភាពសន្តិសុខកាន់តែយ៉ាប់យ៉ឺនយ៉ាងឆាប់រហ័ស។
«យើងមានសេចក្តីរាយការណ៍ដែលអាចជឿទុកចិត្តបានថាក្រុមលោក បាក់បូ បានបំពាក់អាវុធដល់ជនស៊ីវិល។ ហើយនេះជាស្ថានការណ៍ដ៏គួរឲ្យបារម្ភបំផុត។ ក្នុងករណីបែបនេះ ពួកជនស៊ីវិលប្រដាប់អាវុធត្រូវគេចាត់ទុកជាយុទ្ធជន។ ដូច្នេះ ខ្ញុំគិតថាវាជាព្រឹត្តិការណ៍ដ៏គួរឲ្យបារម្ភបំផុតហើយជាការពិត វាធ្វើឲ្យការងាររបស់យើងកាន់តែពិបាក»។
អង្គការសហប្រជាជាតិកំពុងថ្កោលទោសអ្វីដែលខ្លួនហៅថាវិធីឃោសនាថ្មីរបស់ពួកអ្នកគាំទ្រលោក បាក់បូ។ អង្គការសហប្រជាជាតិបានបដិសេធថាខ្លួនមិនបានគាំទ្រភាគីណាមួយក្នុងជម្លោះនេះទេ ហើយថាអ្វីដែលខ្លួនហៅថាជាការកុហកដ៏អាក្រក់របស់ក្រុមលោក បាក់បូ មានគោលបំណងដើម្បីបង្កើតឲ្យមានការស្អប់ខ្ពើមក្នុងចំណោមពួកគាំទ្រ បាក់បូ ដើម្បីរារាំងអង្គការ សហប្រជាជាតិមិនឲ្យការពារជនស៊ីវិលបាន។
លោក Ban Ki-moon និយាយថា កងកម្លាំងថែរក្សាសន្តិភាពរបស់អង្គការសហប្រជាជាតិប្តេជ្ញាសម្រេចគោលដៅនេះឲ្យបាន។
«នៅក្រោមច្បាប់វាយប្រយុទ្ធដែលគ្រប់គ្រងការដាក់ពង្រាយកងថែរក្សាសន្តិភាពនៅប្រទេសនេះ បុគ្គលិកអង្គការសហប្រជាជាតិត្រូវបានអនុញ្ញាតិឲ្យប្រើប្រាស់កម្លាំងដើម្បីការពារខ្លួនឯង ការពារបុគ្គលិកអង្គការសហប្រជាជាតិ ការពារសម្ភារៈអង្គការសហប្រជាជាតិ និងការពារការធ្វើចលនាដោយសេរី។ ហើយជាការណ៍ពិត ពួកគេនឹងអនុវត្តច្បាប់ទាំងអស់នេះ»។
អគ្គលេខាធិការអង្គការសហប្រជាជាតិ កំពុងសុំឲ្យកងថែរក្សាសន្តិភាពអង្គការសហប្រជាជាតិចាត់វិធានការចាំបាច់ទាំងអស់ ដើម្បីធ្វើឲ្យប្រាកដថា គេមិនអាចប្រើប្រាស់ឧទ្ធម្ភាគចក្រវាយប្រហាររបស់ប្រទេស បេឡារុស និងអាវុធផ្សេងៗទៀតបាន។
បុគ្គលិកអង្គការសហប្រជាជាតិដែលទៅអាកាសយានដ្ឋានក្នុងទីក្រុងYamoussoukro ដើម្បីធ្វើការស៊ើបអង្កេតបានត្រូវកងកម្លាំងសន្តិសុខ បាក់បូ មិនឲ្យចូល៕
ប្រែសម្រួលដោយ ជឹង ប៉ូជីន
