ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចំនួន​អ្នក​ស្លាប់​ពី​វីរុស​កូរ៉ូណា​នៅ​អ៊ីតាលី​​កើត​ឡើង​​ខ្ពស់​ខណៈ​​អាជ្ញាធរ​ចាប់​ផ្តើម​​បិទ​តំបន់​ភាគ​ខាង​ជើង​ចូល​ជា​ធរមាន


បុគ្គលិក​ម្នាក់​កែសម្រួល​ទីតាំង​ស្លាកសញ្ញា​នៅ​ស្តាត San Paolo នៅ​ក្នុង​ក្រុង Naples ប្រទេស​អ៊ីតាលី កាលពី​ថ្ងៃទី៤ ខែមីនា ឆ្នាំ២០២០។

​ប្រទេស​ចិន​កាល​ពី​ថ្ងៃ​ចន្ទ​បាន​រាយការណ៍​អំពី​ចំនួន​អ្នក​ឆ្លង​ថ្មី​តិច​បំផុត​ ខណៈ​ដែល​មួយ​ភាគ​បួន​នៃ​ពលរដ្ឋ​អ៊ីតាលី​ត្រូវ​បាន​អាជ្ញាធរដាក់​ឲ្យ​ស្ថិត​នៅ​ក្នុង​ស្ថានភាព​ដាច់​ដោយ​ឡែក ហើយ​នៅ​សហរដ្ឋ​អាមេរិក​វិញ នាវា​កម្សាន្ត​មួយ​ត្រៀម​ខ្លួនឡើង​គោក​ខណៈ​ដែល​អ្នក​ដំណើរ​លើ​នាវា​មួយ​ចំនួន​ត្រូវ​បាន​គេ​រក​ឃើញ​ថា​បាន​ឆ្លង​មេរោគ​កូរ៉ូណា​ប្រភេទ​ថ្មី Covid-19។

មន្ត្រី​ចិន​និយាយ​ថា ក្នុង​ថ្ងៃ​ចន្ទ​នេះ​មាន​ការ​ឆ្លង​ថ្មី​ចំនួន​៤០​ករណី​ដែល​ជា​ ការ​ឆ្លង​ប្រចាំ​ថ្ងៃ​តិច​បំផុត​ចាប់​តាំង​ពី​ខែ​មករា​មក គឺ​នៅ​មុន​ដែល​អាជ្ញាធរ​ចិន​ចាប់​ផ្តើម​ចេញ​បម្រាម​បិទ​សកម្មភាព​និង​ការ​ធ្វើ​ដំណើរនៅ​ទីក្រុង​និង​តំបន់​ទី​ប្រជុំជន​មួយ​ចំនួន​ក្នុង​ប្រទេស។

​ប្រទេស​អ៊ីតាលីកាល​ពី​ថ្ងៃ​អាទិត្យ បាន​ចាប់​ផ្តើមធ្វើ​ការ​បិទ​សកម្មភាព​និង​ការ​ធ្វើ​ដំណើរ​ដែល​ពាក្យ​បច្ចេកទេស​ថា ចត្តាឡីស័ក នៅ​តំបន់​ភាគខាង​ជើង​ប្រទេស​ រួម​ទាំង​តំបន់ទី​ក្រុង​ Milan និង​ ក្រុង Venice ខណៈ​ដែល​ចំនួន​អ្នក​ស្លាប់​ក្នុង​ថ្ងៃ​អាទិត្យ​មាន​ចំនួន​ដល់​១៣៣​នាក់ ដែល​ធ្វើ​ឲ្យ​អ្នក​ស្លាប់​នៅ​អ៊ីតាលី​សរុប​កើន​ដល់​៣៦៦។

ការ​ធ្វើ​ដំណើរ​ចេញ​ចូល​ តំបន់​ភាគ​ខាង​ជើង​ប្រទេស​អ៊ីតាលី​នេះ​ត្រូវ​បាន​រឹតត្បិត​យ៉ាង ខ្លាំង​រហូត​ដល់​ដើម​ខែ​មេសា ខណៈ​ដែល​អ៊ីតាលីព្យាយាម​ទប់ស្កាត់​នឹង​ការ​ស្លាប់យ៉ាង​ច្រើន​ជា​បន្ត​បន្ទាប់​ពី​មេរោគ​ថ្មី​នេះ ដោយអាជ្ញាធរ​បញ្ជា​ឲ្យ​បិទ​សារមន្ទីរ រោង​ភាពយន្ត និង​កន្លែង​កម្សាន្ត​នានា​ទូទំាង​ប្រទេស។

អ៊ីតាលី​ក៏​បាន​ស្នើ​ឲ្យ​គ្រូពេទ្យ​ដែល​ចូល​និវត្តន៍​រួម​ត្រឡប់​មក​ធ្វើការ​ជួយ​ព្យាបាល​អ្នក​ជំងឺ​ Covid-19។

នៅ​សហរដ្ឋ​អាមេរិក ​មក​ទល់​នឹង​ពេល​នេះ​មាន​អ្នក​ស្លាប់​ពីជំងឺ​ Covid-19ចំនួន​២១​នាក់​ និង​ការ​ឆ្លង​សរុប​ចំនួន​ជាង​៥០០​ករណី​ហើយ។

នៅ​រដ្ឋ​កាលីហ្វ័រញ៉ា​ភាគ​ខាង​លិច​ប្រទេស នាវា​កម្សាន្ត​ Grand Princess កំពុង​សំចត​នៅ​ក្បែរ​ឆ្នេរ​ខណៈ​មន្ត្រី​ថ្នាក់​រដ្ឋ​និង​សហព័ន្ធ​កំពុង​រៀបចំ​គម្រោង​ដើម្បី​ឲ្យ​អ្នក​ដំណើរ​អាច​ឡើង​គោក​បាន ដោយ​មាន​អ្នក​ដំណើរ​ខ្លះ​បាន​ឆ្លង​មេរោគ​កូរ៉ូណា។

នៅ​ទូទាំង​ពិភពលោក អង្គការ​សុខភាព​ពិភពលោក​រាយការណ៍​នៅ​ថ្ងៃ​ចន្ទ​នេះ​ថា មេរោគ​ Covid-19 បាន​ឆ្លង​ទៅ​ដល់​ជាង១០០​ប្រទេស​ ដោយ​មាន​អ្នក​ឆ្លង​កើន​ឡើង​ដល់​ដល់​ជាង​១០៦.០០០​នាក់ ដោយ​ចំនួន​អ្នក​ស្លាប់​កើន​ឡើង​ដល់​ជាង​៣.៥០០​នាក់៕

XS
SM
MD
LG