រដ្ឋាភិបាលអ៊ីតាលីបានចេញបទបញ្ជាបន្ទាន់ថ្មីមួយនៅថ្ងៃអាទិត្យនេះដើម្បីដាក់កំហិតការធ្វើដំណើររបស់ប្រជាពលរដ្ឋអ៊ីតាលីប្រហែល ២៥ ភាគរយ។
ប្រទេសអ៊ីតាលីមានករណីស្លាប់ដោយសារជំងឺ COVID-19 ច្រើនជាងប្រទេសណាៗទាំងអស់ក្រៅពីប្រទេសចិន។
បន្ទាប់ពីមានករណីស្លាប់ដោយសារជំងឺនេះជាង ២៣០ ករណីមក រដ្ឋាភិបាលអ៊ីតាលីបានសម្រេចបិទតំបន់ភាគខាងជើងនៃប្រទេស ដែលក្នុងនោះមានទាំងតំបន់ Lombardy និងទីក្រុង Milan ដែលជាទីក្រុងហិរញ្ញវត្ថុផងដែរ។ ជាងនេះទៀត រដ្ឋាភិបាលនឹងបិទខេត្តចំនួន ១៤ ផ្សេងទៀត ដែលរួមមានទាំងខេត្ត Veneto ដែលជាទីតាំងនៃទីក្រុង Venice ផងដែរ។
ការធ្វើដំណើរចូលនិងចេញពីតំបន់ទាំងនេះនឹងរងការដាក់កំហិតតឹងតែងរហូតដល់ដើមខែក្រោយ ស្របពេលដែលរដ្ឋាភិបាលអ៊ីតាលីកំពុងប្រឹងប្រែងធ្វើយ៉ាងណាឲ្យចំនួនអ្នកស្លាប់ដោយសារមេរោគកូរ៉ូណាថ្មីនេះធ្លាក់ចុះ។ បន្ថែមពីនេះទៀត រដ្ឋាភិបាលអ៊ីតាលីបានបញ្ជាឲ្យបិទសារមន្ទីរ រោងមហោស្រព រោងភាពយន្ត និងកន្លែងកម្សាន្តផ្សេងៗទៀត។
ជាងនេះទៀត អ៊ីតាលីបានស្នើឲ្យគ្រូពេទ្យចូលនិវត្តន៍នានាត្រឡប់មកជួយដើម្បីរារាំងការឆ្លងរាលដាលបន្ថែមទៀតនៃមេរោគនេះ។
គិតត្រឹមថ្ងៃអាទិត្យនេះ នៅទូទាំងពិភពលោក មនុស្សជាង ១០ ម៉ឺន ៦ ពាន់នាក់បានឆ្លងមេរោគនេះ និងជាង ៣.៥០០ នាក់បានស្លាប់ដោយសារមេរោគនេះ៕
ប្រែសម្រួលដោយលោក ភី សុភាដា
