ប្រធានាធិបតីអ៊ីតាលី លោក Sergio Mattarella ជ្រើសរើសលោក Paolo Gentiloni ជានាយករដ្ឋមន្ត្រីដើម្បីបង្កើតរដ្ឋាភិបាលថ្មី បន្ទាប់ពីមេដឹកនាំកំណែទម្រង់ លោក Matteo Renzi បានចាញ់នៅក្នុងការបោះឆ្នោតប្រជាមតិទៅលើការធ្វើកំណែទម្រង់រដ្ឋធម្មនុញ្ញ ដែលលោកបានប្រកាសដាក់តំណែងរបស់លោក។
គេរំពឹងថា លោក Gentiloni នឹងកាន់តំណែងរហូតដល់ការបោះឆ្នោតនៅខែកុម្ភៈឆ្នាំ២០១៨ខាងមុខនេះ។ បន្ទាប់ពីសេចក្តីប្រកាសនោះ លោកក៏បានប្តេជ្ញាថានឹងបោះជំហានទៅរកក្របខណ្ឌដូចនឹងរដ្ឋាភិបាលដែលជិតផុតអាណត្តិរបស់លោក Renzi ដែរ។
សេចក្តីរាយការណ៍នានាបានចេញផ្សាយថា មេដឹកនាំរដ្ឋាភិបាលថ្មីត្រូវបានគេរំពឹងថានឹងបង្ហាញបញ្ជីឈ្មោះរដ្ឋមន្ត្រីដល់លោកប្រធានាធិបតី Mattarella នៅព្រឹកថ្ងៃចន្ទនេះ។
ក្នុងវ័យ៦២ឆ្នាំ លោក Gentiloni ដែលជាសមាជិករបស់គណបក្សប្រជាធិបតេយ្យ ជាមិត្តភក្តិជិតស្និទ្ធរបស់លោក Renzi និងក៏ជាអតីតអ្នកកាសែតម្នាក់ផងនោះបាននិយាយនៅក្នុងសេចក្តីថ្លែងការណ៍មួយថា «យើងត្រូវការរដ្ឋាភិបាលដែលដំណើរការពេញលេញមួយជាបន្ទាន់» ដើម្បីផ្តោតទៅលើបញ្ហាសង្គមនិងសេដ្ឋកិច្ច។
គណបក្សនយោបាយធំៗទាំងអស់នៅក្នុងប្រទេសបានស្នើឲ្យមានការបោះឆ្នោតឲ្យបានឆាប់តាមតែអាចធ្វើបាន ប៉ុន្តែសំណើនេះត្រូវបានប្រធានាធិបតីអ៊ីតាលីច្រានចោល។
លោក Renzi បានធ្វើជានាយករដ្ឋមន្ត្រីអស់រយៈពេលជិត៣ឆ្នាំ។ លោកបានលាលែងពីតំណែងក្រោយពីម្ចាស់ឆ្នោតបានបោះឆ្នោតបដិសេធផែនការរបស់លោកក្នុងការបង្កើនអំណាចរបស់លោកដើម្បីជំរុញការធ្វើកំណែទម្រង់សេដ្ឋកិច្ច ដែលលោកនិយាយថា នឹងធ្វើឲ្យនយោបាយនៅក្នុងប្រទេសអ៊ីតាលីមានស្ថិរភាព៕