តំបន់ភាគកណ្តាលនៃប្រទេសអ៊ីតាលី បានរង្គើដោយសារការរញ្ជួយដីដ៏ខ្លាំងមួយទៀតនៅពេលថ្មីៗបំផុតនេះចាប់តាំងពីការរញ្ជួយដីដ៏ប្រល័យនៅខែសីហាមក។
ពួកអាជ្ញាធរការពារជនស៊ីវិលនៃប្រទេសអ៊ីតាលី បានប្រាប់ឲ្យដឹងថា ការរញ្ជួយផែនដីដែលមានកម្លាំង6.6 នៅព្រឹកថ្ងៃអាទិត្យនេះបានធ្វើឲ្យដួលរលំអាគារនៅក្នុងទីកន្លែងជាច្រើននៅទូទាំងតំបន់នោះ។មានសេចក្តីរាយការណ៍ពីចំនួនមនុស្សរងរបួសបន្តិចបន្តួច។
ព្រះវិហារ Basilica នៃ St. Benedict សតវត្សរ៍ទី១៤ នៅក្នុងទីក្រុង Umbrian ដែលឡោមព័ទ្ធទៅដោយទីក្រុង Norcia សម្បូរទៅដោយភ្នំបានរលំខ្ទេចខ្ទី បន្សល់ទុកតែផ្នែកខាងមុខប្រាសាទ។ ព្រះសង្ឃ Benedict បានសូត្រធម៌នៅខាងមុខគំនរបែកបាក់នោះ។
លោកMichele Franchi អភិបាលរងទីក្រុងArquata del Tronto ប្រាប់បណ្តាញទូរទស្សន៍ Rai ថា «ការរញ្ជួយផែនដីនៅពេលព្រឹកនេះ បានធ្វើឲ្យប៉ះពាល់ព្រះវិហារដែលនៅសេសសល់កាលពីការរញ្ជួយដីលើកមុន។យើងនឹងត្រូវចាប់ផ្តើមពីបាតដៃទទេទៅ»។
ការរញ្ជួយដីនៅថ្ងៃអាទិត្យនេះបានធ្វើឲ្យរង្គើរហូតដល់តំបន់ភាគខាងជើងឆ្ងាយនៃទីក្រុង Bozano នៅជិតព្រំដែនប្រទេសអូទ្រីសហើយរហូតដល់តំបន់ Puglia ខាងត្បូងឆ្ងាយនៅឯឧបទ្វីបអ៊ីតាលី។
តំបន់នេះបានរង្គោះរង្គើដោយសារការរញ្ជួយដីតូចមួយទៀតចាប់តាំងពីការរញ្ជួយដីខែសីហាមកដែលបានសម្លាប់មនុស្សជិត៣០០នាក់។ ការរញ្ជួយផែនដីបន្ទាប់ពីការរញ្ជួយផែនដីធំបានកើតមានឡើងនៅតំបន់នោះកាលពីថ្ងៃពុធសប្តាហ៍មុន។
