សមាជិកសភាអ៊ីស្រាអែលបានបោះឆ្នោតកាលពីថ្ងៃពុធ ដើម្បីរំលាយសភានិងរៀបចំការបោះឆ្នោតជាសកល ប្រាំមួយខែមុនកាលកំណត់ នៅថ្ងៃទី៩ខែមេសាឆ្នាំ២០១៩។
សមាជិកសភាបានបោះឆ្នោតដោយមាន១០២សំឡេងទល់នឹង២សំឡេងសម្រេចរំលាយសភាបន្ទាប់ពីពួកគេមានការព្រមព្រៀងគ្នាកាលពីថ្ងៃចន្ទដោយក្រុមចម្រុះរបស់នាយករដ្ឋមន្ត្រី Benjamin Netanyahu។
វិបត្តិរបស់ក្រុមចម្រុះទាក់ទងនឹងច្បាប់ដែលប៉ះពាល់ដល់ការលើកលែងកាតព្វកិច្ចយោធារបស់ជនជាតិជ្វីស្ហកាន់សាសនាតឹងរ៉ឹងគឺពួក Ultra-Orthodox Jewishនោះបាននាំឱ្យមានការសម្រេចចិត្តរំលាយសភានេះ។
លោក Netanyahu ដែលដឹកនាំគណបក្ស Likud ស្តាំនិយមបានដឹកនាំដោយសំឡេងភាគច្រើនតិចតូចគឺ៦១សំឡេងនៅក្នុងរដ្ឋសភាដែលមានសមាជិក១២០នាក់។
ការស្ទាបស្ទង់មតិបានលើកឡើងថា គណបក្សរបស់ Netanyahu ទំនឹងជានឹងជាប់បោះឆ្នោតឡើងវិញ។
ទោះជាយ៉ាងណាក៏ដោយ ស្ថានភាពនេះនឹងប៉ះពាល់ដល់ការសម្រេចចិត្តនាពេលខាងមុខរបស់រដ្ឋមន្ត្រីយុត្តិធម៌អ៊ីស្រាអែលអំពីចោទប្រកាន់ប្រឆាំងនឹងលោកNetanyahu ឬយ៉ាងណា។ លោក Netanyahu កំពុងប្រឈមមុខនឹងការចោទប្រកាន់អំពើពុករលួយជាច្រើន ហើយការចោទប្រកាន់អាចនឹងដាក់សម្ពាធឱ្យលោកនាយករដ្ឋមន្ត្រីលាលែងពីតំណែង៕
