លោកស្រី Nikki Haley ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិដែលនឹងត្រូវចេញពីតំណែងនៅបំណាច់ចុងឆ្នាំនេះ កំពុងជំរុញឲ្យប៉ាឡេស្ទីន ទទួលយកកិច្ចព្រមព្រៀងសន្តិភាព ដោយលោកស្រីបាននិយាយថាប៉ាឡេស្ទីននឹងទទួលបានអត្ថប្រយោជន៍ច្រើនជាងអ៊ីស្រាអែល។
លោកស្រី Haley បានថ្លែងកាលពីថ្ងៃអង្គារនៅឯកិច្ចប្រជុំប្រចាំខែរបស់ក្រុមប្រឹក្សាសន្តិសុខអំពីបញ្ហានៅតំបន់មជ្ឈិមបូព៌ាថា «នេះគឺជាពេលដែលយើងត្រូវប្រឈមនឹងការពិតជាក់ស្តែង។ ភាគីទាំងពីរនឹងទទួលបានអត្ថប្រយោជន៍ពីកិច្ចព្រមព្រៀងសន្តិភាពនេះ។ ប៉ុន្តែភាគីប៉ាឡេស្ទីននឹងទទួលបានអត្ថប្រយោជន៍ច្រើនជាង ហើយភាគីអ៊ីស្រាអែលនឹងប្រឈមនឹងហានិភ័យច្រើនជាង»។
លោកស្រី Haley បានប្រាប់ទៅឯកអគ្គរដ្ឋទូតនានាថា «អ៊ីស្រាអែលគឺជាប្រទេសដែលរីកចម្រើន និងមានភាពរឹងមាំ។ ប្រទេសនេះតែងតែចង់បានសន្តិភាពជាមួយនឹងប្រទេសជិតខាង។ អ៊ីសា្រអែលបានបង្ហាញយ៉ាងច្បាស់អំពីឆន្ទៈលះបង់ដើម្បីសុខសន្តិភាព រួមទាំងការលះបង់ទឹកដីរបស់ខ្លួនផងដែរ ក៏ប៉ុន្តែអ៊ីស្រាអែលនឹងមិនបង្កើតកិច្ចព្រមព្រៀងមួយនៅក្នុងតម្លៃណាមួយឡើយ ហើយវាក៏មិនគួរកើតឡើងនោះដែរ»។
លោកស្រី Haley ដែលជាអ្នកគាំទ្រឥតសំចៃចំពោះអ៊ីស្រាអែលបានថ្លែងទៅប៉ាឡេស្ទីនថា «មានអ្នកខ្លះប្រហែលជាយល់ច្រឡំមកលើខ្ញុំ និងគិតថាខ្ញុំប្រឆាំងនឹងពលរដ្ឋប៉ាឡេស្ទីន ប៉ុន្តែយើងមិនអាចគេចវេសពីការពិតបានទេ»៕
