ទីប្រឹក្សាសន្តិសុខជាតិសហរដ្ឋអាមេរិកលោក John Bolton បាននិយាយកាលពីថ្ងៃអាទិត្យម្សិលមិញបន្ទាប់ពីលោកបានធ្វើដំណើរទៅដល់ប្រទេសអ៊ីស្រាអែលថា កម្មវិធីអាវុធនុយក្លេអ៊ែរ និងគ្រាប់ផ្លោងមីស៊ីលរបស់ប្រទេសអ៊ីរ៉ង់គឺជាចំណុចផ្ដោតនៅក្នុងការពិភាក្សារបស់លោកជាមួយនឹងនាយករដ្ឋមន្ត្រីអ៊ីស្រាអែលលោក Benjamin Netanyahu។
លោកទាំងពីរបានពិសាអាហារពេលល្ងាចជាលក្ខណៈការងារកាលពីថ្ងៃអាទិត្យម្សិលមិញ និងបន្តពិភាក្សាគ្នានៅថ្ងៃចន្ទនេះ។
លោក Bolton បាននិយាយថា៖ «មានការប្រឈមខ្លាំងក្លាមួយចំនួនសម្រាប់ប្រទេសអ៊ីស្រាអែល សហរដ្ឋអាមេរិក និងពិភពលោកទាំងមូល។ កម្មវិធីនុយក្លេអ៊ែរ និងគ្រាប់ផ្លោងមីស៊ីលរបស់អ៊ីរ៉ង់គឺជាចំណុចផ្ដោតខ្លាំងបំផុតនៅក្នុងការពិភាក្សា»។
មុនពេលចាកចេញទៅកាន់ប្រទេសអ៊ីស្រាអែល លោក Bolton បានប្រាប់បណ្ដាញព័ត៌មាន ABC ថា សហរដ្ឋអាមេរិក អ៊ីស្រាអែល និងរុស្ស៊ី មានគោលបំណងដូចគ្នា ដែលនោះគឺការបណ្ដេញទាហាន កងជីវពល និងកងជំនួយអ៊ីរ៉ង់ចេញពីប្រទេសស៊ីរី និងអ៊ីរ៉ាក់។ លោកក៏បានបញ្ជាក់ផងដែរថា អ៊ីរ៉ង់ត្រូវតែបញ្ចប់ការគាំទ្ររបស់ខ្លួនចំពោះក្រុម Hezbollah ដែលគាំទ្រដោយប្រទេសលីបង់។
លោក Bolton នឹងធ្វើដំណើរទៅកាន់ប្រទេសអ៊ុយក្រែននៅក្នុងសប្ដាហ៍នេះ និងជួបជាមួយនឹងមន្ត្រីរដ្ឋាភិបាលរុស្ស៊ីនៅក្នុងទីក្រុងហ្សឺណែវ ប្រទេសស្វ៊ីស ដើម្បីបន្តការពិភាក្សារបស់ប្រធានាធិបតីអាមេរិកលោក Donald Trump ជាមួយនឹងប្រធានាធិបតីរុស្ស៊ីលោក Vladimir Putin ដែលបានធ្វើឡើងនៅក្នុងទីក្រុង Helsinki ប្រទេសហ្វាំងឡង់ កាលពីខែកក្កដាកន្លងមក៕
