កងទ័ពអ៊ីស្រាអែលបានចាប់ផ្តើមវាយឆ្មក់និងវាយប្រហារតាមអាកាសកាលពីថ្ងៃពុធនៅក្នុងតំបន់ West Bank ដែលខ្លួនត្រួតត្រាដោយបានសម្លាប់ពួកសកម្មប្រយុទ្ធយ៉ាងតិចណាស់ក៏៩នាក់ហើយបានឡោមព័ទ្ធទីក្រុង Jenin។
យោធាអ៊ីស្រាអែលបាននិយាយថា«កងទ័ពដ៏ធំ»បានចូលក្នុងទីក្រុង Jenin ដែលជាទីតាំងរឹងមាំរបស់ជនសកម្មប្រយុទ្ធនិងទីក្រុង Tulkaremនិងជំរំជនភៀសខ្លួន Al-Faraaដែលវិលត្រឡប់ទៅសង្គ្រាមនៅមជ្ឈិមបូព៌ាឆ្នាំ១៩៤៨ ដែលកន្លែងទាំងនោះស្ថិតនៅប៉ែកខាងជើងតំបន់ West Bank។
លោកវរសេនីយ៍ទោ Nadav Shoshani អ្នកនាំពាក្យយោធាអ៊ីស្រាអែលបាននិយាយថាកងទ័ពអ៊ីស្រាអែលបានសម្លាប់ជនសកម្មប្រយុទ្ធ៩នាក់ រួមមាន៣នាក់នៅក្នុងការវាយប្រហារតាមអាកាសនៅក្នុងទីក្រុង Tulkarem និង៤នាក់នៅក្នុងការវាយប្រហារនៅក្រុងAl-Faraaផង។ លោកបាននិយាយទៀតថាជនសង្ស័យជាពួកសកម្មប្រយុទ្ធ៥នាក់បានត្រូវចាប់ខ្លួន ហើយថាការវាយឆ្មក់ជាដំណាក់កាលដំបូងនៃកិច្ចប្រតិបត្តិការកាន់តែធំឡើង។
ក្រុមហាម៉ាស់បាននិយាយថាពួកអ្នកប្រយុទ្ធរបស់ខ្លួន១០នាក់បានត្រូវសម្លាប់នៅក្នុងការប្រយុទ្ធនៅតំបន់ West Bank ខណៈដែលក្រុមសកម្មប្រយុទ្ធប៉ាឡេស្ទីនបាននិយាយថាពួកគេបានបាញ់តបតគ្នាជាមួយកងទ័ពអ៊ីស្រាអែល។
កងទ័ពអ៊ីស្រាអែលបានឡោមព័ទ្ធ បិទច្រកចេញនិងចំណុចចូលទៅកាន់មន្ទីរពេទ្យ ហើយបានកម្ទេចហេដ្ឋារចនាសម្ព័ន្ធនៅក្នុងជំរំនោះ។ នេះបើតាមអភិបាលក្រុង Jenin លោក Kamal Abu al-Rubប្រាប់វិទ្យុប៉ាឡេស្ទីន។
ក្រសួងសុខាភិបាលប៉ាឡេស្ទីននៅក្នុងតំបន់ West Bank បានប្រាប់ឱ្យដឹងថាកងទ័ពអ៊ីស្រាអែលបានបិទផ្លូវឆ្ពោះទៅកាន់មន្ទីរពេទ្យដោយរបាំងហើយបានឡោមព័ទ្ធមន្ទីរពេទ្យផ្សេងទៀតនៅក្នុងទីក្រុង Jenin។ លោកShoshani បាននិយាយទៀតថាយោធាអ៊ីស្រាអែលបានព្យាយាមរារាំងពួកសកម្មប្រយុទ្ធកុំឱ្យជ្រកពួនក្នុងមន្ទីរពេទ្យ៕
វេទិកាបញ្ចេញមតិ