ក្រុមហ៊ុនអាកាសចរណ៍ El Al នឹងត្រូវបានអនុញ្ញាតឲ្យដកប្រាក់រាប់លានដុល្លារពីមូលនិធិសោធនិវត្តន៍របស់បុគ្គលិកក្រុមហ៊ុន ក្នុងកិច្ចប្រឹងប្រែងជួយឲ្យក្រុមហ៊ុនដែលកំពុងត្រដាបត្រដួសនេះ អាចឆ្លងផុតវិបត្តិកូវីដ១៩បាន។
តុលាការការងារសង្កាត់របស់ក្រុង Tel Aviv បានយល់ព្រមចំពោះការដកប្រាក់តម្លៃ ៣០ លានដុល្លារនេះ កាលពីថ្ងៃអាទិត្យ ដោយពិពណ៌នាប្រាក់នេះថាជាមូលនិធិសល់លើស។
ប៉ុន្តែ បុគ្គលិកក្រុមហ៊ុន El Al បានព្យាយាមទប់ស្កាត់ការដកប្រាក់សោធនិវត្តន៍នេះ។
មូលនិធិសោធនិវត្តន៍នេះត្រូវបានបង្កើតឡើង ដើម្បីការពារបុគ្គលិក កាលពីច្រើនឆ្នាំកន្លងមក នៅពេលដែលគេបានធ្វើឯកជនភាវូបនីយកម្មក្រុមហ៊ុនអាកាសចរណ៍របស់រដ្ឋមួយនេះ។ បុគ្គលិកដែលមានសិទ្ធិទទួលបានមូលនិធិនេះភាគច្រើនបានចូលនិវត្តន៍រួចហើយ។ ប្រាក់សម្រាប់បុគ្គលិកសល់ពីនេះត្រូវបានគេបង្វិលទៅគណនីប្រាក់បុគ្គល។
ជាមួយគ្នានេះដែរ កាសែត J Post បានរាយការណ៍ថា ក្រមហ៊ុនអាកាសចរណ៍ El Al នឹងចាប់ផ្តើមការហោះហើរដឹកទំនិញបែបមនុស្សធម៌ ដោយដឹកសម្ភារៈសម្រាប់ប្រឆាំងនឹងវីរុសកូរ៉ូណា ពីទីក្រុងវូហាន ប្រទេសចិន ទៅកាន់ក្រុងសំខាន់ៗរបស់អឺរ៉ុប ដោយឆ្លងកាត់អ៊ីស្រាអែល៕
