នាយករដ្ឋមន្រ្តីអ៊ីស្រាអែលលោក Benjamin Netanyahu កាលពីថ្ងៃព្រហស្បតិ៍ទទួលបានជ័យជម្នះគួរឱ្យកត់សម្គាល់លើលោក Gideon Saar ដែលជាគូប្រជែងរបស់លោកក្នុងគណបក្ស Likud ដោយទទួលបានសំឡេងគាំទ្រជាង៧២ភាគរយ។
ជ័យជម្នះក្នុងការបោះឆ្នោតនេះអនុញ្ញាតឱ្យលោកNetanyahu ចូលរួមក្នុងការបោះឆ្នោតជាតិលើកទី៣របស់អ៊ីស្រាអែលរយៈពេលមួយឆ្នាំ ដែលគ្រោងធ្វើនៅដើមខែមីនា។
លោក Netanyahu បានថ្លែងនៅក្នុងសារទៅកាន់អ្នកគាំទ្រថា «នេះគឺជាជោគជ័យដ៏ធំធេង! សូមអរគុណសមាជិកគណបក្ស Likud ចំពោះការជឿទុកចិត្ត ការគាំទ្រ និងក្តីស្រឡាញ់»។
លោកបានប្តេជ្ញាថា៖ «នឹងដឹកនាំគណបក្ស Likud ដើម្បីសម្រេចបានជោគជ័យក្នុងការបោះឆ្នោតខាងមុខ ហើយបន្តដឹកនាំអ៊ីស្រាអែលឲ្យសម្រេចបានសមិទ្ធផលដែលមិនធ្លាប់មានពីមុនមក»។
លោក Saar បានហៅទូរស័ព្ទទៅលោក Netanyahu ដោយទទួលស្គាល់បរាជ័យហើយថាលោកនឹងបន្តគាំទ្រគណបក្ស Likud នៅក្នុងយុទ្ធនាបោះឆ្នោតខាងមុខនេះ។
អ្នកគាំទ្រលោក Saar បាននិយាយថា ប្រសិនបើលោកទទួលបានសំឡេងតែ៣០ភាគរយនៃការបោះឆ្នោត នោះអាចចាត់ទុកជាជោគជ័យដ៏ធំហើយ។ លោកមិនអាចទទួលបានសំឡេងកម្រិតនេះទេ តែខ្វះមិនច្រើនទេ។
លោក Saar បាននិយាយថា៖ « ការប្រកួតប្រជែងនេះសំខាន់ណាស់សម្រាប់គណបក្ស Likud និងគោលការណ៍ប្រជាធិបតេយ្យគណបក្សនេះ។ ការសម្រេចចិត្តរបស់ខ្ញុំក្នុងការប្រកួតប្រជែងគឺត្រឹមត្រូវនិងចាំបាច់។ អ្នកណាក៏ដោយ បើមិនបានត្រៀមខ្លួនចាប់យកឱកាសដើម្បីដើរតាមមាគ៌ាដែលខ្លួនជឿជាក់ទេ អ្នកនោះនឹងមិនទទួលបានជ័យជម្នះឡើយ»។
លោក Saar ត្រូវបានគេមើលឃើញថា ជាអ្នកប្រកួតប្រជែងដ៏ខ្លាំងក្លាលើកទីមួយប្រឆាំងនឹងលោកNetanyahu ក្នុងរយៈពេល១០ឆ្នាំដែលលោកដឹកនាំគណបក្ស Likud ដែលជាគណបក្សកាន់អំណាច។ ថ្មីៗនេះលោក Netanyahu បានក្លាយជានាយករដ្ឋមន្រ្តីដែលកាន់អំណាចយូរជាងគេបំផុតនៅអ៊ីស្រាអែល៕
