ភ្ជាប់​ទៅ​គេហទំព័រ​ទាក់ទង

រដ្ឋឥស្លាម​និយាយថា​គ្រាប់បែក​កែច្នៃ​ពី​កំប៉ុង​ទឹកក្រូច​បាន​ទម្លាក់​យន្តហោះ​រុស្ស៊ី


រូបថត​ដែល​បាន​ចេញ​ផ្សាយ​ក្នុង​ទស្សនាវដ្តី Dabiq របស់​ក្រុម​រដ្ឋ​ឥស្លាម បង្ហាញ​កំប៉ុង​ទឹកក្រូច​មួយ​និង​អ្វី​ដែល​ហាក់​ដូច​ជា​ឧបករណ៍​សម្រាប់​បំផ្ទុះ ជាមួយ​នឹង​កុងតាក់ នៅ​លើ​ផ្ទៃ​ព័ណ៌​ខៀវ។

ក្រុម​រដ្ឋ​ឥស្លាម​បាន​ចេញ​ផ្សាយ​រូប​ថត​ដែល​ខ្លួន​បាន​អះអាង​ថា​ ​ជា​គ្រាប់បែកដែល​បាន​ទម្លាក់​យន្តហោះ​រុស្ស៊ី​មួយ​គ្រឿង​នៅ​លើ​ឧបទ្វីប​ស៊ី​ណៃកាល​ពី​ខែ​មុន ​ហើយ​បាន​និយាយ​ថា ​ខ្លួន​បាន​វាយ​ប្រហារ​យន្តហោះ​នោះ ពី​ព្រោះ​តែ​ការ​ទម្លាក់​គ្រាប់​បែក​របស់​រដ្ឋាភិបាល​ទីក្រុង​មូស្គូ​នៅ​ក្នុង​ប្រទេស​ស៊ីរី។

រូបថតដែល​បាន​បង្ហាញនៅលើ​ទស្សនាវដ្តី ​Dabiq​ តាម​ប្រព័ន្ធ​អ៊ីនធឺណិត​ផ្លូវការ​ផ្សាយ​ជា​ភាសា​អង់គ្លេស​របស់​ក្រុម​ជ្រុល​និយម ​បាន​បង្ហាញ​កំប៉ុង​ទឹក​ក្រូច​ពណ៌​លឿង​ដែល​កេហទំព័រ​នោះ​បាន​និយាយ​ថា មាន​គ្រឿង​ផ្ទុះ​ដែល​ពួក​អ្នក​ស៊ើប​អង្កេត​រុស្ស៊ី​និង​ប្រទេស​លោក​ខាង​លិច ​បាន​សន្និដ្ឋាន​ថា ​បាន​ទម្លាក់យន្តហោះ​ធុន​ Airbus ដែល​បាន​សម្លាប់​មនុស្ស​២២៤​នាក់​នៅ​លើ​យន្តហោះ​នោះ។

ក្រុម​រដ្ឋ​ឥស្លាម​ បាន​អះអាង​ទទួល​ខុសត្រូវចំពោះ​ការ​វាយប្រហារកាល​ពី​ពេល​មុន ក៏ប៉ុន្តែ ​មិន​បាន​ផ្តល់​ភស្តុតាង​ទេ។

ទស្សនាវដ្តី​នោះ​បាន​អះអាង​ថា ​កាល​ពី​ពេល​មុន ​ពួក​ជីហាដ​មាន​ផែ​នការ​បាញ់​ទម្លាក់​យន្តហោះ​មួយ​គ្រឿង​ជា​របស់​ក្រុម​ចម្រុះ​ដែល​ដឹក​នាំ​ដោយ​សហរដ្ឋ​អាមេរិក​ដែល​កំពុង​ធ្វើ​យុទ្ធនាការ​តាម​អាកាស​ប្រឆាំង​នឹង​ពួក​អ្នក​ប្រយុទ្ធ​ក្រុម​រដ្ឋ​ឥស្លាម​នៅ​ក្នុង​ប្រទេស​អ៊ីរ៉ាក់​និង​ស៊ីរី។

ក៏ប៉ុន្តែ ​ទស្សនាវដ្តី ​Dabiq​ នោះបាន​ប្រាប់​ឲ្យ​ដឹង​ទៀត​ថា ​យន្តហោះ​ដឹក​អ្នក​ដំណើរ​រុស្ស៊ី ​បាន​ក្លាយ​ជា​ទិសដៅ​បន្ទាប់​ពី​រដ្ឋាភិបាល​ទីក្រុង​មូស្គូ ​បាន​ចាប់​ផ្តើម​ការ​វាយ​ប្រហារ​តាម​អាកាស​របស់​ខ្លួន​នៅ​ក្នុង​ខែ​កញ្ញា​ប្រឆាំង​នឹង​ពួក​កងទ័ព​ឧទ្ទាម​ស៊ីរី​ដែល​កំពុង​ប្រយុទ្ធ​កងទ័ព​ដែល​ស្មោះ​ត្រង់​ជាមួយ​ប្រធានា​ធិបតី ​បាហ្សា អាល​អាសាដ (Bashar Al- Assad)។

ទស្សនាវដ្តីនោះ ​បាន​ប្រាប់​ឲ្យ​ដឹង​ថា៖ «​គ្រាប់​បែក​នោះ ​បាន​ត្រូវ​យក​ចូលទៅ​ក្នុង​យន្ត​ហោះ​ដែល​បាន​នាំ​ទៅ​ដល់​ការ​សម្លាប់​ជន​ជាតិ​រុស្ស៊ី​២១៩​នាក់ ​ហើយ​និងពួក​អ្នក​ធ្វើ​សង្គ្រាម​សាសនា៥​នាក់​ទៀត ​ហើយ​ការ​ធ្វើ​ដូច្នេះ​ គឺ​មួយ​ខែ​បន្ទាប់​ពី​ការ​សម្រេច​ចិត្ត​ដោយ​គ្មាន​ការ​ពិចារណា​របស់​រុស្ស៊ី‍»៕

XS
SM
MD
LG