ក្រុមសកម្មប្រយុទ្ធរដ្ឋអ៊ីស្លាម ដែលត្រួតត្រាភាគខ្លះនៃប្រទេសស៊ីរី និង អ៊ីរ៉ាក់ បានទទួលយកសេចក្តីសន្យាសម្តែងសេចក្តីស្មោះស្ម័គ្រពីក្រុមជ្រុលនិយម Boko Haram ដែលមានមូលដ្ឋាននៅប្រទេសនីហ្សេរីយ៉ា។
នៅក្នុងសេចក្តីថ្លែងថតសម្លេងមួយកាលពីថ្ងៃព្រហស្បតិ៍ អ្នកនាំពាក្យម្នាក់របស់ក្រុម រដ្ឋអ៊ីស្លាម បានស្វាគមន៍អ្វីដែលខ្លួនបានហៅថា ការពង្រីករដ្ឋាភិបាលអ៊ីស្លាម ដែលតែងតាំងដោយខ្លួនឯងរបស់ក្រុមនេះ នៅក្នុងទ្វីបអាហ្វ្រិកភាគខាងលិច។
អ្នកនាំពាក្យ Aby Mohammed al-Adnani និយាយថា ក្រុមរដ្ឋអ៊ីស្លាម បានទទួលយកសេចក្តីសច្ចាសម្តែងសេចក្តីស្មោះស្ម័គ្រចំពោះរបស់បងប្អូននិកាយ Sunni ដែលអំពាវនាវឲ្យមានសង្គ្រាមសាសនា។
មេដឹកនាំក្រុម Boko Haram ឈ្មោះ Abybakar Shekau កាលពីសប្តាហ៍មុនបានធ្វើសេចក្តីសន្យាតាម វីដេអូ ថាក្រុមខ្លួននឹង «ស្តាប់ហើយគោរព» មេដឹកនាំ រដ្ឋអ៊ីស្លាម Abu Bakr al-Baghdadi។
នៅដើមសប្តាហ៍នេះ ប្រធានាធិបតីប្រទេសនីហ្សេរីយ៉ា លោក Googluck Jonathan បានប្រាប់វីអូអេថា យុទ្ធជន Boko Haram កំពុងទទួលការហ្វឹកហ្វឺននៅក្នុងជំរំនៅមជ្ឈឹមបូព៌ាប្រទេស ដែលគ្រប់គ្រងដោយក្រុមសកម្មប្រយុទ្ធរដ្ឋអ៊ីស្លាម៕