ក្រុមយុទ្ធជនជ្រុលនិយមរដ្ឋឥស្លាមមួយក្រុមបានដកថយចេញពីទីក្រុង Raqqa នៃប្រទេសស៊ីរី ដែលការដកថយនេះធ្វើឡើងស្របទៅតាមកិច្ចព្រមព្រៀងមួយជាមួយនឹងកងជីវពលស៊ីរីគាំទ្រដោយសហរដ្ឋអាមេរិក ដែលបានហ៊ុមព័ទ្ធក្រុមជ្រុលនិយមរដ្ឋឥស្លាមទាំងនោះ។
អ្នកនាំពាក្យរបស់កងជីវពលស៊ីរីម្នាក់បាននិយាយនៅថ្ងៃអាទិត្យនេះថា ក្រុមយុទ្ធជនជ្រុលនិយមរដ្ឋឥស្លាមទាំងនោះបានយកជនស៊ីវិលទៅជាមួយពួកគេដើម្បីប្រើជារបាំងការពារ។
ស្របពេលនោះដែរ ការវាយប្រយុទ្ធគ្នាបានបន្តធ្វើឡើងរវាងកងកម្លាំងប្រជាធិបតេយ្យស៊ីរីដែលគាំទ្រដោយសហរដ្ឋអាមេរិក និងពួកសកម្មប្រយុទ្ធជ្រុលនិយមរដ្ឋឥស្លាម។ ទីភ្នាក់ងារព័ត៌មាន Retuers បានស្រង់សម្ដីរបស់អ្នកនាំពាក្យរបស់កងកម្លាំងប្រជាធិបតេយ្យស៊ីរីម្នាក់ដែលបាននិយាយថា «ប្រតិបត្តិការនេះបានបញ្ចប់ហើយ ហើយការវាយប្រយុទ្ធគ្នានៅតែបន្ត» ដើម្បីប្រឆាំងនឹងពួកសកម្មប្រយុទ្ធនានាដែលស្ថិតនៅក្នុងទីក្រុង Raqqa នៅឡើយ។
កាលពីលើកមុន អ្នកនាំពាក្យម្នាក់របស់កងជីវពលស៊ីរីបាននិយាយថា ពួកយុទ្ធជនជ្រុលនិយមរដ្ឋឥស្លាមណាដែលមិនចាកចេញពីទីក្រុង Raqqa នឹងត្រូវបង្ខំឲ្យចុះចាញ់ បើមិនដូច្នេះទេនឹងត្រូវស្លាប់។
កាលពីថ្ងៃសុក្រកន្លងទៅនេះ ជនស៊ីវិលជាច្រើននាក់បានគេចចេញពីទីក្រុង Raqqa នៅមុនពេលដែលពួកយុទ្ធជនស៊ីរីដែលគាំទ្រដោយសហរដ្ឋអាមេរិក ធ្វើការសម្រុកចូលក្នុងទីក្រុង Raqqa ដើម្បីបណ្ដេញពួកជ្រុលនិយមរដ្ឋឥស្លាមចេញ ក្នុងគោលបំណងដើម្បីដណ្ដើមកាន់កាប់ទីក្រុង Raqqa នេះឡើងវិញ។
យុទ្ធជនរបស់កងកម្លាំងប្រជាធិបតេយ្យស៊ីរីដែលគាំទ្រដោយសហរដ្ឋអាមេរិកបានវាយប្រយុទ្ធជាមួយនឹងពួកជ្រុលនិយមរដ្ឋឥស្លាមតាំងពីថ្ងៃទី ៥ ខែមិថុនាមកម្ល៉េះ ដោយដណ្ដើមកាន់កាប់ទីក្រុង Raqqa បានចំនួនជាង ៨០ ភាគរយហើយ។
សកម្មជននានាបាននិយាយថា ជនស៊ីវិលជាង ១ ពាន់នាក់ ត្រូវបានសម្លាប់នៅក្នុងទីក្រុង Raqqa ចាប់តាំងពីការវាយប្រយុទ្ធគ្នាបានចាប់ផ្ដើមកាលពីខែមិថុនាមក ហើយមនុស្សជិត ២ សែន ៧ ម៉ឺននាក់បានគេចចេញពីទីក្រុងនេះតាំងពីខែមេសាមក៕
