យោងតាមទីភ្នាក់ងារព័ត៌មាន Amaq របស់ពួកជនសកម្មប្រយុទ្ធរដ្ឋឥស្លាម ជនចំណាកស្រុកស៊ីរីម្នាក់អាយុ២៧ឆ្នាំដែលបានបំផ្ទុះគ្រឿងផ្ទុះធ្វើអត្តឃាតមួយធ្វើឱ្យមនុស្សយ៉ាងតិចណាស់១២នាក់ទៀតត្រូវរបួសនៅក្នុងក្រុង Ansbach ប្រទេសអាល្លឺម៉ង់ គឺជាទាហានម្នាក់នៃពួករដ្ឋឥស្លាម។
ទីភ្នាក់ងារព័ត៌មាននេះបានរាយការណ៍ថា ប្រភពខាងក្នុងមួយបាននិយាយថាអ្នកធ្វើការវាយប្រហារនេះបានធ្វើកិច្ចប្រតិបត្តិការនេះជាការឆ្លើយតបនឹងការអំពាវនាវឱ្យយកជាទីដៅនៃការវាយប្រហារលើប្រទេសជាសមាជិកក្រុមចម្រុះដែលប្រយុទ្ធប្រឆាំងនឹងពួករដ្ឋឥស្លាម។
មន្ត្រីសន្តិសុខជាន់ខ្ពស់នៃរដ្ឋ Bavaria របស់ប្រទេសអាល្លឺម៉ង់បាននិយាយប្រាប់ពួកអ្នកកាសែតកាលពីថ្ងៃចន្ទថា អ្នកធ្វើការវាយប្រហារនេះបានថតវីដេអូមួយក្នុងទូរស័ព្ទចល័តរបស់គាត់ដោយប្តេជ្ញាការស្មោះស្ម័គ្រចំពោះមេដឹកនាំពួករដ្ឋ ឥស្លាម ឈ្មោះ Abu Bakr al-Baghdadi។ លោក Joachim Hermann ក៏បាននិយាយដែរថា សម្ភារៈសម្រាប់ផលិតគ្រាប់បែកដូចជាសាំងនិងសារធាតុគីមីបានត្រូវរកឃើញនៅក្នុងផ្ទះអ្នកធ្វើការវាយប្រហារនេះ។
លោក Thomas de Maiziere បានបញ្ជាឱ្យបង្កើនកិច្ចការពារសន្តិសុខនៅស្ថានីយដឹកជញ្ជូននិងកន្លែងឯទៀតៗ។
ពួកមន្ត្រីអាល្លឺម៉ង់បានថ្លែងថា អ្នកធ្វើការវាយប្រហារនេះបានព្យាយាមសម្លាប់ខ្លួនឯងពីរដងមកហើយកាលពីពេលមុន ហើយគាត់បានទទួលការព្យាបាលជំងឺផ្លូវចិត្តផងដែរ។
បុរសនេះបានបំផ្ទុះគ្រឿងផ្ទុះកាលពីថ្ងៃអាទិត្យ ក្រោយពេលមានការរារាំងគាត់មិនឲ្យចូលទៅក្នុងពិធីមហោស្រពតន្ត្រីមួយនៅក្នុងក្រុង Ansbach នៅជិតក្រុងNuremberg។
មនុស្សជាង២ពាន់នាក់បានត្រូវជម្លៀសចេញពីមហោស្រពនេះនៅក្រោយការផ្ទុះនោះ។អាជ្ញាធរអាល្លឺម៉ង់បានបដិសេធមិនឱ្យបុរសនេះមានសិទ្ធិជ្រកកោនទេកាលពីឆ្នាំទៅមិញ ក៏ប៉ុន្តែគេបានអនុញ្ញាតឱ្យគាត់ឋិតនៅក្នុងប្រទេសអាល្លឺម៉ង់ដោយសារកំពុងមានការប្រយុទ្ធគ្នានៅក្នុងប្រទេសស៊ីរី៕
