ក្រុមអ្នកស៊ើបអង្កេតអាល្លឺម៉ង់បាននិយាយថា ជនប្រដាប់អាវុធវ័យជំទង់ ដែលបានបាញ់សម្លាប់ មនុស្ស៩នាក់ កាលពីថ្ងៃសុក្រនៅក្នុងក្រុង Munich រដ្ឋធានីនៃរដ្ឋ Bavaria ធ្លាប់បានទទួលការព្យាបាលជំងឺផ្លូវចិត្ត ហើយបានរៀបចំផែនការធ្វើការបាញ់សម្លាប់អស់រយៈពេលជាងមួយឆ្នាំមកហើយ។
លោក Thomas Steinkraus-Koch អ្នកនាំពាក្យមា្នក់នៃការិយាល័យរដ្ឋអាជ្ញាក្រុង Munich បាននិយាយថា ជនឈ្មោះ David Ali Sonboly អាយុ១៨ឆ្នាំ បានទទួលការព្យាបាលដោយសម្រាកក្នុងមន្ទីរពេទ្យក្នុងឆ្នាំ២០១៥ ចំនួនពីរខែ មុនពេលទទួលការព្យាបាលសម្រាប់អ្នកជំងឺត្រៀមចេញពីមន្ទីរពេទ្យ។
លោក Steinkraus-Koch បាននិយាយកាលពីថ្ងៃអាទិត្យថា បន្ថែមពីលើការមាន«ជំងឺបាក់ទឹកចិត្ត» ជនជាប់សង្ស័យនេះមានការភ័យខ្លាចក្នុងការទាក់ទងជាមួយមនុស្សដទៃទៀត។
លោក Steinkraus-Koch បានថ្លែងថា Sonboly ដែលបានសម្លាប់ខ្លួនឯង មិនបានយកក្រុមមនុស្សជាក់លាក់ណាមួយជាទីដៅនៃការវាយប្រហារទេ ហើយក៏គ្មានភស្តុតាងថា ការបាញ់កាំភ្លើងសម្លាប់មនុស្សនេះមានការពាក់ព័ន្ធនឹងនយោបាយឡើយ។
លោក Robert Heimberger អ្នកស៊ើបអង្កេតនៅក្នុងរដ្ឋ Bavaria បាននិយាយថាអ្នកបាញ់កាំភ្លើងនេះបានថតរូបនៅពេលគាត់បានទៅមើលកន្លែងដែលកើតមានហេតុការណ៍បាញ់កាំភ្លើងកាលពីពេលមុននៅក្នុងសាលារៀនមួយកន្លែងនៅក្នុងក្រុង Winnenden នាប៉ែកនិរតីប្រទេសអាល្លឺម៉ង់៕
