អ៊ីរ៉ាក់បានហៅការសម្រេចរបស់ក្រុមហ៊ុនប្រេង Exxon ដើម្បីជម្លៀសបុគ្គលិករបស់ខ្លួនចេញពីប្រទេសដែលសម្បូរប្រេងនោះថាជា «ការមិនអាចទទួលយកបាន» ហើយជាការមិនត្រឹមត្រូវ កាលពីថ្ងៃអាទិត្យ។
អ៊ីរ៉ាក់ អះអាងថា ក្រុមហ៊ុនអាមេរិកាំង បានដកបុគ្គលិកទាំងអស់របស់ខ្លួនចំនួន ៦០នាក់ចេញ ប៉ុន្មានថ្ងៃបន្ទាប់ពីបុគ្គលិកមិនសំខាន់របស់សហរដ្ឋអាមេរិកបានដកចេញពីស្ថានទូតរបស់ខ្លួននៅក្នុងរដ្ឋធានីនៃប្រទេសអ៊ីរ៉ាក់ ទំនងបណ្តាលមកពីព្រួយកង្វល់ពីការគំរាមកំហែងមកពីប្រទេសអ៊ីរ៉ង់ដែលជាប្រទេសជិតខាង។
លោក Thamer al-Ghadban រដ្ឋមន្ត្រីក្រសួងប្រេងឥន្ធនៈអ៊ីរ៉ាក់ បាននិយាយថា៖ «ការដកបុគ្គលិកបណ្តោះអាសន្ន មិនមានអ្វីទាក់ទិននឹងសន្តិសុខនៅវាលអណ្តូងប្រេងអ៊ីរ៉ាក់ភាគខាងត្បូង ឬការគំរាមកំហែងណាមួយទេ»។
លោកបាននិយាយនៅក្នុងសេចក្តីថ្លែងការណ៍ដែលបានចេញផ្សាយដោយក្រសួងប្រេងឥន្ធនៈទៀតថា៖ «មូលហេតុនេះជាបញ្ហានយោបាយហើយប្រហែលមានជាប់ទាក់ទិននឹងការតានតឹងក្នុងតំបន់»។
ក្រុមហ៊ុនប្រេង Exxon មិនបានបញ្ជាក់ពីការដកបុគ្គលិកនេះទេ។
ក្រុមហ៊ុនអាមេរិកាំងនេះ មានកិច្ចសន្យាយូរអង្វែងដើម្បីធ្វើឲ្យប្រសើរឡើងនូវវាលអណ្តូងប្រេងខេត្តបាស្រា ភាគខាងត្បូងអ៊ីរ៉ាក់ ដែលជំនួសឲ្យក្រុមហ៊ុនប្រេង South Oil Company ដែលកាន់កាប់ដោយរដ្ឋអ៊ីរ៉ាក់។
លោក Ihsan Abdul Jabbar ប្រធានក្រុមហ៊ុនប្រេងរដ្ឋអ៊ីរ៉ាក់ South Oil Company និយាយថា ការជម្លៀសនេះជាវិធានការប្រុងប្រយ័តជាមុន និងបណ្តោះអាសន្ន ហើយថា មិនមានការចង្អុលបង្ហាញពីភាពគ្រោះថ្នាក់កាលពីថ្ងៃសៅរ៍ទេ៕
