លោកRex Tillerson ប្រធាននិងអគ្គនាយកក្រុមហ៊ុនប្រេង Exxon Mobil ជាបេក្ខជន នាំមុខចុងក្រោយគេបង្អស់ ដែលអាចជារដ្ឋមន្រ្តីការបរទេសថ្មីរបស់សហរដ្ឋអាមេរិក។កាលពីថ្ងៃសៅរ៍ អង្គការព័ត៌មានជាច្រើនបានដកស្រង់ប្រភពដែលមិនប្រាប់ឈ្មោះនានា ដែលជិតស្និទ្ធទៅនឹងក្រុមអន្តរកាលរបស់ប្រធានាធិបតីជាប់ឆ្នោត ដូណាល់ ត្រាំនិយាយថា ការប្រកាសការជ្រើសរើសលោក Tillerson ប្រហែលកើតមានឡើងនៅពេលឆាប់ៗនេះ។
យុទ្ធនាការឃោសនាបោះឆ្នោតប្រធានាធិបតីត្រាំ នឹងមិនបញ្ជាក់ពីការសម្រេចនេះទេ ហើយនាយកគមនាគមន៍របស់លោកប្រធានាធិបតីជាប់ឆ្នោត បានផ្ញើសារតាមប្រព័ន្ធបណ្តាញសង្គម Twitter កាលពីថ្ងៃសៅរ៍ថា មិនមានការប្រកាសស្តីពីការតែងតាំងសមាជិកគណៈរដ្ឋមន្រ្តីទេរហូតទាល់តែដើមសប្តាហ៍ក្រោយ។
ទីភ្នាក់ងារព័ត៌មាន Reuters បានដកស្រង់ប្រភពប្រហាក់ប្រហែលគ្នាមកចុះផ្សាយថា លោក Tillerson មិនទាន់បានត្រូវផ្តល់ដំណែងនេះជាផ្លូវការនៅឡើយទេ។
លោក Tillerson បានចូលរួមជាមួយលោក Mitt Romney អតីតអ្នករិះគន់លោកត្រាំ និងជាបេក្ខជនប្រធានាធិបតីខាងគណបក្សសាធារណរដ្ឋនៅឆ្នាំ២០១២ជាគូប្រកួតប្រជែងនាំមុខសម្រាប់ដំណែងការទូតជាន់ខ្ពស់នេះ។ លោក Rudolph Giuliani អតីតអភិបាលក្រុងញូវយ៉កក៏បានស្ថិតនៅក្នុងបញ្ជីរបស់លោកត្រាំដែរ ក៏ប៉ុន្តែ លោកបានដកឈ្មោះរបស់លោកពីបញ្ជីវិញកាលពីថ្ងៃសុក្រ ដោយលើកហេតុផលថាលោកមានផែនការវិលត្រឡប់ទៅកាន់ផ្នែកឯកជនវិញ។
លោកTillersonជាប្រធានក្រុមហ៊ុនពាណិជ្ជកម្មដ៏ធំបង្អស់របស់ពិភពលោកដែលមើល ការខុសត្រូវនៅក្នុងប្រទេសជាង៥០រួមទាំងប្រទេសរុស្ស៊ីផង។ ក្រុមហ៊ុន Exxon Mobile បានធ្វើកិច្ចព្រមព្រៀងរុករកប្រេង ក៏ដូចជាកិច្ចព្រមព្រៀងផលិតនៅឆ្នាំ២០១១ជាមួយក្រុមហ៊ុន Rosneff ដែលជាក្រុមហ៊ុនប្រេងកាន់កាប់ដោយរដ្ឋរបស់រុស្ស៊ី។ ចាប់តាំងពីឆ្នាំ២០១១មក ក្រុមហ៊ុនទាំងបានបង្កើតកិច្ចប្រតិបត្តិការរួមគ្នា១០នៅក្នុងប្រទេសរុស្ស៊ី៕
