កងកម្លាំងអ៊ីរ៉ាក់នៅថ្ងៃអង្គារនេះបានបន្តបោសសម្អាតជនសកម្មប្រយុទ្ធរដ្ឋឥស្លាម ចេញពីទីក្រុង Ramadi ក្រោយពីដណ្ដើមបានទីក្រុងនេះ ពីក្រុមជីវពលនោះមកវិញ។
ការធ្លាក់ទីក្រុង Ramadi ទៅក្នុងកណ្តាប់ដៃក្រុមរដ្ឋឥស្លាម កាលពីខែឧសភានោះ គឺជាបរាជ័យដ៏ធំ សម្រាប់រដ្ឋាភិបាល និងយោធារបស់លោកនាយករដ្ឋមន្ត្រី Haider al-Abadi ដោយសារពួកគេបានព្យាយាមរុញច្រានក្រុមរដ្ឋឥស្លាមចេញទៅវិញ។
ប៉ុន្តែ ក្រោយពី ជ័យជម្នះក្នុងការដណ្តើមបានទីក្រុង Ramadi វិញ កាលពីថ្ងៃច័ន្ទមក លោក Abadi បានឡើងថ្លែងតាមកញ្ចក់ទូរទស្សន៍អ៊ីរ៉ាក់ ដោយប្រកាសថា ឆ្នាំ២០១៦ នឹងក្លាយជាឆ្នាំដែលក្រុមរដ្ឋឥស្លាមនឹងត្រូវបានបណ្តេញចេញពីប្រទេសអ៊ីរ៉ាក់។ លោកនាយករដ្ឋមន្ត្រីអ៊ីរ៉ាក់ដដែលនិយាយថា ទីក្រុងធំជាងគេទី២របស់ប្រទេសនេះ គឺជាគោលដៅបន្ទាប់សម្រាប់កងទ័ពអ៊ីរ៉ាក់។
លោក Abadi មានប្រសាសន៍ថា «កងទ័ពអ៊ីរ៉ាក់នឹងទៅរំដោះទីក្រុង Mosul ហើយនោះនឹងក្លាយជាបរាជ័យចុងក្រោយរបស់ក្រុមរដ្ឋឥស្លាម»។
ក្រុមរដ្ឋឥស្លាម បានកាន់កាប់ទីក្រុង Mosul នោះ ចាប់តាំងពីខែមិថុនា ឆ្នាំ២០១៤មកម្ល៉េះ នៅពេលដែលក្រុមនោះ បានក្តោបក្តាប់តំបន់ធំៗនៅភាគខាងជើង និងខាងលិចប្រទេសអ៊ីរ៉ាក់ ហើយនិងភាគខាងកើតប្រទេសស៊ីរី។
កងកម្លាំងអ៊ីរ៉ាក់ដែលមានជំនួយពីកងទ័ពអាកាសចម្រុះដឹកនាំដោយសហរដ្ឋអាមេរិក និងពីកងជីវពលគាំទ្ររដ្ឋាភិបាលផងនោះ បាននៅទ្រឹងជាយូរមកហើយ ដោយមិនអាចដណ្តើមដែនដីទាំងនោះពីក្រុមរដ្ឋឥស្លាមបាន។ ទើបតែពេលថ្មីៗនេះ ឃើញមានការរីកចម្រើនខ្លះៗ៕
