ភ្ជាប់​ទៅ​គេហទំព័រ​ទាក់ទង

អ៊ីរ៉ង់​បាន​មើល​ឃើញ​ទឹក​ប្រាក់​៣០​ពាន់​លាន​ដុល្លារ​ពី​វិស័យ​ទេសចរណ៍​នា​ពេល​អនាគត

  • Henry Ridgwell

កិច្ច​ព្រមព្រៀង​រវាង​ប្រទេស​អ៊ីរ៉ង់​ និង​មហា​អំណាច​ពិភពលោក​ទាំង​ប្រាំ​មួយ​អំពី​កម្មវិធី​នុយក្លេអ៊ែរ​ បាន​នាំ​ឲ្យ​មាន​ការ​បន្ធូរបន្ថយ​ដល់​ការ​រឹតត្បិត​ដល់​ប្រទេស​អ៊ីរ៉ង់​នៅ​ឆ្នាំ​ក្រោយ។ ប្រជាជន​អ៊ីរ៉ង់​កំពុង​សង្ឃឹម​ថា​ ការ​បន្ធូរ​លក្ខខណ្ឌ​ធ្វើ​ដំណើរ​នឹង​អាច​នាំ​ឲ្យ​មាន​ភ្ញៀវ​ទេសចរ​អន្តរជាតិ​ហូរ​ចូល​យ៉ាង​សន្ធឹក​សន្ធាប់។

កិច្ច​ព្រមព្រៀង​រវាង​ប្រទេស​អ៊ីរ៉ង់​ និង​មហា​អំណាច​ពិភពលោក​ទាំង​ប្រាំ​មួយ​អំពី​កម្មវិធី​នុយក្លេអ៊ែរ​ បាន​នាំ​ឲ្យ​មាន​ការ​បន្ធូរបន្ថយ​ដល់​ការ​រឹតត្បិត​ដល់​ប្រទេស​អ៊ីរ៉ង់​នៅ​ឆ្នាំ​ក្រោយ។ ប្រជាជន​អ៊ីរ៉ង់​កំពុង​សង្ឃឹម​ថា​ ការ​បន្ធូរ​លក្ខខណ្ឌ​ធ្វើ​ដំណើរ​នឹង​អាច​នាំ​ឲ្យ​មាន​ភ្ញៀវ​ទេសចរ​អន្តរជាតិ​ហូរ​ចូល​យ៉ាង​សន្ធឹក​សន្ធាប់។

ជាមួយ​នឹង​ស្ថាបត្យកម្ម​បុរាណ​ ទេសភាព​ដ៏​អស្ចារ្យ​ និង​ប្រជាជន​រាក់ទាក់​ ក្រុមហ៊ុន​ទេសចរណ៍​បាន​ពិពណ៌នា​ប្រទេស​អ៊ីរ៉ង់​ជា​គ្រឿង​អលង្ការ​របស់​មជ្ឍឹមបូព៌ា​ដែល​មិន​ទាន់​បាន​រក​ឃើញ។

ប៉ុន្តែ​ភាព​ឯកោ​របស់​ប្រទេសនេះ គឺ​ចាប់ផ្តើម​នៅ​ឆ្នាំ​១៩៧៩​ ដែល​បដិវត្តន៍​ឥស្លាម​បាន​ធ្វើ​ឲ្យ​ចំនួន​ភ្ញៀង​ទេសចរ​ពី​បស្ចឹម​ប្រទេស​ធ្លាក់​ចុះ។ ទិន្នន័យ​ចុង​ក្រោយ​បំផុត​បាន​បង្ហាញ​ថា​ ក្នុង​ចំណោម​មនុស្ស​ទាំង​អស់​ដែល​មក​ដល់​ប្រទេស​នេះ​មាន​តែ​ចំនួន​៩០.០០០នាក់​ប៉ុណ្ណោះ​ដែល​ធ្វើ​ដំណើរ​មក​ពី​ទ្វីប​អាមេរិក​ខាង​ជើង​ និង​សហភាព​អឺរ៉ុប​នៅ​ឆ្នាំ​២០១៣។ លោក​ Mehrdad Khonsari ជា​អតីត​អ្នក​ការ​ទូត​បាន​មាន​ប្រសាសន៍​ថា​ នៅ​មាន​ការងារ​ជាច្រើន​ទៀត​ដែល​យើង​ត្រូវ​ធ្វើ។

លោក​បាន​លើក​ឡើង​ថា៖ «ឧបសគ្គ​ដែល​យើង​កំពុង​ប្រឈម​ក្នុង​ប្រទេស​អ៊ីរ៉ង់​បាន​ធ្វើ​ឲ្យ​ប៉ះពាល់​ដល់​ឧស្សាហកម្ម​ទេសចរណ៍​ ដោយ​ភ្ញៀវ​ទេសចរ​ភ័យ​ខ្លាច​នឹង​ការ​ធ្វើ​ដំណើរ​មក​ប្រទេស​អ៊ីរ៉ង់។ ប៉ុន្តែ​ភ្ញៀវ​ទេសចរ​ដែល​ជម្នះ​គំនិត​បែប​នេះ ហើយ​មក​ទស្សនា​ប្រទេស​អ៊ីរ៉ង់​គឺ​មិន​បាន​ខក​បំណង​ឡើយ»។

ស្ថានទូត​ប្រទេស​អ៊ីរ៉ង់​បាន​បើក​ដំណើរ​ការ​ឡើង​វិញ​នៅ​ទីក្រុង​ឡុងដ៏ ​នៅ​ចុង​ខែ​សីហា​កន្លង​ទៅ​នេះ។ កិច្ច​ព្រមព្រៀង​នៅ​ខែ​កក្កដា​រវាង​រដ្ឋាភិបាល​ក្រុង​តេហេរ៉ង់ (Tehran) និង​មហា​អំណាច​ពិភពលោក​ទាំង​ប្រាំ​មួយ​ ទៅ​លើ​កម្មវិធី​នុយក្លេអ៊ែរ​របស់​ប្រទេស​អ៊ីរ៉ង់​បាន​កំពុង​ជួយ​សម្រួល​ដល់​ការ​ធ្វើ​ដំណើរ។
លោកJonny Bealby ដែល​ជា​ស្ថាបនិក​នៃ​ទីភ្នាក់ងារ​ទេសចរណ៍​របស់​អង់គ្លេស​ដែល​មាន​ឈ្មោះ​ថា​ Wild Frontiers​ បាន​និយាយ​ថា​ ទីភ្នាក់ងារ​របស់​លោក​កំពុង​តែ​មាន​តម្រូវការ​ទីផ្សារ​យ៉ាងខ្លាំង។

លោក​បាន​បន្ត​ថា៖ «រឿង​ពីរ​ដែល​បាន​កើត​ឡើង​ក្រោយ​ពី​កិច្ចព្រមព្រៀង​នុយក្លេអ៊ែរ។ ដំបូង​គឺ​ ការិយាល័យ​ការបរទេស​ (អង់គ្លេស) បាន​ផ្លាស់​ប្តូរ​អនុសាសន៍​អំពី​ការ​ធ្វើ​ដំណើរ​ទៅ​ប្រទេស​អ៊ីរ៉ង់។ នេះ​បាន​ធ្វើ​ឲ្យ​ភ្ញៀវ​ទេសចរ​មាន​ទំនុកចិត្ត​ឡើងវិញ​ ហើយ​ចំនួន​ភ្ញៀវ​ទេសចរ​ក៏​បាន​កើន​ឡើង​វិញ។ ពួកយើង​ត្រូវតែ​រៀបចំ​កាលវិភាគ​ចេញ​ដំណើរ​ច្រើន​ជាង​មុន​បីដង​ដើម្បី​ទប់ទល់​នឹង​តម្រូវការ​ធ្វើ​ដំណើរ​ទៅ​ប្រទេស​អ៊ីរ៉ង់​នា​រដូវកាល​ស្លឹកឈើ​ជ្រុះ​នៅ​ក្នុង​ឆ្នាំ​នេះ»។

នាង​ Buggsie Heath-Brown ជនជាតិ​អង់គ្លេស​មួយ​រូប​ដែល​បាន​ធ្វើដំណើរ​ទៅ​ទស្សនា​ទីកន្លែង​ជាច្រើន​នៅ​លើ​ពិភពលោក​កំពុង​រំពឹង​រង់ចាំ​ដំណើរ​ទេសចរណ៍​របស់​នាង​ទៅ​ប្រទេស​អ៊ីរ៉ង់​ក្នុង​ឆ្នាំ​នេះ​ ដែល​ជា​ប្រទេស​ដែល​ស្ថិត​នៅ​ក្នុង​បញ្ជី​នៃ​បំណង​ប្រាថ្នា​ដែល​នាង​មាន​ជា​យូរ​មក​ហើយ។

នាង​បាន​បន្ត​លើក​ឡើង​ថា៖ «យើង​បាន​សម្រេច​ចិត្ត​ធ្វើ​ដំណើរ​ទៅ​ទីនោះ​មុន​គេ​ ដើម្បី​ឃើញ​ទិដ្ឋភាព​ និង​ជួប​ប្រជាជន​នៅ​ទីនោះ មុន​នឹង​មនុស្ស​ទូទាំង​ពិភពលោក​សម្រុក​ទៅ​ទស្សនា​ប្រទេស​អ៊ីរ៉ង់»។

រដ្ឋាភិបាល​អ៊ីរ៉ង់​ប្រកាស​ថា​ ខ្លួនចង់​ទាក់ទាញ​ភ្ញៀវ​ទេសចរ​២០លាន​នាក់​ក្នុង​មួយ​ឆ្នាំ​ ត្រឹម​ឆ្នាំ​២០២៥។ វា​នឹង​នាំ​មក​នូវ​ប្រាក់​ចំណូល​រហូតដល់​៣០ពាន់​លាន​ដុល្លារ។

ជា​ថ្មី​ម្តង​ទៀត​ លោក​ Mehrdad Khonsari បាន​អះអាង​ថា៖ «ឥឡូវ​នេះ មុខមាត់​ខាងក្រៅ​របស់​ប្រទេស​អ៊ីរ៉ង់​កំពុង​ផ្លាស់ប្តូរ​ ដែល​ខ្ញុំ​គិត​ថា​ វិស័យ​ទេសចរណ៍​បាន​ផ្តល់​ឱកាស​ដ៏​ល្អ​មួយ​សម្រាប់​វិស័យ​សេដ្ឋកិច្ច​របស់​ប្រទេស​អ៊ីរ៉ង់»។

​ប្រតិបត្តិករ​ទេសចរណ៍​និយាយថា​ ការ​ទទួល​បាន​ទិដ្ឋាការ​នៅ​តែ​ជា​ឧបសគ្គ​សម្រាប់​ភ្ញៀវ​ទេសចរ​ជាច្រើន​ ខណៈ​ពេល​ដែល​ទណ្ឌកម្ម​អន្តរជាតិ​លើ​ប្រព័ន្ធ​ធនាគារ​របស់​ប្រទេស​អ៊ីរ៉ង់​បាន​ធ្វើ​ឲ្យ​ប្រតិបត្តិការ​ជំនួញ​ភាគ​ច្រើន​ត្រូវ​ធ្វើ​ឡើង​ជា​សាច់ប្រាក់​សុទ្ធ៕

ប្រែ​សម្រួល​ដោយ វិញ សុជាតា

XS
SM
MD
LG