ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

អគ្គអធិការកិច្ច​ថា​ទីភ្នាក់ងារ FBI មាន​ហេតុផល​សមរម្យ​នៅ​ក្នុង​ការបើកការ​ស៊ើបអង្កេត​លើ​ទំនាក់ទំនង​រវាង​លោក Trump និង​រុស្ស៊ី


រូប​ឯកសារ៖ លោក Michael Horowitz ផ្តល់​សក្ខីកម្ម​នៅ​ក្នុង​សវនាការ​គណៈកម្មាធិការ​នីតិកម្ម​របស់​ព្រឹទ្ធសភា កាលពី​ថ្ងៃទី១៨ ខែមិថុនា​ ឆ្នាំ២០១៨។

អគ្គអធិការកិច្ច​នៃ​ក្រសួង​យុត្តិធម៌​សហរដ្ឋអាមេរិក​បាន​បញ្ជាក់​នៅក្នុង​របាយការណ៍ថ្មីមួយ​ទៅ​លើ​ទីភ្នាក់ងារ FBI ដែល​បាន​បើក​ការស៊ើបអង្កេតទៅ​លើ​ទំនាក់ទំនង​ដែល​គួរ​ឲ្យ​សង្ស័យ​រវាង​យុទ្ធនាការ​ឃោសនា​បោះឆ្នោត​របស់ប្រធានាធិបតី​សហរដ្ឋអាមេរិក​លោក Donald Trump កាល​ពីឆ្នាំ២០១៦ និង​ប្រទេស​រុស្ស៊ី​ដែល​បាន​អះអាង​ថា ​ក្រុម​មន្រ្តី FBI មាន​ភស្តុតាង​គ្រប់គ្រាន់​ដើម្បី​បើក​ការស៊ើប​អង្កេត​ចោទ​ប្រកាន់​ប្រធានាធិបតី។

របាយការណ៍​ដែល​គេ​ទន្ទឹង​រង់ចាំ​ជាយូរមក​ហើយ​ ដែល​ត្រូវ​បាន​ផ្សព្វផ្សាយ​កាល​ពី​ថ្ងៃចន្ទ​ម្សិលមិញ​ ផ្ទុយ​ពី​ការលើកឡើង​របស់​ពួកអ្នក​គាំទ្រ​របស់​លោក Trump និង​គណបក្សសាធារណរដ្ឋ​របស់​លោក​ ដែល​បាន​លើកឡើង​ថា​ ការស៊ើបអង្កេតរបស់​ក្រុម​មន្រ្តី​ជាន់ខ្ពស់ទីភ្នាក់ងារ FBI មាន​ការជំរុញ​ផ្នែក​នយោបាយ​ប្រឆាំង​នឹង​លោក Trump។ ហើយ​ក្រោយ​មក​ស្មាក្តី​ពិសេស​លោក Robert Mueller បាន​ដឹកនាំ​ការស៊ើបអង្កេត​នេះ​វិញ។

ក៏ប៉ុន្តែ​អគ្គអធិការកិច្ច​លោក Michael Horowitz ក៏​បាន​រិះគន់​យ៉ាង​ខ្លាំង​លើ​កំហុស​ធំ​មួយ​ចំនួន​របស់​ទីភ្នាក់ងារ FBI នៅក្នុង​ការ​ទទួល​ការអនុញ្ញាត​ពី​តុលាការ​ឃ្លាំមើល​កិច្ចការ​សម្ងាត់​បរទេស​ដើម្បី​ស៊ើបអង្កេត​លោក Carter Page អតីតទីប្រឹក្សា​យុទ្ធនាការ របស់​លោក Trump ដែល​សង្ស័យ​ថា​មាន​ទំនាក់ទំនង​ជាមួយ​នឹង​ភ្នាក់ងារ​ស៊ើបការណ៍​សម្ងាត់​របស់​រុស្ស៊ី។

កំហុស​ធ្ងន់ធ្ងរ​មួយ​ក្នុង​ចំណោម​កំហុស​នានា​ដែល​អគ្គអធិការកិច្ច​ចោទ​ទីភ្នាក់ងារ FBI គឺ FBI មិន​បាន​ប្រាប់​តុលាការ ​និង​ក្រសួងយុត្តិធម៌​ថា​ លោក Page ត្រូវ​បាន​តែងតាំង​ឲ្យ​ធ្វើ​កិច្ចការ​សម្រាប់​ទីភ្នាក់ងារ​ស៊ើបការណ៍​សម្ងាត់ CIA និង​បាន​ប្រាប់​ភ្នាក់ងារ​ចារកម្ម​អំពី​ទំនាក់ទំនង​របស់​លោក​ជាមួយ​នឹង​ក្រុមមន្រ្តី​ស៊ើបការសម្ងាត់​រុស្ស៊ី។ នេះ​យោង​តាម​របាយការណ៍។ របាយការណ៍​ក៏​បាន​បញ្ជាក់​ផងដែរ​ថា ​ទោះបី​ជា​ភ្នាក់ងារ FBI បាន​ប្រាប់​តុលាការ​និង​ក្រសួង​យុតិ្តធម៌​ក៏ដោយ​ ក៏តុលាការ​នៅ​តែ​ផ្តល់​ការ​អនុញ្ញាត​ឲ្យ​ស៊ើបអង្កេត​លើ​លោក Page ដដែល៕

XS
SM
MD
LG