មានរបាយការណ៍ថា យន្តហោះដឹកអ្នកដំណើរមួយគ្រឿងរបស់ប្រទេសឥណ្ឌូនេស៊ី ដែលមានដឹកមនុស្ស៥៤នាក់បានធ្លាក់នៅពេលហោះកាត់ធាតុអាកាសមិនល្អនៅក្នុងខេត្ត Papua នាប៉ែកខាងកើតប្រទេស។
ក្រុមអ្នកស្រុកនៅក្នុងភូមិមួយក្នុងស្រុក Bintang នៃខេត្ត Papua បាននិយាយថាពួកគេបានឃើញយន្តហោះមួយគ្រឿងហោះយ៉ាងទាបនៅមុនពេលវាធ្លាក់នៅក្នុងតំបន់ភ្នំ Tangok កាលពីថ្ងៃអាទិត្យ។ ក្រុមអាជ្ញាធរឥណ្ឌូនេស៊ីនិយាយថា ក្រុមអ្នកជួយសង្គ្រោះបានត្រូវបញ្ជូនទៅកាន់តំបន់ដាច់ស្រយាលនោះ ហើយនឹងចាប់ផ្តើមការស្វែងរកនៅព្រឹកថ្ងៃច័ន្ទនេះ។
គេដឹងមិនច្បាស់លាស់ទេថាតើមានមនុស្សនៅរស់ ឬបែបណាឡើយ។ យន្តហោះនៃក្រុមហ៊ុនអាកាសចរណ៍ Trigana ជើងហោះហើរលេខ២៦៧បានបាត់ទំនាក់ទំនងជាមួយក្រុមអ្នកត្រួតត្រាចរាចរណ៍អាកាសប្រមាណ៣០នាទីនៅក្រោយវាបានហោះចេញកាលពីថ្ងៃអាទិត្យពីចំណតយន្តហោះ Sentani នៅក្នុងក្រុង Jayapura។ យន្តហោះនោះត្រូវធ្វើដំណើរជាធម្មតា៥០នាទីទៅកាន់ក្រុង Oksbil។
ក្រុមមន្ត្រីអាកាសចរណ៍និយាយថា មានអ្នកដំណើរពេញវ័យ៤៤នាក់ កុមារ ៥នាក់ និងក្រុមអាកាសយានិក៥នាក់ជិះនៅក្នុងយន្តហោះមានកង្ហារនោះ៕
