អាជ្ញាធរបានបញ្ជាក់នៅថ្ងៃអាទិត្យនេះថា ពួកគេកំណត់បានទីតាំងរបស់ប្រអប់ខ្មៅចំនួនពីរពីយន្ដហោះឥណ្ឌូនេស៊ីដែលបានធ្លាក់នោះហើយ។ ប្រអប់ខ្មៅនោះគឺជាប្រអប់ផ្ទុកទិន្នន័យអំពីការហោះហើរ ដែលអាចឲ្យអាជ្ញាធរស្វែងយល់អំពីរឿងរ៉ាវដែលបានកើតឡើងចំពោះយន្ដហោះនោះបាន។ យន្ដហោះដែលបានធា្លក់កាលពីថ្ងៃសៅរ៍នោះមានផ្ទុកអ្នកដំណើរទាំងអស់ចំនួន ៦២ នាក់។
ក្រុមអ្នកមុជទឹកស្រង់បានផ្នែកនៃរាងកាយមនុស្ស កម្ទេចកម្ទីបាក់បែកនៃយន្តហោះ និងសម្លៀកបំពាក់នានាចេញពីដែនទឹកនៅក្បែររដ្ឋធានីហ្សាការតា ប្រទេសឥណ្ឌូនេស៊ី នៅថ្ងៃអាទិត្យនេះ។
យន្ដហោះប៊ូអ៊ីងប្រភេទ ៧៣៧-៥០០ របស់ក្រុមហ៊ុនអាកាសចរណ៍ Sriwijaya Air បានធ្លាក់ចូលទៅក្នុងសមុទ្រក្នុងរយៈពេលប្រមាណ ៤ នាទីក្រោយពីហោះចេញពីអាកាសយានដ្ឋានអន្តរជាតិ Soekarno-Hatta ក្នុងទីក្រុងហ្សាការតា កាលពីរសៀលថ្ងៃសៅរ៍។
នាវាយោធាមួយគ្រឿងចាប់បានសញ្ញារបស់យន្ដហោះនោះ ហើយក្រុមអ្នកមុជទឹកបានរកឃើញបំណែកបាក់បែកនៃយន្តហោះនោះពីផ្ទៃក្រោមទឹកជម្រៅប្រហែល ២៣ ម៉ែត្រ។ នេះបើយោងតាមការបញ្ជាក់របស់ក្រសួងគមនាគមន៍នៅថ្ងៃអាទិត្យនេះ ដែលបានស្រង់សម្ដីរបស់មេបញ្ជាការយោធាឥណ្ឌូនេស៊ីលោក Hadi Tjahjanto។
ប្រធានាធិបតីឥណ្ឌូនេស៊ីលោក Joko Widodo បានសម្ដែង «មរណទុក្ខយ៉ាងជ្រាលជ្រៅ» របស់លោក និងបានអំពាវនាវឲ្យពលរដ្ឋ «បន់ស្រន់ទាំងអស់គ្នាដើម្បីឲ្យអាចរកឃើញជនរងគ្រោះ»។
ប៉ុន្តែការស្វែងរកដែលមានទាំងការប្រើប្រាស់ឧទ្ធម្ភាគចក្រ និងនាវាចម្បាំងមួយចំនួនផងនោះ ហាក់ដូចជាមិនមានក្ដីសង្ឃឹមថា នឹងអាចស្វែងរកឃើញអ្នកនៅរស់រានមានជីវិតបានទេ។
ទីភ្នាក់ងាររុករកនិងជួយសង្គ្រោះបានឲ្យដឹងថា មកទល់នឹងពេលនេះ ខ្លួនប្រមូលបានផ្នែកនៃរាងកាយមនុស្សចំនួន ៥ ថង់ ក៏ដូចជាកម្ទេចកម្ទីបាក់បែកមួយចំនួនពីកន្លែងធ្លាក់យន្ដហោះនោះផងដែរ។
សម្លៀកបំពាក់ពណ៌ផ្កាឈូករបស់កុមារម្នាក់ សំបកកង់បែកបាក់របស់យន្តហោះ អាវការពារជីវិត និងកម្ទេចកម្ទីបាក់បែកពីយន្ដហោះនោះត្រូវបានគេរកឃើញ។ នេះបើយោងតាមការបញ្ជាក់របស់អាជ្ញាធរ និងអ្នកសារព័ត៌មានរបស់ទីភ្នាក់ងារព័ត៌មាន AFP ដែលនៅកន្លែងនោះដោយផ្ទាល់៕
