ភ្ជាប់​ទៅ​គេហទំព័រ​ទាក់ទង

គណបក្ស​​«ជន​សាមញ្ញ»​នៅ​ឥណ្ឌា​​ប្រើ​នយោបាយ​ជម្រើស​ផ្សេង​ដើម្បី​ប្រឈម​ជាមួយ​បក្ស​ដទៃទៀត

  • Anjana Pasricha

ប្រធានគណ​បក្ស​ Aam Aadmi និង​បេក្ខជន​ប្រធាន​រដ្ឋ​សម្រាប់​ទីក្រុង​ដេលី​ លោក​ Arvind Kejriwal (កណ្តាល)​ លើកដៃ​ទៅកាន់​អ្នក​គាំទ្រ​នៅ​ទីក្រុង​ញ៉ូវដេលី​ កាល​ពីថ្ងៃទី១០ ខែកុម្ភៈ ឆ្នាំ២០១៥។

នៅ​ក្នុង​ប្រទេស​ឥណ្ឌា​ គណបក្ស​ Aam Aadmi ​ឬ​គណបក្ស​នៃ​ជន​សាមញ្ញ​ (Common Man's Party) បាន​ឈ្នះ​ការ​បោះ​ឆ្នោត​មូលដ្ឋាន​ដ៏​ភ្លូក​ទឹក​ភ្លូក​ដីនៅ​ទីក្រុង​ដេលី​ក្នុង​សប្តាហ៍​នេះ​ បន្ទាប់​ពី​បាន​សន្យា​ថា​នឹង​ធ្វើ​ការ​បោស​សម្អាត​នយោបាយ​នៅ​ក្នុង​ប្រទេស​នេះ។ លោក​ Anjana Pasricha មកពី​ទីក្រុង​ញ៉ូវ​ដេលីរាយការណ៍ថា​ ការ​ប្រឈម​របស់​គណបក្ស​នេះ​ជាមួយ​គណបក្សដទៃ​ជា​ច្រើនទៀត​ដោយ​ប្រើយីហោ«នយោបាយ​ជម្រើសផ្សេងទៀត»​របស់​ខ្លួននោះ​ នឹង​ត្រូវធ្វើ​តេស្ត​សាក​ល្បង​នៅ​ពេល​ដែល​ខ្លួន​គ្រប់​គ្រង​រដ្ឋ​ធានី​ក្នុង​រយៈ​ពេល​ប្រាំ​ឆ្នាំទៅ​មុខ​នេះ។

នៅ​តាម​ដង​ផ្លូវ​ក្នុង​ទីក្រុង​ញ៉ូវ​ដេលី​ អ្នក​ដើរ​លក់​ឥវ៉ាន់​ ក្រុម​អាជីវករ​ អ្នក​បើក​យាន​យន្ត​កង់​បី​ និង​អ្នក​ធាក់​រ៉ឺម៉ក​ ទាំង​អស់​គ្នា​មាន​ភាព​ញញឹម​ញញែម​ចំពោះ​ជ័យ​ជម្នះ​ដ៏​គួរ​ឲ្យ​ភ្ញាក់​ផ្អើល​របស់​គណបក្ស​ Aam Aadmi​ ឬ​គណបក្ស​នៃ​ជន​សាមញ្ញ​ នៅ​ទីក្រុង​ញ៉ូវ​ដេលី។

ពួក​គេ​នឹក​ឃើញ​អំពី​របៀប​ដែល​ពួក​គេ​ទទួល​បាន«សេរីភាព»​នៅ​ពេលគណបក្ស​មួយ​នេះ​បាន​ចាប់​ផ្តើម​គ្រប់​គ្រង​ទីក្រុង​ញ៉ូវ​ដេលី​បាន​៤៩​ថ្ងៃ​កាល​ពី​ឆ្នាំ​មុន។ ពួក​គេ​និយាយ​ថា ក្រុម​ប៉ូលិស​ឈប់​សុំ​លុយ​សូក​ប៉ាន់​ ហើយ​ពួក​គេ​មិន​ត្រូវ​បានក្រុម​មន្រ្តីរុកគួននៅ​ពេល​ពួក​គេ​ព្យាយាម​សុំ​អាជ្ញាប័ណ្ណ​ឬ​កាត​ដើម្បី​ទទួល​ចំណែក​ឧបត្ថម្ភ​ផ្សេងៗ។

គណបក្ស​នេះ​ ដែល​កើត​ចេញ​ពី​ចលនា​តាម​ដង​ផ្លូវ​មួយ​ដើម្បី​ប្រឆាំង​នឹង​អំពើ​ពុក​រលួយ​កាល​ពី​ពីរ​ឆ្នាំ​មុន​ បាន​ផ្ចាញ់​គណបក្ស​ជាតិ​ឥណ្ឌា​ទាំង​ពីរ​គឺ​គណបក្ស ​Bharatiya Janata និង​គណបក្ស​សមាជ (Congress Party) ដោយ​បាន​ទទួល​ជ័យ​ជម្នះ​ជា​ប្រវត្តិសាស្រ្តជាមួយ​កៅអី​៦៧​ក្នុង​ចំណោម​កៅ​អី​ទាំងអស់​៧០​នៅ​ក្នុង​សភា​នៃ​ទីក្រុង​ដេលី។

កម្លាំង​គាំទ្រ​ដ៏​រឹង​មាំ​របស់​គណបក្ស​នេះ​ គឺ​ចេញ​ពី​ក្រុម​មនុស្ស​នៃ​វណ្ណៈ​តូច​ទាប​ក្នុង​ទីក្រុង​ ដែល​មាន​ចំនួន​រហូត​ដល់​ទៅពីរ​ភាគ​បី​នៃ​មនុស្សសរុប​ទាំង១៧​លាន​នាក់​នៅ​ក្នុង​ទីក្រុង​នេះ។ ចំពោះ​ពលរដ្ឋ​ដែល​កំពុង​តែ​តស៊ូ​រស់​នៅ​ដោយ​ប្រាក់កម្រៃ​២២៥​ដុល្លារ​ក្នុង​មួយ​ខែ​ក្នុង​សំណង់​អណាធិបតេយ្យ​ ឬ​ក្នុង​ផ្ទះ​ដែល​តូច​ចង្អៀត ក្តី​សង្ឃឹម​ថា​ខ្លួន​មិន​ចាំ​បាច់​សូក​ប៉ាន់​បន្តិច​បន្តួច​នោះ ជា​អ្វី​ដែល​ធ្វើ​ឲ្យ​ពួកគេ​មាន​ការ​ធូរ​ស្រាល​ក្នុង​ចិត្ត​យ៉ាង​ខ្លាំង​មួយ​។

គណបក្ស​នេះ​ត្រូវ​បាន​បង្កើត​ឡើង​ដោយសកម្ម​ជន​ដែល​ជាអតីត​អ្នក​ត្រួត​ពិនិត្យពន្ធដារ​ម្នាក់​ គឺ​លោក​ Arvind Kejriwal ដែលបាន​ចាប់​ផ្តើមប្រឡូក​ក្នុង​ឆាក​នយោបាយ​ជាលើក​ដំបូង​កាល​ពី​ឆ្នាំ​ទៅ​មិញ​នៅ​ទីក្រុង​ដេលី​ ក៏ប៉ុន្តែ​បាន​ដក​ខ្លួន​វិញ​បន្ទាប់​ពី​ចាប់​ផ្តើម​ដំណើរ​ការ​បាន​មួយ​រយៈ​ពេល​ខ្លី​មក​ ដោយសារ​តែ​មិន​ទទួល​បាន​មតិ​ភាគ​ច្រើន។ លោក​ត្រូវ​បាន​បណ្តេញ​ចេញ​ដោយ​ចោទ​ថា​ «ជា​អ្នក​បង្ក​ចលាចល»​ និង​គ្មាន​ភាពក្លាហាន​សម្រាប់​អភិបាល​កិច្ច។ កិច្ច​ខិត​ខំ​ប្រឹង​ប្រឹង​របស់​គណបក្ស​នេះ​ក្នុង​ការ​បង្ហាញ​វត្តមាន​ថ្នាក់​ជាតិ​ក៏​បានដួល​រលំ​ផង​ដែរ​ ហើយ​មនុស្ស​ភាគ​ច្រើន​គិត​ថា​ គណបក្ស​នះ​គ្មាន​អនាគត​ទេ។

ក៏​ប៉ុន្តែ​ ការ​ត្រឡប់​មក​វិញ​របស់​លោក​ Kejriwal​ ដ៏​គួរ​ឲ្យ​ភ្អាក់​ផ្អើល​នោះ​ ត្រូវ​គេ​មើល​ឃើញ​ថា​ជាការ​ចង់​បាន​ដូច​ការ​សន្យា​ដែល​លោកបាន​ប្រកាន់​ខ្ជា​ប់ នោះ​គឺ​ការ​ផ្តោត​ការ​យក​ចិត្ត​ទុក​ដាក់​ជាង​មុន​ទៅ​លើ​នយោបាយ​សម្រាប់​អ្នក​ដែល​ស្ថិត​នៅ​ក្រោម​បន្ទាត់​នៃ​ការ​រស់​នៅ​សមរម្យនិង​លើ​នយោបាយ​ស្អាត​ស្អំ​ជាង​មុន​។ ការ​សន្យា​ជា​ច្រើន​របស់​គណបក្ស​លោក​ មាន​ដូច​ជា​ការ​ប្រើ​ប្រាស់​ទឹក​ដោយ​ឥតគិត​ថ្លៃ​ តម្លៃ​អគ្គិសនី​ទាប​ បង្កើន​ចំ​នួន​សាលារៀន​ តម្លៃ​លំនៅដ្ឋាន​ដែល​ពលរដ្ឋ​អាច​មាន​លទ្ធភាព​បង់ថ្លៃ ​និង​ការ​ប្រើប្រាស់​វ៉ាយហ្វាយ(អ៊ីនធឺណិត)​ដោយ​ឥតគិតថ្លៃ។

លោក​ Sanjay Kumar ​នាយកមជ្ឈមណ្ឌល​អភិវឌ្ឍសង្គមក្នុង​ទីក្រុង​ញ៉ូវ​ដេលី​មាន​ប្រសាសន៍​ថា​ គណបក្ស​ជាតិ​ផ្សេងៗត្រូវ​តែ​មាន​ការ​ប្រុង​ប្រយ័ត្ន។

លោក​មាន​ប្រសាសន៍​ថា៖ «ខ្ញុំ​គិត​ថា​ នៅ​ពេល​នេះ​គណបក្ស​នយោបាយ​ទាំង​ឡាយ​គួរ​តែ​មាន​ការ​ប្រុង​ប្រយ័ត្ន​ខ្ពស់​ ហើយ​ពួក​គេ​គួរ​តែ​ព្យាយាម​កែលម្អ។ មិន​ត្រូវ​ពឹង​ផ្អែក​លើ​តែការ​ចង​សម្ព័ន្ធភាព​ទេ​ តែ​ខ្ញុំ​គិត​ថា​ គួរ​គិត​អំពី​ការ​ជ្រើស​រើស​យក​បញ្ហា​ដែល​មាន​ជាប់​ពាក់​ព័ន្ធ​នឹង​ជីវិត​ប្រចាំ​ថ្ងៃ​របស់​ប្រជាជន​បន្ថែម​ទៀត»​។

ក្រោយ​ពី​បាន​ទទួល​ជ័យ​ជម្នះ​ដ៏​មហិមា​រួច​មក​ មេ​ដឹក​នាំ​គណបក្ស​ Aam Aadmi​ លោក​ Yogendra Yadav បាន​មាន​ប្រសាសន៍​ថា​ នឹង​មាន​ការ​ពន្លឿន​ការ​យក​ចិត្ត​ទុក​ដាក់​ផ្ទាល់​ចំពោះ​តម្រូវ​ការ​ចាំបាច់​បំផុត​របស់​អ្នក​ក្រី​ក្រ ​ដូច​ជា​សាលារៀន​សម្រាប់​កូនៗ​របស់​ពួក​គេ​ និង​ការ​ថែទាំ​សុខភាព។

លោក​បាន​បន្ត​ថា៖​ «មាន​សាលា​រៀន​ចំនួន​២២០ត្រូវ​បាន​បង្កើត​ឡើង​ ដែល​ពី​មុន​មក​មិន​ដែល​មាន​ទេ។ មានមន្ទីរ​ពេទ្យ​ជា​ច្រើន​ត្រូវ​បាន​ចាប់​ផ្តើម​សាង​សង់ ក៏​ប៉ុន្តែ​យើង​នៅ​រង់​ចាំ​ការ​បើក​សម្ពោធ​នៅ​ឡើយ​ ឬ​រង់​ចាំ​ការ​បញ្ចប់​គ្រប់​ជ្រុង​ជ្រយដោយ​មាន​អ្នក​ណា​ម្នាក់​ត្រូវ​កាន់​ការ​ងារ​ទាំង​នោះ។ ដូច្នេះ​ យើង​មាន​អ្វី​ៗ​ជា​ច្រើន​ដែល​ងាយ​សម្រេច​បាន។»

គណបក្ស​នេះ​ ដែល​កើត​ចេញ​ពី​ក្រុម​ផ្សេងៗ​ដូច​ជា​ក្រុម​អ្នក​មាន​អាជីព​វ័យ​ក្មេង​ដ៏​ស្វាហាប់​ ក្រុម​បញ្ញវ័ន្ត​ ក្រុម​សកម្មជន​និង​និស្សិត​ ក៏កំពុង​តែ​សន្យា​ឲ្យ​មាន​វប្បធម៌​នយោបាយ​ជម្រើស​មួយ​ផ្សេង​ទៀត​ផង​ដែរ។ នៅ​ក្នុង​ទី​ក្រុង​មួយ​ដែល​រដ្ឋ​មន្រ្តីនិង​មេដឹក​នាំ​រស់​នៅ​ក្នុងអាគារ​បង់ហ្គាឡូ​ដ៏​ទូលាយ​ ហើយ​ថែម​ទាំង​មានក្រុម​ការ​ពារ​សន្តិសុខ​ជា​ច្រើន​នាក់​នោះ​ លោក​ Kejriwal​ ប្តេជ្ញា​ថា​នឹង​ធ្វើ​អ្វី​គ្រប់​យ៉ាង​ដើម្បី​បញ្ចប់​អ្វី​ដែល​លោក​ហៅ​ថា​«វប្បធម៌​វីអាយ​ភី»​របស់​ពួក​វីរជន​នៃ​គណបក្ស​កាន់​អំណាច។

លោក​ Sanjay Kumar​ និយាយ​ថា​ គណបក្ស​ Aam Aadmi ​ឈរ​ដាច់​ចេញ​ពី​គណបក្ស​ភាគ​ច្រើន​ដទៃ​ទៀត ដែលជា​ញឹក​ញាប់​ត្រូវ​គេ​មើល​ឃើញ​ថា​ ជា​ក្រុម​អ្នក​មាន​ឋានៈ​ខ្ពង់​ខ្ពស់​និង​មាន​គម្លាត​ឆ្ងាយ​ពី​ប្រជាជន​សាមញ្ញ។ ក៏​ប៉ុន្តែ​លោក​បន្ថែម​ថា​ មាន​ការ​សម្រប​សម្រួល​ខ្លះ​ត្រូវ​បាន​គេ​ធ្វើ​ឡើង​កន្លង​មក។

លោក​បាន​បន្ត​ថា៖​ «នយោបាយ​ស្អាត​ស្អំ​សំដៅ​លើ​នយោបាយ​ដែលបេក្ខជន​មាន​ភាព​ស្អាត​ស្អំ​ មាន​តម្លា​ភាព​ក្នុង​រឿង​នយោបាយ​ មាន​ការ​ប្រើប្រាស់​ថវិកា​តិច​ មិន​ប្រើ​ប្រាស់​ប្រាក់​ខុស​ច្បាប់​ក្នុង​រឿង​នយោបាយ​ ហើយ​ពួក​គេ​គិត​ថា នេះ​ជា​អ្វី​ដែល​ពួក​គេ​នឹង​ផ្តល់​ឲ្យ​នៅ​ក្នុង​នយោបាយ​ជម្រើស​ផ្សេង​របស់​ពួក​គេ។ នៅ​ក្នុង​ការ​បោះឆ្នោត​នេះ​ ពួក​គេ​បាន​ចេញ​ឆ្ងាយពី​ចំណុច​ទាំង​នេះ​បន្តិច​រួច​ហើយ។ មាន​សំនួរ​ត្រូវ​បាន​គេ​លើក​ឡើង​ទាក់​ទិន​នឹង​បេក្ខជន​របស់​ពួក​គេ​ និង​អំពី​ប្រាក់​ដែលគណបក្ស​ Aam Aadmi​ បាន​ចំណាយ​ បើ​ទោះ​បី​ជា​វា​មាន​ចំនួន​តិច​តួច​ជាង​ការ​ចំណាយ​របស់គបណបក្ស​ BJP​ ច្រើន​ក៏ដោយ។ ពួក​គេ​មិន​អាច​និយាយ​ថា​ ពួក​គេ​ខ្វះ​ប្រាក់​នោះ​ទេ​ជា​ដើម។ល។»

អ្នក​ឃ្លាំ​មើល​នយោបាយ​បាន​និយាយ​ថា​ ជ័យ​ជម្នះ​គួរ​ឲ្យ​កត់​សម្គាល់នៅ​ទីក្រុង​ដេលី​របស់​គណបក្ស​នេះ​ អាច​បញ្ឆេះ​ឡើង​វិញ​នូវ​មហិច្ឆតា​ថ្នាក់​ជាតិ​របស់​ខ្លួន​និង​ជំរុញ​ឲ្យ​មាន​ការ​ចាប់​ផ្តើម​នៅ​ក្នុង​ទីក្រុង​ឯ​ទៀតៗ​។ ជា​ការ​ចាប់​ផ្តើម​ នេះ​ជា​ការ​កំពុង​តែ​សម្លឹង​មើល​លើ​ទីក្រុង​បច្ចេក​វិទ្យា​របស់​ឥណ្ឌា​គឺ​ទីក្រុង​ Bangalore​ ជា​ទី​ដែល​ការ​បោះ​ឆ្នោត​ថ្នាក់​មូល​ដ្ឋាន​គ្រោង​នឹង​កើត​មាន​ឡើង​ក្នុង​ខែ​មេសា។

ក៏ប៉ុន្តែ​ ក្រុម​អ្នក​វិភាគ​បាន​ព្រមាន​ថា​ ជា​ដំបូង​ គណបក្ស​នេះ​ត្រូវ​តែ​ព្យាយាម​ដោះស្រាយ​ការ​រំពឹង​ទុក​ដ៏​ធំ​ ដែល​ខ្លួន​បាន​ដាស់​ឲ្យ​មាន​ឡើង​ក្នុង​ចិត្ត​នៃ​ពលរដ្ឋនៅ​ទីក្រុង​ដេលី។

ពលរដ្ឋ​ទាំង​នោះ​ជា​មនុស្ស​មួយ​ចំនួន​ដូច​ជា​ Harsh Singh​ ​ដែល​ជា​អ្នក​ទទួលបាន​ការ​បន្ត​ប័ណ្ណ​បើក​បរ​របស់​ខ្លួន​ដោយ​មិន​ចាំ​បាច់​ចំណាយ​ប្រាក់​សូក​ប៉ាន់​ក្នុង​អំឡុង​ពេល​ដែល​បក្ស​នេះ​បាន​កាន់​អំណាច​កាល​ពី​ឆ្នាំ​មុន។ រឿង​នេះ​ហើយ​ដែល​ធ្វើ​ឲ្យ​លោក​មាន​សុទិដ្ឋិនិយម។

លោក​បាន​និយាយ​ថា​ នេះ​ជា​បក្ស​ដែល​ស្មោះ​ត្រង់​ហើយ​អាច​ដោះ​ស្រាយ​បញ្ហា​អំពើ​ពុករលួយ​ដែល​យើង​ជួប​ប្រទះ​ជា​រៀង​រាល់​ថ្ងៃ។ លោក​បន្ថែម​ថា​ លោក​មាន​សង្ឃឹម​ថា​ពួក​គេ​អាច​ផ្លាស់​ប្តូរ​សង្គម​បាន។

អំឡុង​ពេល​ប្រាំ​ឆ្នាំ​ទៅ​មុខ​ គឺ​ជា​រយៈ​ពេល​សំខាន់​មួយ​សម្រាប់​គណបក្ស​នេះ​ ដែល​ត្រូវ​រក​ឲ្យ​បាន​នូវ​ធន​ធាន​ដើម្បី​ផ្តល់​ជា​គ្រឿងសម្រួល​ដល់​អ្នក​ក្រី​ក្រ​ដូច​ដែល​ខ្លួន​បាន​សន្យា​ បំពេញ​តាម​ការ​សន្យា​ថា​នឹង​ជា​រដ្ឋាភិបាល​ស្អាត​ស្អំ​ និង​ជម្នះ​លើ​ក្រុម​អ្នក​ដែល​មាន​មន្ទិល​សង្ស័យ​ ដោយ​បញ្ជាក់​ថា​បក្ស​នេះ​អាច​ឋិត​ឋេរ​នៅ​លើ​ឆាក​នយោបាយ៕

ប្រែសម្រួលដោយ នៀម ឆេង

XS
SM
MD
LG