កាលពីថ្ងៃច័ន្ទ ក្រុមមេដឹកនាំនៃប្រទេសឥណ្ឌានិងប្រទេសស្រីលង្កាបានធ្វើការចរចាគ្នាអំពីបញ្ហាមួយចំនួនធំមានគោលដៅពង្រឹងទំនាក់ទំនងយុទ្ធសាស្ត្ររបស់ពួកគេ បង្កើនពាណិជ្ជកម្មនិងដោះស្រាយជម្លោះយូរយាមកហើយរវាងប្រទេសទាំងពីរ។
លោកនាយករដ្ឋមន្ត្រីឥណ្ឌា Narendra Modi និងលោក Maithripala Sirisena ប្រធានាធិបតីជាប់ឆ្នោតថ្មីនៃប្រទេសស្រីលង្កាបានចុះហត្ថលេខាលើកិច្ចព្រមព្រៀងមួយអំពីសុវត្ថិភាពបរមាណូដែលត្រូវបានសរសើរថាជា«ឱកាសមួយមិនធ្លាប់មានពីពេលមុនៗ»ដើម្បីលើកតម្កើងចំណងទាក់ទងគ្នាទៅឈានកាន់កម្រិតថ្មីមួយនិងជាសក្ខីភាពមួយនៃការទុកចិត្តគ្នាទៅវិញទៅមករវាងប្រទេសជិតខាងទាំងពីរនេះ។
លោក Modi និងលោក Sirisena បានយល់ស្របគ្នាអំពីរបៀបដោះស្រាយមួយ «ប្រកបដោយការស្ថាបនានិងមនុស្សធម៌»ដើម្បីដោះស្រាយបញ្ហាអ្នកនេសាទត្រីរបស់ពួកគេ។ ជាញឹកញយ ពួកអ្នកនេសាទមកពីប្រទេសទាំងពីរនេះត្រូវបានចាប់ខ្លួនដោយសារបានចូលទៅក្នុងដែនទឹកនៃប្រទេសនីមួយៗ។
លោក Sirisena បានសម្តែងសេចក្តីសង្ឃឹមថា មិត្តភាពជាថ្មីនេះនឹងផ្តល់អត្ថប្រយោជន៍ទៅវិញទៅមកនៅក្នុងការពង្រឹងទំនាក់ទំនងក្នុងមូលដ្ឋាននិងក្នុងកម្រិតអន្តរជាតិផងដែរ។ ប្រទេសទាំងពីរនេះបានចុះហត្ថលេខាលើអនុស្សារណៈស្តីពីកសិកម្ម កិច្ចសហប្រតិបត្តការសេដ្ឋកិច្ច ចំណងទាក់ទងគ្នាខាងវប្បធម៌និងការផ្សាភ្ជាប់គ្នារវាងប្រទេសទាំងពីរ។
លោក Sirisena និងលោកស្រី Jayanthi Pushpa Kumari ជាភរិយាលោកបានដាក់កម្រងផ្កានៅឯកន្លែងអនុស្សារីយ៍លោក Mahatma Gandhi ឥស្សរជនសន្តិភាពឥណ្ឌា៕
