អាជ្ញាធរប៉ូលិសឥណ្ឌាបាននិយាយថា ខ្លួនបានបាញ់សម្លាប់ Vikas Dubey ដែលជាជនសង្ស័យពាក់ព័ន្ធនឹងបទឧក្រិដ្ឋដ៏សាហាវព្រៃផ្សៃ។ ជននេះត្រូវអាជ្ញាធរតាមចាប់ខ្លួនពីបទទាក់ទងនឹងបទឧក្រិដ្ឋយ៉ាងតិចចំនួន៦០ករណី រួមទាំងការសម្លាប់មន្ត្រីប៉ូលិសចំនួន៨នាក់ផងដែរ។
ក្រុមមន្ត្រីនិយាយថា Vikas Dubey បានប្រគល់ខ្លួនដល់ប៉ូលិសនៅទីក្រុងយូចេន ភាគកណ្តាលកាលពីថ្ងៃព្រហស្បតិ៍បន្ទាប់ពីមានការតាមស្វែងរកចាប់ខ្លួនអស់ពេល១សប្តាហ៍។ ក្រុមអាជ្ញាធរបាននិយាយថា ប៉ូលិសបាននាំខ្លួនជនសង្ស័យតាមរថយន្តទៅកាន់តំបន់កាន់ពួរ ស្ថិតនៅភាគខាងជើងរដ្ឋ Uttar Pradesh កាលពីថ្ងៃសុក្រ។ នៅពេលរថយន្តបុកគ្នា បានធ្វើឱ្យឌូបេ លួចយកកាំភ្លើងខ្លីប៉ូលិស ហើយព្យាយាមរត់គេចខ្លួន នៅមុនពេលត្រូវបាញ់សម្លាប់ដោយក្រុមមន្ត្រីប៉ូលិស។
ក្រុមមេដឹកនាំនយោបាយ និងសកម្មជនសិទ្ធិមនុស្សបានសួរនាំអំពីការបង្កើតព្រឹត្តិការណ៍របស់ប៉ូលិស ហើយចោទប្រកាន់ថា ប៉ូលិសប្រព្រឹត្តការសម្លាប់ក្រៅច្បាប់។ ឌូបេត្រូវគេជឿថា មានទំនាក់ទំនងជាមួយក្រុមអ្នកនយោបាយក្នុងរដ្ឋ និងប៉ូលិសជាច្រើន ដែលក្រុមសកម្មជនសិទ្ធិមនុស្សជឿថាគេសម្លាប់ឌូបេ ដើម្បីកុំឱ្យមានការបង្ហាញពីខ្សែរយ:ទាក់ទងទាំងនោះ។
ទីភ្នាក់ងារព័ត៌មាន អេភី បានរាយការណ៍ថា មានមន្ត្រីប៉ូលិសចំនួន២នាក់ត្រូវចាប់ខ្លួននៅសប្តាហ៍នេះពីបទចោទប្រកាន់ថា បានលួចផ្តល់ដំណឹងដល់ឌូបេ អំពីការចុះចាប់ខ្លួនរបស់ប៉ូលិសនៅផ្ទះឌូបេ កាលពីថ្ងៃទី៣ ខែកក្កដា៕
