អាជ្ញាធរឥណ្ឌាកំពុងបង្កើនកិច្ចខំប្រឹងប្រែងនៅក្នុងការស៊ើបអង្កេតនិងធ្វើការចោទប្រកាន់ប្រឆាំងនឹងជនជាតិឥណ្ឌាណាដែលត្រូវបានចោទប្រកាន់ថា មានជាប់ពាក់ព័ន្ធទៅនឹងក្រុមរដ្ឋឥស្លាម។ ចំណាត់ការនេះបានធ្វើឡើង បន្ទាប់ពីមានការវាយប្រហារគ្រាប់បែកកាលពីខែមេសានៅក្នុងប្រទេសស្រីលង្កា ដែលជាប្រទេសជិតខាងរបស់ឥណ្ឌា ដោយបានសម្លាប់មនុស្ស២៥៩នាក់ និងធ្វើឲ្យមនុស្សរាប់រយនាក់ទៀតរងរបួស។ នេះបើយោងតាមមន្រ្តីឥណ្ឌា។
ដើម្បីអាចសម្រេចបានតាមគោលដៅនេះ រដ្ឋសភាឥណ្ឌាបានធ្វើវិសោធនកម្មច្បាប់មួយចំនួន ដើម្បីផ្តល់អំណាចបន្ថែមទៀតដល់ទីភ្នាក់ងារស៊ើបអង្កេតជាតិហៅកាត់ថា NIA ដើម្បីកាត់ទោសបុគ្គលណាដែលត្រូវបានកំណត់ថាជាភេរវជន។
កាលពីសប្តាហ៍មុន ប្រទេសឥណ្ឌាបានអនុម័តសំណើវិសោធនកម្មច្បាប់នៅក្នុងសភាជាន់ខ្ពស់ បន្ទាប់ពីមានការប្រឆាំងពីគណបក្សនយោបាយនានានៅក្នុងសភាទាំងពីរថ្នាក់។ រដ្ឋមន្រ្តីក្រសួងមហាផ្ទៃឥណ្ឌាលោក Amit Shah មកពីគណបក្សកាន់អំណាច Bharatiya Janata បានថ្លែងថា ការអនុម័តសំណើរវិសោធនកម្មច្បាប់ស្តីពីការទប់ស្កាត់សកម្មភាពខុសច្បាប់នេះ គឺជាការចាំបាច់ដើម្បីធ្វើយ៉ាងណាឲ្យទីភ្នាក់ងារអនុវត្តច្បាប់នៅតែអាចនាំមុខក្រុមភេរវកម្មបាន។
លោក Shah បាននិយាយទៅកាន់សមាជិកសភាថា «វាមានសារៈសំខាន់ណាស់ក្នុងការកំណត់ថាបុគ្គលណាជាភេរវជន ហើយភ្លាមៗយើងអាចទប់ស្តាក់ពួកគេបាននៅពេលដែលពួកគេចាប់ផ្តើមបង្កើតអង្គការថ្មី»។
ក្រុមអ្នកជំនាញមើលឃើញថា វិសោធនកម្មថ្មីនេះគឺជា ការត្រួសត្រាយផ្លូវឲ្យអាជ្ញាធរកាត់ទោសប្រជាពលរដ្ឋ ចាប់ខ្លួនមនុស្សដោយយកហេតុផលថា មានជាប់ពាក់ព័ន្ធជាមួយនឹងអ្នកដាក់គ្រាប់បែកនៅក្នុងប្រទេសស្រីលង្កា និងចោទប្រកាន់ថាមានជាប់ពាក់ព័ន្ធនឹងក្រុមភេរវកម្មផ្សេងៗទៀត៕
