កាលពីថ្ងៃចន្ទទី១១ខែមីនា រដ្ឋាភិបាលរបស់លោកនាយករដ្ឋមន្ត្រី Narendra Modi បានប្រកាសបទបញ្ញត្តិសម្រាប់អនុវត្តច្បាប់សញ្ជាតិឆ្នាំ២០១៩ដែលផាត់ក្រុមអ្នកកាន់សាសនាអ៊ិស្លាម ក្នុងពេលប៉ុន្មានសប្តាហ៍មុនមេដឹកនាំជាតិនិយមហិណ្ឌូរូបនេះឈរឈ្មោះបោះឆ្នោតសម្រាប់អាណត្តិទីបី។
ច្បាប់ត្រូវកែប្រែអំពីសញ្ជាតិផ្តល់ដំណើរការលឿនដល់ការចូលសញ្ជាតិសម្រាប់ក្រុមហិណ្ឌូ Parsis, Sikhs, អ្នកកាន់ព្រះពុទ្ធសាសនា, Jains និងអ្នកគោរពគ្រិស្តសាសនា ដែលបានរត់គេចខ្លួនទៅកាន់ប្រទេសឥណ្ឌាមានប្រជារាស្ត្រភាគច្រើនជាអ្នកកាន់សាសនាហិណ្ឌូ មកពីប្រទេសអាហ្វហ្កានីស្ថាន បង់ក្លាដែសនិងប៉ាគីស្ថាន មុនថ្ងៃទី៣១ ខែធ្នូ ឆ្នាំ២០១៤។ ច្បាប់នេះផាត់ចោលក្រុមអ្នកកាន់សាសនាអ៊ិស្លាមដែលជាជនភាគច្រើនក្នុងប្រទេសទាំងបីនេះ។
សភាឥណ្ឌាបានអនុម័តច្បាប់នេះកាលពីឆ្នាំ២០១៩ តែរដ្ឋាភិបាលលោក Modi មិនបានអនុវត្តច្បាប់នេះទេ ក្រោយមានបាតុកម្មដ៏ប្រល័យក្នុងរដ្ឋធានីញូវដែលីនិងកន្លែងឯទៀតៗ។ មនុស្សច្រើននាក់ត្រូវបានសម្លាប់នៅពេលមានការប៉ះទង្គិចគ្នាច្រើនថ្ងៃ។
បាតុកម្មនៅទូទាំងប្រទេសកាលពីឆ្នាំ២០១៩មានការចូលរួមរបស់មនុស្សកាន់សាសនាទាំងអស់ដែលបាននិយាយថា ច្បាប់នេះធ្វើឱ្យអន្តរាយដល់គ្រឹះនៃប្រទេសឥណ្ឌាជាប្រទេសជាតិមួយមិនយកសាសនាជាធំ។ ក្រុមអ្នកកាន់សាសនាអ៊ិស្លាមព្រួយបារម្ភជាពិសេសថារដ្ឋាភិបាលអាចប្រើច្បាប់នេះ រួមផ្សំជាមួយការចុះឈ្មោះពលរដ្ឋនៅទូទាំងប្រទេស ដើម្បីផាត់ចោលពួកគេ។
ការចុះឈ្មោះពលរដ្ឋនៅទូទាំងប្រទេសជាផ្នែកមួយនៃការប្រឹងប្រែងរបស់រដ្ឋាភិបាលលោក Modi ដើម្បីរកអត្តសញ្ញាណមនុស្សដែលខ្លួនអះអាងថា បានមកប្រទេសឥណ្ឌាដោយខុសច្បាប់។ ការចុះឈ្មោះនេះត្រូវបានអនុវត្តតែក្នុងរដ្ឋ Assam នាប៉ែកឦសានប្រទេស។ គណបក្ស Bharatiya Janata គ្រប់គ្រងប្រទេសបានសន្យាធ្វើការផ្ទៀងផ្ទាត់សញ្ជាតិនៅទូទាំងប្រទេស។
រដ្ឋាភិបាលលោក Modi បានការពារច្បាប់សញ្ជាតិឆ្នាំ២០១៩ថាជាកាយវិការមនុស្សធម៌។ រដ្ឋាភិបាលនេះនិយាយបង្ហាញហេតុផលថា ច្បាប់នេះសម្រាប់ផ្តល់សញ្ជាតិដល់ក្រុមអ្នកកាន់សាសនាភាគតិចដែលរត់គេចខ្លួនពីការធ្វើទុក្ខបុកម្នេញ ហើយនឹងមិនត្រូវប្រើប្រឆាំងនឹងពលរដ្ឋឥណ្ឌាទេ។
រដ្ឋមន្ត្រីមហាផ្ទៃលោក Amit Shah បានសរសេរតាម X អតីត Twitter ថា៖ «បទបញ្ញត្តិទាំងនេះនឹងអាចឱ្យក្រុមជនភាគតិចដែលត្រូវបានធ្វើទុក្ខបុកម្នេញខាងសាសនាក្នុងប្រទេសប៉ាគីស្ថាន បង់ក្លាដែសនិងអាហ្វហ្កានីស្ថានទទួលសញ្ជាតិនៅក្នុងប្រទេសយើង»។
គណបក្សសមាជដែលជាគណបក្សប្រឆាំងធំជាងគេនៅឥណ្ឌាបានសាកសួរអំពីសេចក្តីប្រកាសនេះ ដោយនិយាយថា «ការកំណត់ពេលចេញសេចក្តីប្រកាសនេះមុនការបោះឆ្នោតមានគោលដៅធ្វើឱ្យមានការបែកបាក់គ្នានៅពេលបោះឆ្នោត»។
នៅក្នុងសេចក្តីថ្លែងការណ៍មួយ អង្គការឃ្លាំមើលសិទ្ធិមនុស្ស Amnesty India បានហៅច្បាប់នេះថា «រើសអើង» ហើយថា វា«ប្រឆាំងនឹងគុណតម្លៃរដ្ឋធម្មនុញ្ញនៃសមភាពនិងច្បាប់សិទ្ធិមនុស្សអន្តរជាតិ»។ អង្គការនេះបានថ្លែងថា ច្បាប់នេះ«ធ្វើឱ្យការរើសអើងក្លាយជាត្រឹមត្រូវតាមច្បាប់ផ្អែកលើសាសនា» ហើយមាន«ភាពផ្តាច់ការក្នុងទម្រង់និងចេតនា»។
នៅឥណ្ឌាមានអ្នកកាន់សាសនាអ៊ិស្លាម២០០លាននាក់ដែលជាក្រុមជនភាគតិចធំមួយនៅក្នុងប្រទេសនេះ ដែលមានប្រជារាស្ត្រជាង១.៤០០លាននាក់។ ពួកគេរស់នៅសឹងតែក្នុងផ្នែកទាំងអស់របស់ប្រទេសឥណ្ឌាហើយជាទីដៅនៃការវាយប្រហារមួយចំនួននៅពេលលោក Modi ឡើងកាន់អំណាចដំបូងនៅឆ្នាំ២០១៤។
ពួកអ្នករិះគន់ថា ភាពស្ងាត់ស្ងៀមរបស់លោក Modi អំពីអំពើហិង្សាប្រឆាំងនឹងអ្នកកាន់សាសនាអ៊ិស្លាមបានធ្វើឱ្យអ្នកគាំទ្រជ្រុលនិយមបំផុតរបស់លោកខ្លះហ៊ានហើយនាំឱ្យមានសុន្ទរកថាសម្អប់ច្រើនជាងមុនប្រឆាំងនឹងអ្នកគោរពសាសនាអ៊ិស្លាមផងដែរ។
លោក Modi បានបញ្ចូលសាសនាជាមួយនយោបាយច្រើនជាងមុននៅក្នុងរូបមន្តមួយដែលទាក់ចិត្តខ្លាំងដល់ប្រជារាស្ត្រកាន់សាសនាហិណ្ឌូភាគច្រើននៅឥណ្ឌា។ កាលពីខែមករា លោកបានសម្ពោធព្រះវិហារហិណ្ឌូមួយនៅកន្លែងវិហារអ៊ិស្លាមមួយដែលត្រូវបានកម្ទេចក្នុងក្រុង Ayodhya នាប៉ែកខាងជើងប្រទេស ដោយបំពេញតាមការសន្យាមួយយូរមកហើយរបស់គណបក្សលោក។
ការស្ទង់មតិភាគច្រើនបង្ហាញថា លោក Modi នឹងឈ្នះឆ្នោតមានសំឡេងភាគច្រើនក្នុងការបោះឆ្នោតទូទៅមានកំណត់នឹងធ្វើនៅខែឧសភា៕
ប្រែសម្រួលដោយលោក ឈឹម សុមេធ
