នាវាចម្បាំងរបស់ឥណ្ឌាបានធ្វើសមយុទ្ធយោធារួមគ្នាមួយជាមួយនឹងនាវាចម្បាំងរបស់សហរដ្ឋអាមេរិកនៅក្នុងមហាសមុទ្រឥណ្ឌា។ នេះបើយោងតាមការបញ្ជាក់របស់ប្រទេសទាំងពីរ។
សមយុទ្ធយោធាដែនសមុទ្រនេះគឺដើម្បីបង្ហាញពីកិច្ចសហប្រតិបត្តិការយុទ្ធសាស្ត្រដែលកាន់តែប្រសើរឡើងរវាងរដ្ឋាភិបាលក្រុងញូដេលី និងរដ្ឋាភិបាលក្រុងវ៉ាស៊ីនតោន នៅពេលដែលកាន់តែមានភាពតានតឹងជាមួយនឹងប្រទេសចិន។
សមយុទ្ធយោធានេះត្រូវបានធ្វើឡើងកាលពីថ្ងៃចន្ទ នៅក្បែរកោះ Andaman និងកោះ Nicobar របស់ប្រទេសឥណ្ឌា ដែលស្ថិតនៅក្បែរផ្លូវទឹកដ៏មមាញឹកបំផុតនៅក្នុងពិភពលោក។
ទាហានជើងទឹកឥណ្ឌាបានហៅសមយុទ្ធយោធាកាលពីថ្ងៃចន្ទជាមួយនឹងនាវាដឹកយន្តហោះចម្បាំងរបស់សហរដ្ឋអាមេរិកឈ្មោះ USS Nimitz ថាជាសមយុទ្ធយោធាសម្រាប់សហប្រតិបត្តិការគ្រាមានសង្គ្រាម ឬវិបត្តិមនុស្សធម៌។
រដ្ឋាភិបាលក្រុងវ៉ាស៊ីនតោនបានបញ្ជូននាវាចម្បាំងចំនួនពីរគ្រឿងទៅកាន់សមុទ្រចិនខាងត្បូង ដែលរួមមាននាវាចម្បាំងឈ្មោះ USS Nimitz និង USS Ronald Reagan។ សមុទ្រចិនខាងត្បូងគឺជា ដែនទឹកដែលមានជម្លោះរវាងប្រទេសចិនជាមួយនឹងបណ្ដាប្រទេសជិតខាងដែលតូចជាង។ សហរដ្ឋអាមេរិកបានហៅការទាមទាររបស់ចិននៅសមុទ្រចិនខាងត្បូងថាមិនស្របច្បាប់៕
