វាមិនមែនជាការភ្ញាក់ផ្អើលអ្វីទេដែលពេលខ្លះប្រធានាធិបតីសហរដ្ឋអាមេរិកលោក Donald Trump ធ្វើល្អដាក់ប្រទេសជាសត្រូវរបស់លោកជាងប្រទេសជាសម្ព័ន្ធមិត្តរបស់ខ្លួន។ ប៉ុន្តែវិធីសាស្រ្តចរចាមិនសមរម្យរបស់លោក Trump ហាក់ទំនងបង្ហាញការមិនសប្បាយចិត្តនៅក្នុងប្រទេសកូរ៉េខាងត្បូង ជាពិសេសក្នុងចំណោមក្រុមអភិរក្សនិយមដែលបង្ហាញការរិះគន់កាន់តែខ្លាំងទៅលើមេដឹកសហរដ្ឋអាមេរិករូបនេះ។
នៅប៉ុន្មានសប្តាហ៍ថ្មីៗនេះ មានរឿងបន្តិចបន្តួចកើតឡើង ប៉ុន្តែត្រូវបានគេកត់សម្គាល់ថាជាការប៉ះទង្គិចគ្នាក្នុងចំណោមក្រុមអភិរក្សនិយមកូរ៉េខាងត្បូងដែលជាធម្មតាជាអ្នកគាំទ្រសហរដ្ឋអាមេរិក ខណៈលោក Trump បន្តនិយាយសសើរមេដឹកនាំកូរ៉េខាងជើងលោក Kim Jong Un ប៉ុន្តែបែរជាដាក់សម្ពាធលើរដ្ឋាភិបាលកូរ៉េខាងត្បូងពាក់ព័ន្ធនឹងការចរចាលើវិភាគទានដែលត្រូវចំណាយលើកងទ័ពសហរដ្ឋអាមេរិកនៅកូរ៉េខាងត្បូង។ នេះមិនមែនជាយុទ្ធសាស្រ្តថ្មីនោះទេ។
លោក Trump បានសសើរលោក Kim ដែលជាមិត្តភក្តិរបស់លោកជាងមួយឆ្នាំមកនេះ បន្ទាប់ពីលោកបានព្យាយាមបញ្ចុះបញ្ចូលមេដឹកនាំកូរ៉េខាងជើងរូបនេះ ឲ្យបោះបង់ចោលអាវុធនុយក្លេអ៊ែររបស់ខ្លួន។ ប៉ុន្តែការចរចាបានជាប់គាំងម្តងហើយម្តងទៀត ហើយលោក Kim ចាប់ផ្តើមបង្ករករឿងប្រឆាំងនឹងកូរ៉េខាងត្បូងកាន់តែខ្លាំង ដែលបណ្តាលឲ្យមនុស្សមួយចំនួននៅកូរ៉េខាងត្បូងអស់ការអត់ធ្មត់។ កាលពីដើមខែនេះ ក្រុមសកម្មជនសិទ្ធិមនុស្សកូរ៉េខាងត្បូងបានរិះគន់លោក Trump ថាព្រងើយកន្តើយនឹងការរំលោភសិទ្ធិមនុស្សនៅកូរ៉េខាងជើង ហើយស្របពេលជាមួយគ្នានោះ លោក Trump បាននិយាយសសើរលោក Kim ថាជាមេដឹកនាំមានទស្សនៈវិស័យអស្ចារ្យសម្រាប់ប្រទេសរបស់លោក។
ពួកអ្នកអភិរក្សនិយមមួយចំនួនបានលើកឡើងពីក្តីបារម្ភថា លោក Trump កំពុងទុកពេលច្រើនហួសហេតុបណ្តោយឲ្យលោក Kim ផលិតអាវុធនុយក្លេអ៊ែរ ដោយលោកនិយាយថាលោកគ្មានបញ្ហាជាមួយនឹងការបាញ់គ្រាប់មីស៊ីលផ្លោងរបស់កូរ៉េខាងជើងទេ បើទោះបីជាគ្រាប់មីស៊ីលរយៈចម្ងាយជិតអាចបាញ់ដល់គ្រប់កន្លែងក្នុងប្រទេសកូរ៉េខាងត្បូងយ៉ាងណាក៏ដោយ៕
