ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ Lee Teng-hui​ អតីត​ប្រធានាធិបតី​តៃវ៉ាន់​ត្រូវ​គេ​ហៅ​ថា​«លោក​ប្រជាធិបតេយ្យ»​នៅ​ពិធី​បុណ្យ​សព​របស់​លោក


​​ប្រធានាធិបតី​តៃវ៉ាន់​លោកស្រី Tsai Ing-wen ថ្លែង​នៅ​ក្នុង​ពិធី​បុណ្យ​សព​​របស់​លោក​ Lee Teng-hui កាលពី​ថ្ងៃសៅរ៍ ទី១៩ ខែកញ្ញា ឆ្នាំ២០២០ នៅក្នុង​​ទៅ​ក្រុងតៃប៉ិ កោះតៃវ៉ាន់។

ថ្លែង​នៅ​ក្នុង​ពិធី​បុណ្យ​សព​នៅ​ឯ​វិហារ​គ្រិស្ត​សាសនា​ក្នុង​សាកល​វិទ្យាល័យ​មួយ​ក្នុង​ក្រុង​តៃបុិ ​​ប្រធានាធិបតី​តៃវ៉ាន់​លោកស្រី Tsai Ing-wen ​បាន​មាន​ប្រសាសន៍​ថា​ លោក​ Lee Teng-hui ​បាន​រៀប​ចំ​ឱ្យ​មាន​កោះ​តៃវ៉ាន់​បច្ចុប្បន្ន​នេះ។​

កោះ​តៃវ៉ាន់​បាន​ធ្វើ​បុណ្យ​សព​លោក​ Lee Teng-hui​ អតីត​ប្រធានាធិបតី​ដែល​គេ​ហៅ​ថា​«លោក​ប្រជា​ធិបតេយ្យ»​ ដោយសារ​លោក​បាន​បញ្ចប់​ការ​គ្រប់គ្រង​ផ្តាច់ការ​ដើម្បី​ឱ្យ​មាន​ការ​បោះឆ្នោត​ដោយ​សេរី និង​ជំរុញ​អត្ត​សញ្ញាណ​របស់​តៃវ៉ាន់​ដាច់​ដោយ​ឡែក​ពី​ប្រទេស​ចិន។ នេះ បើតាម​ការរាយការណ៍របស់​ទីភ្នាក់​ងារ​ព័ត៌មាន​ Reuters កាល​ពី​ថ្ងៃសៅរ៍ ​ទី​១៩​ ខែកញ្ញា​ កន្លង​ទៅ​នេះ។​

ពិធី​បុណ្យ​សព​លោក​ Lee Teng-hui​ បាន​ប្រព្រឹត្ត​ទៅ​នៅ​ពេល​ប្រទេស​ចិន​លេង​ល្បែង​សង្គ្រាម​ដូច​ដែល​ប្រទេស​ចិន​បាន​ធ្វើ​កាល​ពីពេល​លោក​បាន​ជាប់​ឆ្នោត​ជា​មេ​ដឹកនាំ​ប្រជា​ធិបតេយ្យ​ទី​មួយ​នៃ​កោះ​តៃវ៉ាន់​កាល​ពី​ឆ្នាំ​១៩៩៦។​ ចិន​បាន​អះអាង​ថា​ កោះ​នេះ​ជា​ដែនដី​ខ្លួន​ផ្ទាល់។​

លោក ​Lee Teng-hui​ បាន​កាន់​តំណែង​ប្រធានាធិបតី​តៃវ៉ាន់​ពី​ឆ្នាំ​១៩៨៨​ ដល់​ឆ្នាំ​២០០០។​

សកម្មភាព​របស់​លោក​ Lee ​ដែលរឹង​ទទឹង​នឹង​ប្រទេស​ចិន​បំផុត​ បាន​ធ្វើ​ឱ្យ​លោក​ជាប់​ឆ្នោត​ជា​ប្រធានាធិបតី​តាម​លទ្ធិ​ប្រជា​ធិបតេយ្យ​ដំបូង​គេ​នៅ​កោះ​តៃវ៉ាន់​ កាល​ពី​ខែ​មីនា ឆ្នាំ​១៩៩៦​ ដោយ​ទទួល​បាន​ជ័យជម្នះ​ភ្លូក​ទឹក​ភ្លូក​ដី​ ​ក្រោយ​ពេល​៨​ខែ​នៃ​ល្បែង​សង្គ្រាម​បំភិត​បំភ័យ​និង​ការ​បាញ់​សាកល្បង​កាំជ្រួចរបស់​ចិន​ទៅ​ក្នុង​ដែន​សមុទ្រ​នៅ​ជុំវិញ​កោះ​នោះ។​

ព្រឹត្តិ​ការណ៍​ទាំង​នោះ​ បាន​ធ្វើឱ្យ​ប្រទេស​ចិន​និង​កោះ​តៃវ៉ាន់​ជិត​មាន​សង្គ្រាម​ ហើយ​បាន​បណ្តាល​ឱ្យ​ស.រ.អា.​បញ្ជូន​នាវា​ដឹក​យន្តហោះ​មួយ​គ្រឿង​និង​កង​នាវា​ចម្បាំង​អម​ដំណើរ​ទៅ​កាន់​តំបន់​នោះ​ជា​ការ​ព្រមាន​មួយ​ដល់​រដ្ឋាភិបាល​ក្រុង​ប៉េកាំង។

កាល​ពី​ថ្ងៃ​សុក្រ ​ទី​១៨​ ខែកញ្ញា​ ប្រទេស​ចិន​បាន​ធ្វើ​សមយុទ្ធ​នៅ​ច្រក​សមុទ្រ​តៃវ៉ាន់​ដោយ​បាន​បញ្ជូន​យន្តហោះ​ចម្បាំង​១៨​គ្រឿង​ទៅ​រំខាន​កោះ​តៃវ៉ាន់​ ពី​ព្រោះ​រដ្ឋាភិបាល​ប៉េកាំង​ខឹង​នឹង​ទស្សន​កិច្ច​ដោយ​មន្ត្រី​ស.រ.អា.​ជាន់​ខ្ពស់​ម្នាក់​ក្នុង​ក្រុង​តៃបុិ ​ដើម្បី​ចូលរួម​ក្នុង​ពិធី​បុណ្យ​សពលោក ​Lee។​

ថ្លែង​នៅ​ក្នុង​ពិធី​បុណ្យ​សព​នៅ​ឯ​វិហារ​គ្រិស្ត​សាសនា​ក្នុង​សាកល​វិទ្យាល័យ​មួយ​ក្នុង​ក្រុង​តៃបុិ ប្រធានាធិបតី​តៃវ៉ាន់​លោកស្រី Tsai Ing-wen ​បាន​មាន​ប្រសាសន៍​ថា​ លោក​ Lee Teng-hui ​បាន​រៀប​ចំ​ឱ្យ​មាន​កោះ​តៃវ៉ាន់​បច្ចុប្បន្ន​នេះ។​

​ប្រធានាធិបតី​តៃវ៉ាន់​លោកស្រី Tsai Ing-wen ​បាន​មាន​ប្រសាសន៍​ថា៖

«ដោយ​គ្មាន​រារែក​ប្រឈម​នឹង​ឧបសគ្គ​អន្តរជាតិ​ ​លោក​បាន​ដឹកនាំ​ប្រជា​រាស្ត្រ​តៃវ៉ាន់​ដោយ​ប៉ិនប្រសប់​ដោយ​លើក​ស្ទួយ​កិច្ចការ​ទូត​ប្រកប​ដោយ​សាច់ការ។​ កោះ​តៃ​វ៉ាន់​បាន​ក្លាយ​ទៅ​ជា​និមិត្តរូប​នៃ​លទ្ធិ​ប្រជា​ធិបតេយ្យ​ ហើយ​បាន​ធ្វើ​ចលនា​យ៉ាង​លឿន​តាម​ទិស​ដៅ​ថ្មី​មួយ​លើ​ឆាក​អន្តរជាតិ។​ ដោយសារ​ស្នាដៃ​ទាំង​នេះ​ លោកប្រធានាធិបតី Lee ​បាន​ត្រូវ​គេ​ឲ្យ​រហ្សសនាម​ថា​ លោក​ប្រជា​ធិបតេយ្យ»។​

លោកស្រី​ប្រធានាធិបតី​តៃវ៉ាន់​ Tsai Ing-wen​ បាន​មាន​ប្រសាសន៍​ទៀត​ថា៖​

«ដោយសារ​កិច្ច​ខិតខំ​ប្រឹង​ប្រែង​របស់​លោក​ ​នៅ​ពេល​នេះ​ កោះ​តៃវ៉ាន់ ​បញ្ចេញ​រស្មី​នៃ​លទ្ធិ​ប្រជា​ធិបតេយ្យ»។​

លោក​ Lee Teng-hui​ ដែល​ជា​អ្នក​គោរព​គ្រិស្ត​សាសនា​ហ្មត់ចត់ បាន​ទទួល​អនិច្ច​កម្ម​កាលពី​ខែ​កក្កដា ​ក្នុង​ជន្មាយុ​៩៧​ឆ្នាំ។

លោក ​Keith Krach ​អនុរដ្ឋមន្ត្រី​ស.រ.អា.​ទទួល​បន្ទុក​កិច្ចការ​សេដ្ឋកិច្ច​ និង​អតីត​នាយក​រដ្ឋមន្ត្រី​ជប៉ុនលោក ​Yoshiro Mori ​បាន​ចូល​រួម​ក្នុង​ពិធី​បុណ្យ​សព​លោក​ដែរ។​

សព​លោក​ Lee ​នឹង​ត្រូវ​បញ្ចុះ​ក្នុង​កន្លែង​បញ្ចុះ​សព​យោធា​មួយ​នៅ​ខែ​ក្រោយ៕​

ប្រែសម្រួល​ដោយ​លោក​ ឈឹម​ សុមេធ

តួលេខនៃករណីឆ្លងជំងឺកូវីដ១៩

XS
SM
MD
LG