នៅថ្ងៃអង្គារនេះ កោះតៃវ៉ាន់បានទាមទារឱ្យប្រទេសចិន «ដកខ្លួន» និងបានចោទប្រកាន់ចិនថាបានគំរាមកំហែងដល់សន្តិភាព បន្ទាប់ពីមន្ត្រីរដ្ឋាភិបាលក្រុងប៉េកាំងម្នាក់បានច្រានចោលព្រំដែនសមុទ្រដែលមានការគោរពជាទូទៅ ក្រោយពីមានការលុកលុយចូលក្នុងព្រំដែន [របស់តៃវ៉ាន់] កាលពីពេលថ្មីៗនេះមក។
រដ្ឋមន្ត្រីការបរទេសតៃវ៉ាន់លោក Joseph Wu បានទទូចឱ្យរដ្ឋាភិបាលក្រុងប៉េកាំង «ត្រឡប់ទៅគោរពតាមស្តង់ដារអន្តរជាតិបែបស៊ីវិល័យវិញ» បន្ទាប់ពីអ្នកនាំពាក្យក្រសួងការបរទេសចិនម្នាក់បាននិយាយថា មិនមានបន្ទាត់ព្រំដែនកណ្ដាលខណ្ឌចែកនៅច្រកសមុទ្រតៃវ៉ាន់ «ដោយសារតែតៃវ៉ាន់គឺផ្នែកមួយនៃទឹកដីរបស់ប្រទេសចិនដែលមិនអាចកាត់ផ្ដាច់បាន» មក។
លោក Wu បានប្រាប់អ្នកសារព័ត៌មានថា៖ «បន្ទាត់ព្រំដែនកណ្ដាលគឺជានិមិត្តរូបនៃការការពារជម្លោះយោធា និងការរក្សាសន្តិភាពនិងស្ថិរភាពនៅច្រកសមុទ្រតៃវ៉ាន់អស់រយៈពេលជាច្រើនឆ្នាំមកហើយ។ ការលើកឡើងរបស់ក្រសួងការបរទេសចិននេះគឺស្មើនឹងការបំផ្លាញស្ថានភាពបច្ចុប្បន្ន»។
លោក Wu បានសរសេរនៅលើ Twitter ថា៖ «ខ្ញុំសូមអំពាវនាវដល់សហគមន៍អន្តរជាតិឱ្យថ្កោលទោសគណបក្សកុម្មុយនីស្តចិនសម្រាប់ពាក្យពេចន៍ដ៏គ្រោះថ្នាក់និងបង្កហេតុនេះ និងអំពើដែលគំរាមកំហែងដល់សន្តិភាព។ ...ប្រទេសចិនត្រូវតែដកខ្លួន»។
ប្រទេសចិនចាត់ទុកកោះតៃវ៉ាន់ជាទឹកដីរបស់ខ្លួន ដែលនឹងត្រូវបញ្ចូលទៅក្នុងទឹកដីចិនដីគោកវិញ ដោយកម្លាំងយោធាប្រសិនបើចាំបាច់ ទោះបីជាតៃវ៉ាន់មានស្វ័យភាពគ្រប់គ្រងទឹកដីរបស់ខ្លួនអស់រយៈពេលជាង ៧ ទសវត្សរ៍មកហើយក៏ដោយ។
រដ្ឋាភិបាលក្រុងប៉េកាំងបានបង្កើនសម្ពាធលើដែនកោះប្រជាធិបតេយ្យនេះ ចាប់តាំងពីពេលដែលអ្នកស្រី Tsai Ing-wen ជាប់ឆ្នោតជាប្រធានាធិបតីតៃវ៉ាន់កាលពីឆ្នាំ ២០១៦ មក។ អ្នកស្រី Tsai Ing-wen មិនយល់ស្របនឹងទស្សនៈដែលថា តៃវ៉ាន់ជាផ្នែកមួយនៃប្រទេសចិននោះទេ៕
