កាលពីថ្ងៃសុក្រ សហរដ្ឋអាមេរិកបានជំរុញឲ្យប្រទេសចិនបញ្ឈប់បង្កើនអំណាចយោធារបស់ខ្លួននៅសមុទ្រចិនខាងត្បូងដែលជាទីតាំងមានជម្លោះ។
អំឡុងពេលនៃកិច្ចពិភាក្សារវាងក្រុមមន្រ្តីជាន់ខ្ពស់ក្នុងរដ្ឋធានីវ៉ាស៊ីនតោន ភាគីទាំងពីរបានលើកឡើងអំពីសារៈសំខាន់នៃភាពខុសគ្នារវាងភូមិសាស្រ្តនយោបាយរបស់ប្រទេសទាំងពីរ រួមទាំងជម្លោះពាណិជ្ជកម្មដ៏ល្វីងជូរចត់ សេរីភាពនៃការធ្វើនាវាចរក្នុងតំបន់អាស៊ីប៉ាស៊ីហ្វិក បញ្ហាកោះតៃវ៉ាន់ និងការបង្រ្កាបទៅលើជនជាតិភាគតិចកាន់សាសនាឥស្លាមក្នុងប្រទេសចិនជាដើម។
មន្រ្តីជាន់ខ្ពស់ចិនទាំងពីររូបដែលបានចូលរួមក្នុងកិច្ចពិភាក្សានេះក៏បានឆ្លៀតយកឱកាសនេះព្រមានអំពីសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរនេះ ថាចុងបញ្ចប់នៃជម្លោះនេះនឹងធ្វើឲ្យប៉ះពាល់ដល់ប្រទេសទាំងពីរ និងបានស្នើឲ្យបើកចំហរដល់ការទំនាក់ទំនងគ្នាដើម្បីដោះស្រាយវិបត្តិដែលធ្វើឲ្យប៉ះពាល់ដល់ទីផ្សារហរិញ្ញវត្ថុសកលលោក។
កិច្ចពិភាក្សានេះហាក់បានបង្ហាញអំពីគោលជំហរនៃការផ្សះផ្សារទំនាក់ទំនងរវាងប្រទេសទាំងពីរដែលបានធ្លាក់ចុះនៅប៉ុន្មានខែថ្មីៗនេះនិងជាការត្រួសត្រាយផ្លូវសម្រាប់ជំនួបរវាងលោកប្រធានាធិបតី ដូណាល់ ត្រាំ និងលោកប្រធានាធិបតីចិន ស៊ី ជីងពីង នៅឯកិច្ចប្រជុំកំពូល G20 នៅប្រទេសអាហ្សង់ទីននៅចុងខែវិច្ឆិកានេះ៕
