ភាពតានតឹងបានកើនឡើងនៅតាមបណ្ដោយព្រំដែនរវាងប្រទេសឥណ្ឌានិងចិន ស្របពេលដែលភាគីទាំងពីរចោទគ្នាទៅវិញទៅមកអំពីការបាញ់ព្រមាននៅឯព្រំដែនជួរភ្នំហិមាល័យដែលមានជម្លោះ ដែលនៅកន្លែងនោះ ទាហាននៃភាគីទាំងពីរប្រឈមមុខដាក់គ្នាអស់រយៈពេលជាង ៤ ខែមកហើយ។
ការប្រឈមមុខដាក់គ្នាចុងក្រោយកើតឡើងនៅភាគខាងត្បូងនៃមាត់បឹងយុទ្ធសាស្ត្រ Pangong Tso ក្នុងតំបន់ Ladakh។ នៅទីនោះ ភាគីទាំងពីរបានចោទគ្នាទៅវិញទៅមកថាបានរំលោភលើតំបន់ព្រំដែនដែលមិនទាន់កំណត់ច្បាស់លាស់នៅឡើយ។
អ្នកនាំពាក្យក្រសួងការបរទេសចិន លោក Zhao Lijian បាននិយាយកាលពីថ្ងៃអង្គារថា ទាហានឥណ្ឌាបានឆ្លងដែនខុសច្បាប់ និងជាអ្នកដែលបានបាញ់មុន និងបានបញ្ជាក់ថា ទាហានចិនបាន «បង្ខំចាត់វិធានការដើម្បីធ្វើឲ្យស្ថានភាពត្រឡប់មកដូចដើមវិញ»។
ទាហានឥណ្ឌាបានបដិសេធថា ខ្លួនមិនបានចូលទៅកាន់ទឹកដីចិន ឬក៏ប្រើ «មធ្យោបាយគឃ្លើនណាមួយនោះទេ ដែលក្នុងនោះរួមមានទាំងការបាញ់បោះផងដែរ»។
នៅក្នុងសេចក្ដីថ្លែងការណ៍មួយ ភាគីឥណ្ឌាបានឲ្យដឹងថា ទាហានចិនបានព្យាយាមព័ទ្ធប៉ុស្តិ៍យាមមួយរបស់យោធាឥណ្ឌា និងបានបាញ់ឡើងលើអាកាសប៉ុន្មានគ្រាប់ ដែលនៅពេលនោះ ទាហានឥណ្ឌាប្រាប់ពួកគេកុំឲ្យធ្វើដូច្នេះ៕
