សមាជិកកំពូលៗខាងគណបក្សប្រជាធិបតេយ្យ បានជួបពិភាក្សាជាមួយនឹងមន្ត្រីសេតវិមានកាលពីថ្ងៃអង្គារម្សិលមិញ ស្របពេលសមាជិកសភា និងលោកប្រធានាធិបតី Donald Trump ប្រឈមនឹងកាលបរិច្ឆេទផុតកំណត់នៅចុងខែនេះដើម្បីអនុម័តកញ្ចប់ថវិកាជំនួយថ្មីមួយ ដើម្បីទប់ទល់ជាមួយនឹងផលប៉ះពាល់ធ្ងន់ធ្ងរខាងផ្នែកសុខភាព និងផ្នែកសេដ្ឋកិច្ចនៅក្នុងសហរដ្ឋអាមេរិក ដែលបណ្ដាលមកពីវិបត្តិជំងឺកូវីដ១៩។
ការពិភាក្សាជាលក្ខណៈឯកជននេះមានការចូលរួមពីរដ្ឋមន្ត្រីក្រសួងហិរញ្ញវត្ថុលោក Steven Mnuchin នាយអគ្គសេនាធិការស្ដីទីសេតវិមានលោក Mark Meadows ប្រធានរដ្ឋសភាអ្នកស្រី Nancy Pelosi និងមេដឹកនាំខាងគណបក្សប្រជាធិបតេយ្យនៃព្រឹទ្ធសភាលោក Chuck Schumer។
ការជំរុញនេះបានកើតឡើងនៅចំពេលដែលសហរដ្ឋអាមេរិកមានការកើនឡើងនូវករណីឆ្លងថ្មីនៃជំងឺកូវីដ១៩ ប្រចាំថ្ងៃ ជាមធ្យមជាង ៦៦.០០០ ករណី ក្នុងពេលមួយសប្ដាហ៍កន្លងមកនេះ និងចំពេលដែលថវិកាជំនួយរបស់រដ្ឋាភិបាលសហព័ន្ធចំនួន ៦០០ ដុល្លារក្នុងមួយសប្ដាហ៍សម្រាប់ជួយអ្នកបាត់បង់ការងារធ្វើរាប់លាននាក់ជិតផុតកំណត់នៅចុងខែកក្កដានេះ។
លោក Mnuchin និងលោក Meadows បានកំណត់យកថ្ងៃទី ៣១ ខែកក្កដា ជាកាលបរិច្ឆេទមិនផ្លូវការ ដើម្បីអនុម័តកញ្ចប់ថវិកាជុំថ្មីនេះ។ ប៉ុន្តែមេដឹកនាំគណបក្សសាធារណរដ្ឋនៃព្រឹទ្ធសភា លោក Mitch McConnell ហាក់ដូចជាគិតថាមិនអាចទៅរួច នៅពេលដែលអ្នកកាសែតបានសួរកាលពីថ្ងៃអង្គារម្សិលមិញ ដោយលោកបាននិយាយថា សំណើរបស់សមាជិកគណបក្សសាធារណរដ្ឋនៃព្រឹទ្ធសភា នឹងដាក់បង្ហាញនៅត្រឹមចុងសប្ដាហ៍នេះ៕
