ភ្ជាប់​ទៅ​គេហទំព័រ​ទាក់ទង

នៅ​ក្នុង​ទីក្រុង​ដ៏​កកកុញ ​ការ​ជិះ​កង់​កំពុង​ទទួល​បាន​កំណើន​​ប្រជាប្រិយ​ភាព


អ្នក​ជិះកង់​ពីរនាក់​ធ្វើ​ដំណើរ​ឆ្លង​កាត់​សកលវិទ្យាល័យ​វិទ្យាសាស្រ្ត​សុខាភិបាល​​។ នៅ​ក្នុង​ទីក្រុង​ដ៏​កកកុញ ​ការ​ជិះ​កង់​កំពុង​ទទួល​បាន​កំណើន​​ប្រជាប្រិយ​ភាព។

ការ​ជិះកង់​ដើម្បី​ឆ្លង​កាត់​ដង​ផ្លូវ​នានាដ៏​កកកុញ​នៅ​ក្នុង​ទីក្រុង​ភ្នំពេញ​កំពុង​ទទួល​បាន​ការ​ពេញនិយម​កាន់តែ​ខ្លាំង​ឡើង​។ មិន​មែន​ត្រឹម​តែការ​ជិះ​កង់​នៅ​ក្នុង​ទីក្រុង​ប៉ុណ្ណោះ​ទេ អ្នកជិះ​កង់​ខ្លះ​ត្រូវ​បាន​ប្រទះ​ឃើញ​រហូត​ដល់​តំបន់​ជាយ​ក្រុង​ទៅ​ទៀត​នា​ចុង​សបា្តហ៍។​

លោក ឃឹម សុផាណ្ណា អ្នក​គ្រប់​គ្រង​កម្មវិធី​មូល​និធិ Friedrich Naumann Stiftung បាន​បង្កើត​ក្រុម​ជិះ​កង់ Cycling for Freedom រយៈ​ពេល​បី​ឆ្នាំ​មក​ហើយ ដែល​ក្រុម​នេះ​មាន​សមាជិក​សកម្ម​ចំនួន ៣០ នាក់។​

លោក​បាន​និយាយថា៖ «រៀង​រាល់​មួយ​ខែ​ម្ដង​ ពួក​យើង​ធាក់​កង់ពី ៦០​ទៅ​៧០គីឡូម៉ែត្រ។ ហើយ​ការ​ជិះ​កង់​នេះ​ផង​ដែរ​ គឺ​ដើម្បី​សុខភាព ភាព​សប្បាយ​រីករាយ​ ការ​ពង្រឹង​មិត្តភាព និង​ការ​ពង្រីក​បណ្តាញ​ទំនាក់ទំនង​ ព្រោះ​អ្នក​ជិះ​សុទ្ធ​តែ​ធ្វើ​ការ​កន្លែង​ខុស​ៗ​គ្នា និង​ពិភាក្សា​ជជែក​លេង​អំពី​ការងារ និង​ព័ត៌មាន​ផ្សេងៗ​ជា​ដើម»។ ​

យ៉ាង​ណា​មិញ ដោយ​សារ​តែ​ផ្លូវ​នៅ​ទីក្រុង​ភ្នំពេញមិន​ទាន់​មាន​ផ្លូវ​សំរាប់​អ្នក​ជិះ​កង់ ដូច្នេះ​អ្នក​ជិះកង់​ទាំងឡាយ​អាច​ប្រឈម​នឹង​គ្រោះថ្នាក់​ច្រើន។ ​បុរស​វ័យ ៥៣ ឆ្នាំ​រូប​នេះ​បាន​បន្តទៀត​ថា៖ « បើ​មាន​ផ្លូវ​ជិះ​កង់​ខ្ញុំ​នឹង​ជិះ​ជំនួស​ឡាន ព្រោះ​វា​អាច​ជួយ​សុខភាព និង​បរិស្ថាន​ផង​ដែរ។

ហុង សុខ​ឡេង មាន​អាយុ ៤០ ឆ្នាំ​ជា​ អនុ​ប្រធាន​ជាន់​ខ្ពស់​ផ្នែក​សាជីវកម្ម​នៃ​ធនាគារកាណាឌីយ៉ា (Canadia) ក៏​ជា​អ្នក​ដែល​ស្រលាញ់​ខាង​ជិះ​កង់​ផង​ដែរ។ លោក​គឺ​ជា​ សមាជិក​មួយ​រូប​នៅ​ក្នុង​ក្រុម Mekong Cycling Club ដែល​សមាជិក​ទាំង​អស់​មាន​គោល​ដៅ​រួម​ក្នុង​ការ​ជិះ​កង់​ដើម្បី​សុខភាព។ លោក​បាន​ប្រាប់​ថា៖ «ការ​ជិះ​កង់​គឺ​ស្រួល មិន​តម្រូវ​ពេល​វេលា មិន​តម្រូវ​ទី​តាំង»។

ដោយ​មើល​ឃើញ​អ្នក​ជំនាន់​ក្រោយ​មាន​ទេព​កោសល្យ​ក្នុង​ការ​ជិះ​កង់ ក្រុម​របស់​លោក​ក៏​មាន​បំណង​ចង់​បណ្តុះ​បណ្តាល​ឲ្យ​ពួក​គាត់​មាន​ឱកាស​។ ដូចនេះ ​លោក​បាន​សហការប្រមែ​ប្រមូល​ថវិកា​ដើម្បី​ទិញ​កង់​ សម្រាប់​ឲ្យ​ពួក​គាត់​ប្រើ​ប្រាស់​កង់​ដើម្បី​ប្រកួត​ប្រជែង​ក្នុង​កម្មវិធី​ផ្សេងៗ មាន​ទាំង​ក្នុង​ស្រុក និងក្រៅ​ប្រទេស។

ទោះ​បី​ជា​យ៉ាងណា​ក៏​ដោយ លោក​បាន​បន្ត​ថា ផ្លូវ​សម្រាប់​ប្រើ​ប្រាស់​ក្នុង​ការ​ជិះ​កង់ និង​ធ្វើ​ដំណើរ​ត្រូវ​បាន​យក​ទៅ​ប្រើ​ប្រាស់​ក្នុង​ការ​លក់​ដូរ​ និង​ចំណត​ផ្សេងៗ​ ដែល​វា​ជា​ឧបសគ្គ​ធំ​សម្រាប់​អ្នក​ជិះកង់​។ លោក​និយាយថា៖ « ប្រជាជន​ដែល​មាន​គេហដ្ឋាន ឬ​ហាង​នៅ​តាម​ផ្លូវ​ គួរ​ព្យាយាម​ទុក​ផ្លូវ​ឲ្យ​អ្នក​ថ្មើរ​ជើង​ និង​សម្រាប់​អ្នក​ជិះ​កង់ ហើយ​នេះ​ជា​អ្វី​ដែល​យើង​អាច​ជួយ​ឲ្យ​ប្រទេស​យើង​រីក​ចម្រើន ក៏​ដូច​ជា​លើក​កម្ពស់​សុខភាព​សាធារណៈ»។

តាំង​ពី​ឆ្នាំ ២០១៣ សហភាព​អឺរ៉ុប​បាន​ធ្វើ​យុទ្ធនាការ​មួយ​ដើម្បី​លើក​កម្ពស់​ការ​ជិះ​កង់ លើ​ប្រធាន​បទ​ផ្សេង​ៗក្នុង​ការ​កាត់​បន្ថយ​ការ​កក​ស្ទះ​ចរាចរណ៍ កាត់​បន្ថយ​ផ្សែង​ពុល និង​ជួយ​ផ្នែក​សុខភាព​ជា​ដើម ។ លោកស្រី ពូន ប៉ុក អ្នក​នាំ​ពាក្យ​របស់​សហភាព​អឺរ៉ុប​នៅ​ក្នុង​ប្រទេស​កម្ពុជា​បាន​និយាយ​ថា អ្នក​ចូល​រួមដែល​បញ្ចប់​កម្មវិធី​ហើយ នៅ​តែ​បន្ត​ការ​ជិះ​កង់ ដើម្បី​ជួយ​បរិស្ថាន​ កាត់​បន្ថយ​ការ​កក​ស្ទះ​ចរាចរណ៍​ និង​លើក​កម្ពស់​សុខភាព​សាធារណៈ​។

លោក​វេជ្ជបណ្ឌិត លី ចេងហ៊ុយ នាយក​គ្រប់​គ្រង​គេហទំព័រ​ HealthCambodia.com និយាយ​ថា ​កង្វះ​ពលកម្ម​រាង​កាយ​អាច​ធ្វើ​ឲ្យ​ប៉ះ​ពាល់​ទៅ​ដល់​សុខភាព។ លោកនិយាយថា កីឡា​សុទ្ធ​តែ​ផ្តល់​ផល​ប្រយោជន៍​ទាំង​ផ្នែក​ផ្លូវ​កាយ និង​ផ្លូវ​ចិត្ត។

លោក​បន្ថែម​ទៀត​ថា៖ «ខ្ញុំ​គិត​ថា​សព្វ​ថ្ងៃ​នេះ មិន​មែន​មាន​តែ​ការ​ជិះ​កង់​ទេ ការ​ហាត់​ប្រាណ​របស់​ប្រជា​ពលរដ្ឋ​មាន​ការ​កើន​ឡើង។ គាត់​ចាប់​ផ្តើម​យល់​ពីសារៈសំខាន់​នៃ​សុខភាព»។

ទោះ​បី​ជា​យ៉ាង​ណា​ក៏​ដោយ ការ​ជិះ​កង់​មាន​ការ​កើន​ឡើង​ដើម្បី​សុខភាព ឬ​ធ្វើ​ការ​សង្គម ដែល​ផ្ទុយពី​មុន​យើង​ប្រើប្រាស់​កង់​ជា​មធ្យោបាយ​ធ្វើ​ដំណើរ។ លោក​បន្តថា៖ «យើង​សង្កេត​ឃើញ​មាន​ការ​ជិះ​កង់​កើន​ឡើង​ក្នុង​ន័យ​សុខ​ភាព មិត្ត​ភាព សង្គម​ជា​ដើម​»។

ទេព ច័ន្ទ​សូលីកា វិស្វករ​នៅ​សហគ្រាស​សង្គម Wetlands Work ​ ធ្លាប់​បាន​សិក្សា​នៅ​ប្រទេស​អាល្លឺម៉ង់ ​ដែល​នៅ​ទី​នោះ​នាង​តែងតែ​ឃើញ​ប្រជាជន​ប្រើប្រាស់​មធ្យោបាយ​ធ្វើ​ដំណើរ​ដោយ​ការ​ជិះ​កង់ ជា​ពិសេស​សិស្ស​សាលា។ នាង​បាន​ខ្ចី​កង់ពី​មិត្តភក្តិរបស់​នាង​សម្រាប់​ជិះ​ពី​កន្លែង​មួយ​ទៅ​កន្លែង​មួយ។ បន្ទាប់​ពី​ត្រលប់​មក​ប្រទេស​កម្ពុជា​បាន​មួយ​ឆ្នាំ នាង​បាន​ទិញ​កង់​ផ្ទាល់​ខ្លួន និង​ចាប់​ផ្តើម​ជិះ​តាំង​ពី​ពេល​នោះ​មក។​

នាង​និយាយថា៖ «ផល​វិជ្ជមានពី​ការ​ជិះ​កង់​ ​គឺ​មាន​ផល​ប្រយោជន៍​ដល់​បរិស្ថាន ហើយ​ក៏​ជួយ​ដល់​សុខភាព​យើង​ផង​ដែរ​ ប្រសិន​យើង​ជិះ​រាល់​ថ្ងៃ ហើយ​វា​នឹង​ក្លាយ​ជា​របស់​កំសាន្ត​របស់​យើង​ផង​ដែរ»។

XS
SM
MD
LG