នៅក្នុងការថ្លែងសុន្ទរកថាប្រចាំឆ្នាំលើកទី ៣ របស់ប្រធានាធិបតីសហរដ្ឋអាមេរិកលោក Donald Trump អំពីស្ថានការណ៍ប្រទេសជាតិ កាលពីយប់ថ្ងៃអង្គារម្សិលមិញ លោកបានថ្លែងទៅកាន់សភា និងប្រទេសជាតិថា រដ្ឋបាលរបស់លោកនៅក្នុងរយៈពេល ៣ ឆ្នាំកន្លងមកនេះ «បានបំបែកផ្នត់គំនិតដែលថាសហរដ្ឋអាមេរិកធ្លាក់ចុះ» ហើយលោកបានបញ្ជាក់ថា «ជោគវាសនារបស់ពលរដ្ឋអាមេរិកាំងមិនមានភាពអាប់អួទេ»។
នៅក្នុងសុន្ទរកថារយៈពេលជិតមួយម៉ោងកន្លះរបស់លោក Trump នេះ លោកបានអួតអំពីការធ្វើឲ្យអានុភាពសេដ្ឋកិច្ចសហរដ្ឋអាមេរិកខ្លាំងឡើងវិញ ជោគជ័យនៅក្នុងការចរចាពាណិជ្ជកម្ម ការកសាងយោធាឡើងវិញ និងការកាត់បន្ថយភាពគ្មានការងារធ្វើសម្រាប់ពលរដ្ឋស្បែកខ្មៅ និងជាតិសាសន៍ភាគតិចដទៃទៀត។
សុន្ទរកថានេះបានធ្វើឡើងនៅចំពេលដែលព្រឹទ្ធសភាដែលគ្រប់គ្រងដោយគណបក្សសាធារណរដ្ឋត្រៀមបោះឆ្នោតសម្រេចចុងក្រោយនៅថ្ងៃពុធនេះដើម្បីសម្រេចថាលោក Trump គ្មានទោសពាក់ព័ន្ធនឹងបទចោទរំលោភអំណាច និងបទចោទរារាំងដំណើរការស៊ើបអង្កេតរបស់សភា ដែលរដ្ឋសភាបានចោទប្រកាន់ដើម្បីទម្លាក់លោកពីតំណែង។
លោក Trump ប្រកាសដូច្នេះថា៖ «យើងកំពុងធ្វើដំណើរទៅមុខក្នុងល្បឿនមួយដែលនឹកស្មានមិនដល់គឺក្នុងរយៈពេលខ្លីប៉ុណ្ណោះ ហើយយើងនឹងមិនត្រឡប់ក្រោយវិញជាដាច់ខាត!»។
នេះគឺជាលើកដំបូងហើយនៅក្នុងប្រវត្តិសាស្ត្រដែលប្រធានាធិបតីដែលកំពុងត្រូវគេជំនុំជម្រះដើម្បីដកចេញពីតំណែង ថ្លែងសុន្ទរកថាប្រចាំឆ្នាំអំពីស្ថានភាពប្រទេសជាតិនៅក្នុងឆ្នាំដែលលោកកំពុងឈរឈ្មោះបោះឆ្នោតសម្រាប់មួយអាណត្តិទៀត។
ព្រឹត្តិការណ៍ថ្លែងសុន្ទរកថានេះបានបញ្ចប់ទៅដោយប្រធានរដ្ឋសភាអ្នកស្រី Nancy Pelosi ឈរហែកច្បាប់ចម្លងនៃឯកសារសុន្ទរកថាដ៏វែងរបស់លោក Trump ជាបំណែក និងទម្លាក់លើតុរបស់អ្នកស្រីនៅលើវេទិកា៕
