គណបក្សសង្គ្រោះជាតិ និងគណបក្សប្រជាជនកម្ពុជានៅមិនទាន់មានជំហររួមគ្នាក្នុងការផ្តល់ការការពារដល់សមាជិកគណៈកម្មាធិការជាតិរៀបចំការបោះឆ្នោតថ្មីដែលនឹងត្រូវបង្កើតឡើងក្រោយការព្រមព្រៀងគ្នារវាងគណបក្សគូទំនាស់ទាំងពីរនេះនៅឡើយទេ។
តាមប្រភពដែលសិ្នទ្ធនឹងការចរចាឱ្យដឹងថា សេចក្តីព្រាងច្បាប់រដ្ឋធម្មនុញ្ញថ្មីដែលគណបក្សសង្គ្រោះជាតិបានស្នើឡើងបានស្នើសុំឱ្យសមាជិកសមាជិកាគ.ជ.បថ្មីមានអភ័យឯកសិទ្ធិដូចអ្នកតំណាងរាស្រ្តដែរ។ ប៉ុន្តែគណបក្សកាន់អំណាចយល់ថាសំណើនេះមិនអាចធ្វើបានទេ។
ការស្នើសុំផ្តល់អភ័យឯកសិទ្ធិដល់សមាជិកនៃគ.ជ.បកើតឡើងបន្ទាប់ពីលោកស្រីពុង ឈីវកេកប្រធានអង្គការសិទ្ធិមនុស្សលីកាដូយល់ព្រមចូលបម្រើការងារក្នុងស្ថាប័នដែលកំពុងមានរឿងចម្រូងចម្រាសនេះដោយភ្ជាប់លក្ខខណ្ឌមួយចំនួនក្នុងនោះគឺការផ្តល់អភ័យឯកសិទ្ធិដើម្បីកុំឱ្យមានគណបក្សនយោបាយណាមកប្រើប្រាស់ឥទ្ធិពលលើបាន។
លោកអេង ឆៃអ៊ាង អ្នកតំណាងរាស្ត្រជាប់ឆ្នោតនៃគណបក្សសង្គ្រោះជាតិនិងជាប្រធានក្រុមការងារធ្វើវិសោធនកម្មរដ្ឋធម្មនុញ្ញខាងគណបក្សសង្គ្រោះជាតិបានបញ្ជាក់ថា៖
«ម្សិលមិញពេលដែលខ្ញុំប្រជុំការងារជាមួយគណបក្សប្រជាជនដែលមានឯកឧត្តមប៉ែន បញ្ញាជាប្រធានខ្ញុំក៏បានលើកពីសំណើរបស់គាត់ទៅពិភាក្សាដែរប៉ុន្តែនៅ មិនទាន់ដឹងលទ្ធផលយ៉ាងម៉េចទេព្រោះ ខាងក្រុមការងារគណបក្សប្រជាជនគេនឹងយកគំនិតហ្នឹងទៅជជែកជាមួយផ្ទៃក្នុងគណបក្ស។ ប៉ុន្តែចំពោះគណបក្សសង្គ្រោះជាតិយើងគាំទ្រនូវសំណើនិងសំណូមពររបស់គាត់ហ្នឹង»។
ប៉ុន្តែការលើកឡើងនេះត្រូវបានលោកឈាង វុន ប្រធានគណៈកម្មាធិការកិច្ចការបរទេសរបស់រដ្ឋសភាជាតិនៃគណបក្សប្រជាជនកម្ពុជាយល់ថាមិនអាចទទួលយកបានទេ។
លោកឈាង វុនបានបញ្ជាក់ប្រាប់វីអូអេថា៖
«គ.ជ.បគាត់មិនមែនជាតំណាងរាស្រ្តទេ។ កុំលើកពីអ្វីដែលតំណាងពលរដ្ឋគាត់មាន។ បុព្វសិទ្ធិអ្នកតំណាងរាស្រ្តនិងអភ័យឯកសិទ្ធិអ្នកតំណាងរាស្រ្តហ្នឹងគឺជាការធានាពីការនិយាយស្តីរបស់គាត់ហើយនិយាយពីការចំណាយដើម្បី បម្រើរាស្រ្តរបស់គាត់បីបួនម៉ឺននាក់ដែលគាត់តំណាងដូច្នេះក្នុងនាមអ្នកតំណាងរាស្រ្តគាត់សំខាន់ណាស់អញ្ចឹងហើយគេការពារគាត់ កុំឱ្យគាត់ការពារប្រជារាស្រ្តរបស់គាត់ទៅគាត់ត្រូវទទួលទោសនៅក្នុងការនិយាយស្តី ការពារនៅ ក្នុងរដ្ឋសភា។ អញ្ចឹងហើយបានជាគេឱ្យអភ័យឯកសិទ្ធិ។ ការងារគ.ជ.បគឺជាការងារប្រតិបត្តិក្នុងការបោះឆ្នោតអញ្ចឹងការងារបោះឆ្នោតវាអត់មានរឿងអ្វីត្រូវមានអភ័យឯកសិទ្ធិផង។ ការសុំនេះអត់ត្រឹមត្រូវទេហើយវាមិនដែលមានប្រទេសណាមានអភ័យឯកសិទ្ធិជូនគណៈកម្មាធិការជាតិរៀបចំការបោះឆ្នោតទេ»។
គណៈកម្មាធិការជាតិរៀបចំការបោះឆ្នោតទទួលរងការចោទប្រកាន់ថាមានការលំអៀងទៅរកគណបក្សកាន់អំណាចដែលនាំឱ្យលទ្ធផលឆ្នោតដែលប្រកាសដោយស្ថាប័ននេះមិនត្រូវបានគណបក្សប្រឆាំងទទួលស្គាល់ហើយមិនទទួលយកនិងធ្វើពហិការកិច្ចប្រជុំសភាជាតិ។
អង្គការសង្គមស៊ីវិលយល់ថាអភ័យឯកសិទ្ធនេះគឺជាការការពារបន្ថែមទៀតដល់អ្នកធ្វើការនៅក្នុងស្ថាប័ននេះបើទោះបីជាគំរូដូចនេះនៅមិនទាន់មានអនុវត្តនៅប្រទេសណាក៏ដោយ។
លោកបណ្ឌិត ហង្ស ពុទ្ធា នាយកប្រតិបត្តិអង្គការនិកហ្វិកបានបញ្ជាក់ថា៖
«ខ្ញុំថាការកែទម្រង់ស្ថាប័នរៀបចំការបោះឆ្នោតនេះមានការចាំបាច់ដែលតម្រូវឱ្យសមាជិកនីមួយៗមានអភ័យឯកសិទ្ធិដូចជាតំណាងរាស្ត្រដែរដោយសារស្ថាប័ននេះកំណត់នៅក្នុងរដ្ឋធម្មនុញ្ញហើយស្ថាប័ននេះឯងគឺនឹងធ្វើការជាកណ្តាលរវាងគណបក្សនយោបាយទាំងអស់។ អញ្ចឹងប្រសិនបើស្ថាប័នមួយនេះស្ថិតនៅក្នុងគំនាបគណបក្សនយោបាយណាដូចជាការបញ្ឈប់ឬក៏ការបៀតបៀនចាប់ខ្លួនអ្វីនោះ អីចឹងពួកគាត់មិនមានឯករាជ្យក្នុងការធ្វើការងារទេ»។
ប៉ុន្តែលោកឈាង វុន សមាជិកក្រុមចរចានៃគណបក្សប្រជាជនកម្ពុជាបានបញ្ជាក់ថាបើសមាជិកគ.ជ.បធ្វើការបន្លំសន្លឹកឆ្នោតគឺត្រូវតែទទួលទោស៖
«គាត់ទៅលួចបន្លំការបោះឆ្នោតហើយឱ្យគាត់អត់មានទោសយ៉ាងម៉េច? វាមិនដែលមាន។ ខ្ញុំមិនថាអីទេបើថាឱ្យក៏ឱ្យទៅក៏ប៉ុន្តែខ្ញុំមិនស្តាយទេនោះមិនមែនរបស់ខ្ញុំផងប៉ុន្តែជាគោលការណ៍ច្បាប់វាអត់មានការអនុវត្តបែបនេះ»។
គណបក្សប្រជាជនកម្ពុជានិងគណបក្សសង្គ្រោះជាតិបានព្រមព្រៀងគ្នាបញ្ចប់វិបត្តិនយោបាយក្រោយការបោះឆ្នោតដែលមានរយៈពេលជិតមួយឆ្នាំ។ ប៉ុន្តែសមាជិកសភាជាប់ឆ្នោតទាំងអស់របស់គណបក្សសង្គ្រោះជាតិនៅមិនទាន់ស្បថចូលកាន់តំណែងនៅឡើយទេដោយរង់ចាំក្រុមការងារដែលបានបង្កើតឡើងចំនួនបីចរចាលើចំណុចលម្អិតសម្រាប់យកទៅ អនុវត្តនៅពេលដែលចូលកាន់តំណែង។
ការបង្កើតគ.ជ.បថ្មីត្រូវផ្អែកលើរូបមន្តបួននាក់មកពីគណបក្សកាន់អំណាច ៤នាក់មកពីគណបក្សប្រឆាំងនិងមួយនាក់ជាបុគ្គលឯករាជ្យ។ សម្រាប់សមាសភាពខាងផ្នែកគណបក្សប្រឆាំងត្រូវបានប្រភពប្រាប់ឱ្យដឹងថា មានសមាសភាពមកពីអង្គការសង្គមស៊ីវិលចូលរួមច្រើនក្រៅពីលោកស្រី ពុង ឈីវកេក៕
