ភ្ជាប់​ទៅ​គេហទំព័រ​ទាក់ទង

មូលនិធិ​រូបិយប័ណ្ណ​​អន្តរជាតិ​គំរាម​កាត់​បន្ថយ​ជំនួយ​ដល់​អ៊ុយក្រែន​ចំពោះ​​បញ្ហា​អំពើ​ពុក​រលួយ


លោក​ស្រី Christine Lagarde ​ប្រធាន​គ្រប់គ្រង​មូលនិធិ​រូបិយប័ណ្ណ​​អន្តរជាតិ​ (IMF) ថ្លែង​ក្នុង​កិច្ចប្រជុំ «ការ​ទស្សន៍ទាយ​សេដ្ឋកិច្ច​ពិភពលោក» នៅ​ក្នុង​វេទិកា​សេដ្ឋកិច្ច​ពិភពលោក​នៅ​ក្នុង​ក្រុង Davos ប្រទេស​ស្វ៊ីស កាលពី​ថ្ងៃទី២៣ ខែមករា ឆ្នាំ២០១៦។

ប្រធាន​មូលនិធិ​រូបិយប័ណ្ណអន្តរជាតិ​ (IMF) ​បាន​មាន​ប្រសាសន៍​កាល​ពី​ថ្ងៃ​ពុធ​ថា ប្រទេស​អ៊ុយក្រែន ​អាច​នឹង​បាត់បង់​ថវិកា​ជំនួយ​ចំនួន​១៧​ពាន់​៥រយ​លាន​ដុល្លារ​ ​ប្រសិនបើ ​ប្រទេស​នេះ​មិនបង្កើន​ល្បឿន​កំណែ​ទម្រង់​នយោបាយ​ និង​ទប់​ស្កាត់​អំពើ​ពុករលួយ​ទេ​នោះ។

លោក​ស្រី Christine Lagarde ​ប្រធាន​គ្រប់គ្រង​មូលនិធិ​ផ្តល់​ប្រាក់​កម្ចី​ដែល​មាន​ទីតាំងក្នុង​រដ្ឋធានី​វ៉ាស៊ីនតោន ​បាន​ចេញ​សេចក្តី​ថ្លែងការណ៍​មួយ​ដោយ​ប្រើ​ពាក្យ​ខ្លាំងៗ​ថា «ដោយ​គ្មាន​កិច្ច​ខំ​ប្រឹងប្រែង​ខ្លាំងក្លា​ថ្មី​ដើម្បី​ធ្វើ​កំណែ​ទម្រង់​អភិបាល​កិច្ច ​និង​ការ​ប្រយុទ្ធ​ប្រឆាំង​នឹង​អំពើ​ពុករលួយ​ទេ​នោះ ​វា​អាច​នឹង​ពិបាក​ក្នុង​ការ​មើល​ឃើញ​ថា​តើ​កម្មវិធី​ដែល​ឧបត្ថម្ភ​ដោយ​មូលនិធិ IMF ​អាច​បន្ត ​និង​ទទួល​បានជោគជ័យ​ដោយ​វិធី​ណា»។

​វិបត្តិ​នេះ ​បាន​កើត​មាន​ឡើង​ចាប់​តាំង​ពី​ការ​លាលែង​ពី​តំណែង​ភ្លាមៗ​កាល​ពី​សប្តាហ៍​មុន​របស់​លោក Aivaras Abromavicius រដ្ឋ​មន្រ្តី​ធ្វើ​កំណែ​ទម្រង់​ក្រសួង​ហិរញ្ញវត្ថុ​របស់​អ៊ុយក្រែន​ដើម្បី​តវ៉ា​ប្រឆាំង​ការ​ចោទ​ប្រកាន់​ថា មាន​ការ​ពុករលួយ​នៅ​ក្នុង​រដ្ឋ។

​ការ​លាលែង​ពី​តំណែង​របស់​លោក ​បាន​បង្ហាញ​ពី​ការ​បែកបាក់​នៅ​ក្នុង​រដ្ឋាភិបាល​ចម្រុះ​ដែល​កំពុង​ដឹកនាំ​ប្រទេស និង​ប្រតិបត្តិការ​ដ៏​រដិបរដុប​ទៅ​លើ​កំណែ​ទម្រង់​ដែល​ត្រូវ​បាន​គេ​សន្យា​នៅ​ក្រោម​កម្មវិធី​របស់​មូលនិធិ IMF៕

XS
SM
MD
LG