ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​បន្ត​ទម្លាក់​តម្លៃ​រូបិយប័ណ្ណ​ខ្លួន​បន្ថែម​


បុគ្គលិក​ធនាគារ​រាប់​ប្រាក់​យាន់​នៅ​ក្នុង​ធនាគារ​មួយ​នៅ​ក្រុង Lianyungang ខេត្ត Jiangsu ប្រទេស​ចិន។
បុគ្គលិក​ធនាគារ​រាប់​ប្រាក់​យាន់​នៅ​ក្នុង​ធនាគារ​មួយ​នៅ​ក្រុង Lianyungang ខេត្ត Jiangsu ប្រទេស​ចិន។

ប្រទេស​ចិន​បាន​ធ្វើ​ឲ្យ​រូបិយប័ណ្ណ​យាន់​ធ្លាក់​តម្លៃ​ក្នុងរយៈ​ពេល​ពីរ​ថ្ងៃ​ជាប់​ៗ​គ្នា​ ដែល​នេះ​ជា​ការ​ចុះ​តម្លៃ​ទ្វេដង​ជា​ចំណាត់​ការ​ដ៏​ភ្ញាក់​ផ្អើល ​ដែល​បាន​ធ្វើ​ឲ្យ​រង្គើ​ទីផ្សារ​សាកលលោក​ ហើយ​អាច​បង្កើន​ភាព​តានតឹង​ជាមួយ​គូ​ប្រកួតប្រជែង​ពាណិជ្ជកម្ម​របស់​ខ្លួន។

អត្រា​ទី​ផ្សារ​ប្រាក់​យាន់​បាន​ធ្លាក់​ចុះ១,៦ ភាគរយ​នៅ​ថ្ងៃ​ពុធ​នេះ ​បន្ទាប់​ពី​ការ​ធ្លាក់​ចុះ​ជិត​ពីរ​ភាគ​រយ​កាល​ពី​មួយ​ថ្ងៃ​មុន ​ដែល​ជា​ការ​ធ្លាក់​ចុះ​ដ៏​ខ្លាំង​បំផុត​ក្នុង​រយៈពេល​មួយ​ថ្ងៃ​របស់ខ្លួន​ក្នុង​រយៈពេល​មួយ​ទសវត្សរ៍​នេះ។

ធនាគារ​កណ្តាល​របស់​ចិន ​ដែល​ត្រួតត្រាយ៉ាង​តឹងរឹង​លើ​រូបិយប័ណ្ណ ​បាន​ពណ៌​នា​ចំណាត់​នេះថា ​ជា​ការ​បណ្តោះ​អាសន្ន ហើយ​មាន​ន័យ​ថា ធ្វើ​ឲ្យ​តម្លៃ​ប្រាក់​យាន់​ស្រប​ទៅ​កាន់​ទី​ផ្សារ​កាន់​តែ​ខ្លាំង​ឡើង។

ធនាគារ​នោះ​បាន​ប្រាប់​ឲ្យ​ដឹង​នៅ​ថ្ងៃ​ពុធ​នេះ​ថា «បើ​ពិនិត្យ​មើល​ស្ថានភាព​សេដ្ឋ​កិច្ច​អន្តរជាតិ ​និង​ក្នុង​ស្រុក​នៅពេលបច្ចុប្បន្ន​នេះ មិនមាន​មូលដ្ឋាន​សម្រាប់​និន្នាការ​បញ្ចុះ​តម្លៃ​ប្រាក់​យាន់​ទេ‍»។

ក្រុម​អ្នក​វិនិយោគ​ទុន​ក្នុង​ទ្វីបអាស៊ី​មាន​ប្រតិកម្ម​ជា​អវិជ្ជមាន​នៅ​ថ្ងៃ​ពុធ​នេះ ​ដោយ​ការ​លក់​ដូរ​ភាគ​ហ៊ុន​បាន​ធ្លាក់​ចុះ​នៅ​ក្នុង​ទីក្រុង​ហុងកុង សៀងហៃ​ និង​តូក្យូ។ ​សន្ទស្សន៍​ទី​ផ្សារ​ភាគ​ហ៊ុន​សំខាន់​ក្នុង​ស.រ.អា ​និង​អឺរ៉ុប ​ក៏​បាន​ធ្លាក់​ចុះ​កាល​ពី​ថ្ងៃ​អង្គារ​ម្សិលមិញ​ដែរ។

ចំណាត់​ការ​នេះ​បាន​ទទួល​ការ​ប្រុងប្រយ័ត្ន​នៅ​ក្នុង​ស.រ.អា​ ​ដែល​បាន​ចោទ​ប្រ​កាន់​រដ្ឋាភិបាល​ទីក្រុង​ប៉េកាំង​ជាយូរយារ​ណាស់​មក​ហើយ​ពី​ការ​រក្សា​តម្លៃ​រូបិយប័ណ្ណ​របស់​ខ្លួន​ឲ្យ​នៅ​ទាប ​ដើម្បី​ផ្តល់​ឲ្យ​ការ​នាំ​ចេញ​ទំនិញ​ទៅ​ក្រៅ​ប្រទេស​របស់​ចិន​មាន​ប្រៀប។

លោក Charles Schumerសមាជិក​ព្រឹទ្ធ​សភា​ស.រ.អា​ ​ដែល​ជា​អ្នករិះគន់​ជា​យូរយារ​ណាស់​មក​ហើយ​ដល់​គោល​នយោបាយ​រូបិយប័ណ្ណ​របស់​ចិន ​បាន​និយាយ​ថា ​ចំណាត់​ការ​នេះ​ជា​ភស្តុតាង​បន្ថែម​ទៀត​ថា ​រដ្ឋាភិបាល​ក្រុង​ប៉េកាំង​កំពុង​បញ្ចុះ​តម្លៃ​រូបិយប័ណ្ណ​របស់​ខ្លួន​ដោយ​ចេតនា។

​សេចក្តី​ថ្លែងការណ៍​ពី​ក្រសួង​រតនាគារ​ស.រ.អា​បាន​ប្រាប់​ឲ្យ​ដឹង​ថា ​ខ្លួន​នឹង​សម្រេច​នៅ​ពេល​ឆាប់​ៗ​នេះ​ពី​ភាព​ស្មុគស្មាញ​នៃ​ចំណាត់​ការ​នេះ។

មូលនិធិ​រូបិយវត្ថុ​អន្តរជាតិ (IMF) មាន​សុទិដ្ឋិនិយម​ច្រើន ​ដោយ​និយាយ​ថា ​ការ​បញ្ចុះ​តម្លៃ​រូបិយប័ណ្ណ​នេះ​ទំនង​ជាជំ​ហាន​ប្រកប​ដោយ​ការ​ស្វាគមន៍៕

XS
SM
MD
LG