ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រោយ​ចេញ​ពី​កម្ពុជា រដ្ឋមន្ត្រី​ការ​បរទេស​ហុងគ្រី​តេស្ដ​វិជ្ជមាន​កូវីដ​១៩


លោក Peter Szijjarto ជួបគួរសមជាមួយលោក ហ៊ុន សែន នាយករដ្ឋមន្ត្រីកម្ពុជា នៅវិមានសន្ដិភាព រាជធានីភ្នំពេញ កាលពីថ្ងៃទី៣ ខែវិច្ឆិកា ឆ្នាំ២០២០។ (រូបថត៖ ទំព័រហ្វេសប៊ុក Peter Szijjarto)

រដ្ឋមន្រ្តី​ការបរទេស​ហុងគ្រី​ដែលបានមកបំពេញទស្សនកិច្ចនៅប្រទេសកម្ពុជា កាលពីថ្ងៃអង្គារ ត្រូវបានរាយការណ៍ថាមានជំងឺកូវីដ១៩។ កាលពី​ថ្ងៃ​អង្គារ លោកបានជួបជាមួយលោកនាយករដ្ឋមន្រ្តី ហ៊ុន សែន រដ្ឋមន្រ្តីការបរទេសកម្ពុជា លោក ប្រាក់ សុខុន និងរដ្ឋមន្រ្តីមួយចំនួនទៀតក្នុងពិធីចុះហត្ថលេខារួមគ្នានៅវិមានសន្តិភាពភ្នំពេញ។

រដ្ឋ​មន្ត្រី​ការ​បរទេស​ហុងគ្រី Peter Szijjarto ដែល​បាន​មក​បំពេញ​ទស្សនកិច្ច​នៅ​ប្រទេស​កម្ពុជា​កាល​ពី​ថ្ងៃ​អង្គារ ត្រូវ​បាន​រាយការណ៍​ថា​មាន​ជំងឺ​កូវីដ​១៩។ នេះ​បើ​យោង​តាម​ក្រសួង​ការ​បរទេស​កម្ពុជា និង​ទីភ្នាក់ងារព័ត៌មាន​រដ្ឋ​របស់​ហុងគ្រី។​

ទីភ្នាក់ងារ​ព័ត៌មាន​រដ្ឋMTI របស់​ហុងគ្រី​បាន​ដកស្រង់​សម្ដី លោក Mate Paczolay អ្នក​នាំ​ពាក្យ​ក្រសួង​ការបរទេស​ហុងគ្រី​ថា លោក Peter Szijjarto កំពុង​ស្នាក់​នៅ​ក្នុង​មន្ទីរពេទ្យ​មួយ​កន្លែង​ក្នុង​ទីក្រុង​បាងកក ទី​ដែល​លោក​ត្រូវ​បាន​តេស្ដ​វិជ្ជមាន​កូវីដ១៩ បន្ទាប់​ពី​ចាក​ចេញ​ពី​ប្រទេស​កម្ពុជា កាល​ពី​ថ្ងៃអង្គារ។​

មិន​មាន​របាយការណ៍​លម្អិត​នោះ​ទេ ថា​លោក Peter Szijjarto បាន​ឆ្លង​ជំងឺ​កូវីដ១៩ តាំង​ពី​ពេល​ណា​និង​នៅ​ទី​ណា។ តែ​លោក Mate Paczolay អ្នកនាំពាក្យ​ក្រសួង​ការបរទេស​ហុងគ្រី បាន​និយាយ​ថា លោក Peter Szijjarto ត្រូវ​បាន​ធ្វើ​តេស្ដ​ឃើញ​អវិជ្ជមាន​កូវីដ១៩ មុន​ពេល​លោក​ឡើង​យន្តហោះ ធ្វើ​ដំណើរ​មក​ទ្វីប​អាស៊ី។​

នៅ​ភ្នំពេញ​ឯ​នេះ​វិញ រដ្ឋាភិបាល​កម្ពុជា​បាន​«សម្រេច​ឱ្យថ្នាក់ដឹកនាំ​និង​មន្ត្រី​ទាំងអស់​ដែល​ជួប​និង​ប្រាស្រ័យ​ទាក់ទង​ផ្ទាល់​ជាមួយ​ប្រតិភូ​នៅ​ក្នុង​ពេល​ទស្សនកិច្ច ធ្វើ​តេស្ដ​រក​វីរុស​កូវីដ១៩ និង​ដាក់​ឱ្យ​នៅ​ដាច់​ដោយ​ឡែក (ចត្តាឡីស័ក) តាម​ការ​កំណត់​របស់​ក្រសួង​សុខាភិបាល»។ នេះ​បើ​យោង​តាម​សេចក្ដី​ប្រកាស​របស់​ក្រសួង​ការបរទេស​កម្ពុជា។​

អ្នកស្រី យក់ សម្បត្តិ រដ្ឋ​លេខាធិការ​ក្រសួង​សុខាភិបាល​កម្ពុជា បាន​ប្រាប់​VOA​នៅ​វេលា​រសៀល​ម៉ោង​បួន​ថ្ងៃ​ពុធ​នេះ​ថា ក្រុម​ការងារ​ឆ្លើយតប​ទប់ទល់​នឹង​ជំងឺ​កូវីដ១៩ បាន​កោះ​«ប្រជុំបន្ទាន់»​មួយ ដើម្បី​ពិភាក្សា​អំពី​បញ្ហា​នេះ តែ​មិន​បានបញ្ជាក់​លម្អិត​ជាង​នេះ​នោះទេ។

ស្ថិត​ក្នុង​រាជធានី​ភ្នំពេញ​កាល​ពី​ថ្ងៃ​អង្គារ​លោក Peter Szijjarto មាន​កាលវិភាគ​ដ៏​មមាញឹក។

លោក​រដ្ឋមន្ត្រី​ការ​បរទេស​ហុងគ្រី​បាន​ជួប​សន្ទនា​ទ្វេភាគី​ជាមួយ​លោក​រដ្ឋមន្ត្រី​ការ​បរទេស​កម្ពុជា ប្រាក់ សុខុន នៅ​ក្រសួង​ការបរទេស ជាមួយ​លោក​នាយក​រដ្ឋមន្ត្រី ហ៊ុន សែន នៅ​វិមាន​សន្តិភាព ជាមួយ​លោក​ វេង សាខុន នៅ​ក្រសួង​កសិកម្ម ជាមួយ​លោក ប៉ាន់ សូរស័ក្ដិ នៅ​ក្រសួង​ពាណិជ្ជកម្ម ជាមួយ​លោក​តំណាង​រាស្ត្រ សួស យ៉ារ៉ា នៅ​វិមាន​រដ្ឋសភា​និង​ជាមួយ​លោកស្រី ជា សិរី ឧបការី​ទេសាភិបាល​ធនាគារ​កណ្ដាល នៅសារមន្ទីរហិរញ្ញវត្ថុ ព្រះស្រីឦសានវរ្ម័ន ក្បែរវត្តភ្នំផងដែរ។​

លោក Peter Szijjarto ក៏​បាន​ផ្ដល់​បទសម្ភាសន៍​ផ្ដាច់មុខ​មួយ ដល់​ទូរទស្សន៍​ជាតិ​កម្ពុជា​ផង​ដែរ ដែល​តាម​រយៈ​ខ្លឹម​សារ​នៃ​កិច្ចសម្ភាសន៍​នោះ ទំនង​ជា​ត្រូវ​បាន​ធ្វើ​នៅ​ថ្ងៃ​អង្គារ​នោះ​តែម្ដង។

ក្នុង​ពិធី​ជំនួប​នីមួយៗ គេ​ពុំ​ឃើញ​លោក Peter Szijjarto ពាក់​ម៉ាស់​នោះ​ទេ ហើយ​មាន​ការ​ចូលរួម​ពី​មន្ត្រី​អ្នក​មុខ​អ្នកការ និង​អ្នក​សារព័ត៌មាន​ជាច្រើន​នាក់។​

​លោកនាយក​រដ្ឋមន្ត្រី ហ៊ុន សែន បាន​ប្រកាស​នៅ​ល្ងាច​ថ្ងៃពុធ​នេះថា រូប​លោក លោកជំទាវ ប៊ុន រ៉ានី ជា​ភរិយា អ្នកបើកបរ ក្រុមអង្គរក្ស សរុប១៨នាក់ នៅ​គេហដ្ឋាន​របស់​លោក បាន​ធ្វើ​តេស្ដ​រក​មេរោគ​កូវីដ១៩ នៅថ្ងៃនេះ ហើយ​ទទួល​បាន​លទ្ធផល​អវិជ្ជមាន គឺ​ពុំ​រក​ឃើញ​វីរុស​នៅ​ឡើយ។

ព្រម​ពេល​ជាមួយ​គ្នា លោក ហ៊ុន សែន បាន​ប្រកាស​ធ្វើ​ចត្តាឡីស័ក​នៅ​គេហដ្ឋាន​របស់​លោក​មួយ​រយៈកាល ដោយ​លុបចោល​ការ​ចូលរួម​កម្មវិធី​ធំៗ​នៅ​ខែ​នេះ ដូច​យ៉ាង​កិច្ចប្រជុំ​កំពូល​អាស៊ាន ពិធី​បុណ្យ​ឯករាជ្យ​ជាតិ ជាដើម។

លោក វេង សាខុន រដ្ឋមន្ត្រី​ក្រសួង​កសិកម្ម បាន​ប្រាប់​VOA​ដែរ​ថា លោក​ត្រូវ​ត្រឡប់​មក​ពី​បេសកកម្ម​ពី​ខេត្ត​ពោធិ៍សាត់​វិញ ជា​ប្រញាប់​នៅ​ថ្ងៃ​ពុធ​នេះ ក្រោយ​ទទួលបាន​ព័ត៌មាន​ពី​មន្ត្រី​ជំនាញ អំពី​ករណី​លោក Peter Szijjarto ឆ្លង​កូវីដ​១៩។

«ខ្ញុំ​យល់​ថា គ្រាន់​តែ​ដឹង​ឮ​ប៉ុណ្ណឹង ប្រាប់​មក​ខ្ញុំ តែ​អ្វី​ដែល​យើង​ត្រូវ​យល់​ដឹង គឺ​យើង​ត្រូវ​ធ្វើ​ខ្លួន​ឯង​នោះ​ណា»។

លោក កុយ គួង អ្នកនាំពាក្យ​ក្រសួង​ការបរទេស​កម្ពុជា បាន​ប្រាប់​សារព័ត៌មាន​ស៊ីស៊ីថាមស៍​ក្នុង​ប្រទេស​កម្ពុជា​ថា លោក ប្រាក់ សុខុន បាន​តម្រូវ​ឱ្យ​ក្រុម​គ្រូពេទ្យ​ធ្វើ​តេស្ដ​រក​មេរោគ​កូវីដ១៩ លើ​គ្រប់​មន្ត្រី​ទាំងអស់​ដែល​មាន​ប្រាស្រ័យ​ទាក់ទង​នឹង​លោក Peter Szijjarto អំឡុង​ពេល​លោក​ស្ថិត​នៅ​ក្នុង​ទីក្រុង​ភ្នំពេញ។​

លោក កុយ គួង ខ្លួន​លោក​ផ្ទាល់​ក៏​បាន​ចូលរួម​ជំនួប​រវាង​លោក​រដ្ឋមន្ត្រី​ការបរទេស​ហុងគ្រី ជាមួយ​លោក ប្រាក់ សុខុន ដែរ កាល​ពីថ្ងៃ​ម្សិលមិញ ជាមួយ​មន្ត្រី​អ្នក​មុខ​អ្នក​ការ​ផ្សេងទៀត។

មិន​មាន​របាយការណ៍​បញ្ជាក់​ច្បាស់​ឡើយ​ថា​មាន​មន្ត្រី​ប៉ុន្មាន​នាក់ ដែល​ត្រូវ​បាន​ធ្វើតេស្ដ និង​ក៏​ដូចជា​លទ្ធផល​តេស្ដ។

គិត​ត្រឹម​ព្រឹក​ថ្ងៃ​ពុធ កម្ពុជា​មាន​កំណត់​ត្រា​អ្នក​ឆ្លង​ជំងឺ​កូវីដ១៩ ចំនួន​២៩២​ករណី ដោយ​ក្នុង​នោះ​មាន​៩នាក់​កំពុង​សម្រាក​ព្យាបាល ហើយ​ពុំ​មាន​ករណី​ស្លាប់​នោះ​ទេ។​

គួរ​បញ្ជាក់ថា​លោក ​Peter Szijjarto រដ្ឋមន្ត្រី​ការបរទេស​ហុងគ្រី ជា​ឥស្សរជន​បរទេស​ទី​បី​ហើយ​ដែល​មក​បំពេញ​ទស្សនកិច្ច​នៅ​កម្ពុជា​អំឡុង​ការរាតត្បាត​ជំងឺ​កូវីដ១៩​នេះ​បន្ទាប់​ពី​លោក Toshimitsu Motegi រដ្ឋមន្ត្រី​ការបរទេស​ជប៉ុន បានមក​បំពេញ​ទស្សនកិច្ច កាល​ពីខែ​សីហា និង​លោក Wang Yi រដ្ឋមន្ត្រី​ការ​បរទេស​ចិន កាលពីខែ​តុលា​កន្លង​ទៅ៕

(អត្ថបទនេះត្រូវបានកែសម្រួលធ្វើបច្ចុប្បន្នភាពនៅម៉ោង ២០:០០ ដោយដាក់បញ្ចូលបន្ថែម ខ្លឹមសារនៃការថ្លែងរបស់លោក ហ៊ុន សែន)

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG