លោកនាយករដ្ឋមន្ត្រី ហ៊ុន សែន បានផ្ញើលិខិតមួយច្បាប់ ជូនពរប្រធានាធិបតីសហរដ្ឋអាមេរិកលោក Donald Trump និងអ្នកស្រី Melania Trump ដែលជាភរិយា ឲ្យឆាប់ជាសះស្បើយ ក្រោយពីអ្នកទាំងពីរបានឆ្លងជំងឺកូវីដ១៩។ នេះបើយោងតាមលិខិតមួយច្បាប់ជាភាសាអង់គ្លេសដែលមានចុះហត្ថលេខារបស់លោក ហ៊ុន សែន ដែល VOA ទទួលបាននៅថ្ងៃអាទិត្យនេះ។
នៅក្នុងលិខិតចុះថ្ងៃទី ៣ ខែតុលានោះ លោកនាយករដ្ឋមន្ត្រី ហ៊ុន សែន បានបញ្ជាក់ថា៖ «ខ្ញុំ និងភរិយាមានសេចក្ដីសោកសៅនៅពេលដែលដឹងថា លោកប្រធានាធិបតី និងភរិយាធ្វើតេស្តឃើញមានឆ្លងជំងឺកូវីដ១៩ ស្របពេលដែលសហរដ្ឋអាមេរិក និងពិភពលោកកំពុងតែប្រយុទ្ធប្រឆាំងនឹងជំងឺថ្មីនេះ និងកំពុងតែដោះស្រាយផលប៉ះពាល់ធ្ងន់ធ្ងរនៃជំងឺនេះលើសេដ្ឋកិច្ច និងជីវភាពរស់នៅរបស់ប្រជាពលរដ្ឋ»។
លោកនាយករដ្ឋមន្ត្រី ហ៊ុន សែន បាននិយាយបន្ថែមទៀតនៅក្នុងលិខិតនោះថា៖ «ខ្ញុំ និងភរិយាសូមជូនពរឲ្យលោកប្រធានាធិបតី និងភរិយា ឆាប់ជាសះស្បើយ និងមានសុខភាពល្អ»។
លោកប្រធានាធិបតី Donald Trump និងអ្នកស្រី Melania Trump ដែលជាភរិយា បានពិនិត្យឃើញថា មានជំងឺកូវីដ១៩ កាលពីថ្ងៃសុក្រ។ ពេលនេះ លោក Trump កំពុងទទួលការព្យាបាលនៅមន្ទីរពេទ្យយោធា Walter Reed ក្នុងរដ្ឋ Maryland ដែលស្ថិតនៅជាយរដ្ឋធានីវ៉ាស៊ីនតោន។ ចំណែកឯអ្នកស្រី Melania Trump មិនត្រូវបានតម្រូវឲ្យទទួលការព្យាបាលនៅមន្ទីរពេទ្យទេ ដោយគ្រាន់តែនៅដាច់ដោយឡែកតែឯងនៅឯសេតវិមានតែប៉ុណ្ណោះ។
លោក Trump បានបង្ហោះសារមួយលើបណ្ដាញសង្គម Twitter កាលពីល្ងាចថ្ងៃសៅរ៍ ថា លោក«បានធូរស្បើយជាងមុន» ហើយលោកសង្ឃឹមថា «នឹងត្រឡប់ទៅវិញឆាប់ៗ»។
ក្រោយមក វេជ្ជបណ្ឌិតរបស់លោក Trump គឺលោក Sean Conley បានបង្ហាញសុទិដ្ឋិនិយមដោយប្រយ័ត្នប្រយែងចំពោះការព្យាបាលលោក Trump ប៉ុន្តែបានបន្ថែមថា លោក Trump «នៅមិនទាន់ឆ្លងផុតគ្រោះថ្នាក់នៅឡើយទេ»។
ក្រោយពីឮដំណឹងថា លោក Trump បានឆ្លងជំងឺកូវីដ១៩ មក មេដឹកនាំនានានៅលើពិភពលោក ដែលក្នុងនោះមានទាំងប្រធានាធិបតីចិនលោក Xi Jinping ប្រធានាធិបតីរុស្ស៊ីលោក Vladimir Putin និងមេដឹកនាំកូរ៉េខាងជើងលោក Kim Jong Un ផងដែរ បានផ្ញើសារជូនពរលោក Trump ឲ្យឆាប់ជាសះស្បើយ៕
