លោកនាយករដ្ឋមន្រ្តី ហ៊ុន សែន ប្រធានគណបក្សប្រជាជនកម្ពុជាដែលជាគណបក្សដឹកនាំប្រទេសជាង៤០ឆ្នាំ នឹងចេញដឹកនាំក្បួនដង្ហែឃោសនារកសំឡេងឆ្នោតថ្ងៃចុងក្រោយ មុននឹងឈានដល់ការបោះឆ្នោត ដោយគ្មានគណបក្សសង្គ្រោះជាតិចូលរួម។
បើតាមលិខិតមួយច្បាប់របស់លោក សាយ ឈុំ អនុប្រធានគណបក្សកាន់អំណាចជូនទៅប្រធានគណៈកម្មាធិការគណបក្សរាជធានី-ខេត្ត ចេញនៅថ្ងៃទី១២ ខែកក្កដា ឆ្នាំ២០១៨ នេះបញ្ជាក់ថា លោកនាយករដ្ឋមន្រ្តី ហ៊ុន សែន នឹងចេញដឹកនាំការហែក្បួនឃោសនាបោះឆ្នោតទ្រង់ទ្រាយធំក្នុងរាជធានីភ្នំពេញ នៅថ្ងៃទី២៧ ខែកក្កដា ដែលជាថ្ងៃឃោសនាចុងក្រោយ។
ក្នុងលិខិតអនុប្រធានគណបក្សកាន់អំណាច និងជាប្រធានព្រឹទ្ធសភាដដែលនោះបញ្ជាក់ក្នុងន័យដើមថា៖
«ចាប់ផ្តើមជួបជុំធំនៅមជ្ឈមណ្ឌលសន្និបាតនិងពិព័រណ៍កោះពេជ្រ វេលាម៉ោង៧:០០នាទីព្រឹក ដើម្បីស្តាប់ការថ្លែងសារនយោបាយរបស់សម្តេចប្រធានគណបក្ស មុននឹងចេញហែក្បួន។ នៅថ្ងៃនោះ គណបក្សនឹងជួលប្រព័ន្ធវិទ្យុ និងទូរទស្សន៍ឯកជននានា ដើម្បីធ្វើការផ្សព្វផ្សាយបន្តផ្ទាល់ចាប់ពីម៉ោង៧:០០ព្រឹកទៅ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាប្រាប់ VOA នារសៀលថ្ងៃសុក្រនេះថា ការចេញដឹកនាំក្បួនឃោសនារកសំឡេងគាំទ្រដោយផ្ទាល់របស់លោកនាយករដ្ឋមន្រ្តី គឺដើម្បីជាការលើកទឹកចិត្តដល់ប្រជាពលរដ្ឋឲ្យទៅចូលរួមបោះឆ្នោត បើទោះជាអវត្តមានគណបក្សប្រឆាំងក្តី។
លោកបញ្ជាក់ថា៖
«សបញ្ជាក់ឲ្យឃើញថា ទោះបីអវត្តមានអតីតបក្សប្រឆាំង ឬមួយក៏អវត្តមានរបស់អតីតមេដឹកនាំអតីតបក្សប្រឆាំងយ៉ាងណាក៏ដោយ ក៏សកម្មភាពរបស់គណបក្សប្រជាជន ក៏ដូចជាគណបក្សដទៃទាំង២០ ដែលប្រកួតប្រជែងលើទីលានប្រជាធិបតេយ្យ នៅតែសស្រាក់សស្រាំ គគ្រឹកគ្រេង ទៅតាមលក្ខណៈជាក់ស្តែង និងលទ្ធភាពជាក់ស្តែងរបស់ខ្លួននៃគណបក្សនីមួយៗដែរ មិនមែនស្លាប់ដោយសារតែអវត្តមាននៃអតីតបក្សប្រឆាំងនោះទេ»។
អ្នកនាំពាក្យគណបក្សកាន់អំណាចរូបនេះបន្ថែមថា យុទ្ធនាការដង្ហែក្បួនឃោសនារកសំឡេងឆ្នោតរបស់គណបក្សប្រជាជនកម្ពុជា នៅថ្ងៃទី២៧ ខែកក្កដា ដែលជាថ្ងៃយុទ្ធនាការចុងក្រោយនេះ នឹងមានអ្នកចូលរួមចន្លោះពី៦ម៉ឺន ទៅ១០ម៉ឺននាក់។
នេះជាលើកទី២ហើយសម្រាប់លោកនាយករដ្ឋមន្រ្តី ហ៊ុន សែន ដែលកាន់អំណាចជាង៣០ឆ្នាំ ក្នុងការចេញមុខដឹកនាំក្បួនដង្ហែឃោសនារកសំឡេងគាំទ្រដោយផ្ទាល់។
កាលពីយុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំ-សង្កាត់នាឆ្នាំ២០១៧កន្លងទៅ លោក ហ៊ុន សែន បានចេញដឹកនាំក្បួនដោយផ្ទាល់ជាលើកដំបូងខណៈគណបក្សសង្គ្រោះជាតិដែលដឹកនាំដោយលោក សម រង្ស៊ី និងលោក កឹម សុខា នាពេលនោះទទួលបានការគាំទ្រខ្លាំង និងជាគណបក្សប្រឆាំងដ៏ធំតែមួយគត់ក្នុងការប្រកួតប្រជែងយ៉ាងប្រកៀកប្រកិតជាមួយគណបក្សកាន់អំណាច។
ក្នុងការបោះឆ្នោតជ្រើសតាំងក្រុមប្រឹក្សាឃុំសង្កាត់កាលពីឆ្នាំ២០១៧ គណបក្សសង្គ្រោះជាតិទទួលបានកៅអីតំណាងរាស្រ្តក្នុងរដ្ឋសភាចំនួន៥៥ និងគ្រប់គ្រងក្រុមប្រឹក្សាឃុំសង្កាត់នៅទូទាំងប្រទេសចំនួនជាង៥ពាន់។
ក្រោយការចូលរួមដឹកនាំរដ្ឋាភិបាលបានតែប៉ុន្មានខែ គណបក្សសង្គ្រោះជាតិដែលមានអ្នកគាំទ្រជាង៤០ភាគរយនៅទូទាំងប្រទេស ត្រូវបានតុលាការកំពូលរំលាយដោយចោទថា គណបក្សនេះបានឃុបឃិតជាមួយបរទេសរៀបចំគម្រោងផ្តួលរំលំរដ្ឋាភិបាលរបស់គណបក្សកាន់អំណាច។
ចំណែកមន្រ្តីជាន់ខ្ពស់និងតំណាងរាស្រ្តគណបក្សសង្គ្រោះជាតិចំនួន១១៨នាក់ត្រូវបានព្យួរសិទ្ធិមិនឲ្យធ្វើនយោបាយម្នាក់ៗចំនួន៥ឆ្នាំ ស្របពេលដែលលោក កឹម សុខា ប្រធានគណបក្សនេះ ត្រូវបានចាប់ខ្លួនទៅឃុំក្នុងពន្ធនាគារត្រពាំងផ្លុង ចំណែកលោក សម រង្ស៊ី ដែលជាមេដឹកនាំមួយរូបទៀត បាននិរទេសខ្លួនទៅរស់នៅឯបរទេស។កម្ពុជានឹងរៀបចំការបោះឆ្នោតជ្រើសតាំងតំណាងរាស្រ្តអាណត្តិទី៦ នៅថ្ងៃទី២៩ ខែកក្កដា ឆ្នាំ២០១៨ ដោយមិនមានវត្តមានរបស់គណបក្សសង្គ្រោះជាតិ ស្របពេលដែលស្ថាប័នជាតិនិងអន្តរជាតិធំៗមួយចំនួនយល់ឃើញថា ការបោះឆ្នោតខាងមុខនេះ ជាការបោះឆ្នោតដែលមិនមានភាពសេរីនិងយុត្តិធម៌។
សហរដ្ឋអាមេរិកនិងសហភាពអឺរ៉ុបបានប្រកាសដកខ្លួនឈប់គាំទ្រការបោះឆ្នោតនៅកម្ពុជាដោយថា ការបោះឆ្នោតខាងមុខនេះជាការបោះឆ្នោតដែលមិនមានភាពស្របច្បាប់។
មុនការបោះឆ្នោតជាតិថ្ងៃទី២៩ ខែកក្កដា ឈានចូលមកដល់ គេឃើញពលរដ្ឋកម្ពុជា មួយចំនួននៅមានមន្ទិលក្នុងការចូលរួម ឬមិនចូលរួមក្នុងការបោះឆ្នោតនៅឡើយ។គណបក្សកាន់អំណាចរបស់លោក ហ៊ុន សែន បាននិងកំពុងព្យាយាមគៀងគរឲ្យមានការចូលរួមពីពលរដ្ឋខ្មែរ ខណៈមន្ត្រីបក្សសង្គ្រោះជាតិដែលនិរទេសខ្លួនឯក្រៅប្រទេសបន្តធ្វើយុទ្ធនាការប្រឆាំងនឹងការបោះឆ្នោតដែលពួកគេអះអាងថាជា «ការបោះឆ្នោតក្លែងក្លាយ»ដើម្បីតែរក្សាអំណាចរបស់លោក ហ៊ុន សែន។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប.)ប្រាប់ VOA ថា នៅថ្ងៃទី២៧ ខែកក្កដានេះ នឹងមានគណបក្សនយោបាយចំនួន១៧ក្នុងចំណោម២០ចូលរួមដង្ហែក្បួនឃោសនារកសំឡេងគាំទ្រទ្រង់ទ្រាយធំ។ លោកបន្ថែមថា សម្រាប់យុទ្ធនាការឃោសនាការបោះឆ្នោតដែលបានចាប់ផ្តើមតាំងពីថ្ងៃទី៧ ខែកក្កដាមក មានភាពមិនប្រក្រតីចំនួន៥នៅទូទាំងប្រទេស។ ទោះយ៉ាងណា លោកថា ក្រុមការងាររបស់ គ.ជ.ប. បានដោះស្រាយបណ្តឹងនៃភាពមិនប្រក្រតីទាំងនោះរួចរាល់ហើយ។
លោកបញ្ជាក់ថា៖
«២ករណី អាជ្ញាធរ២ឃុំសង្កាត់ដែលលោកប្តឹងទៅគណបក្សមួយធ្វើសកម្មភាពសាធារណៈដោយមិនសុំច្បាប់ទៅអាជ្ញាធរ។ មានករណីគប់ដុំថ្មទៅលើឧបករណ៍បំពងសំឡេងរបស់គណបក្សនយោបាយមួយ។ មានករណីប្តឹងពីគណបក្សនយោបាយមួយចោទប្រកាន់ទៅលើសកម្មជនហែក្បួនម្នាក់ ដែលពាក់អាវរបស់គណបក្សហ្នឹងយកថវិកាទៅចូលបុណ្យសពរបស់ប្រជាពលរដ្ឋជាដើម»។
ថ្មីៗនេះ គេឃើញមានរថយន្តពាក់ស្លាកលេខនគរបាលនិងខេមរភូមិន្ទបិទស្លាកសញ្ញាគណបក្សប្រជាជនកម្ពុជា ក្នុងអំឡុងពេលនៃការឃោសនាបោះឆ្នោតផងដែរ។ ទោះយ៉ាងណាលោក ហង្ស ពុទ្ធា បញ្ជាក់ថា គ.ជ.ប. នឹងចាត់វិធានការលើករណីទាំងនោះលុះត្រាតែមានបណ្តឹងប៉ុណ្ណោះ៕
