ភ្ជាប់​ទៅ​គេហទំព័រ​ទាក់ទង

លោក​ ​ហ៊ុន សែន​ ​នឹង​ចូលរួម​ពិធី​ថ្វាយ​ព្រះភ្លើង​ដល់​អតីត​ព្រះ​មហាក្សត្រ​ថៃ​ ​ភូមិបុល អាឌុលយ៉ាតេជ

  • នៅ វណ្ណារិន

ប្រជា​ពលរដ្ឋ​តំរង់​ជួរ ដើម្បី​ថ្វាយ​ការគោរព​ដល់​អតីត​ព្រះ​មហាក្សត្រ​ថៃ ភូមិបុល អាឌុលយ៉ាតេជ (Bhumibol Adulyadej) នៅ​​ក្បែរ​ព្រះបរមរាជវាំង ក្នុង​រាជធានី​បាងកក នៅ​ថ្ងៃ​ទី ២៤ ខែកញ្ញា ឆ្នាំ២០១៧។

លោក​ ​ហ៊ុន សែន​ ​នឹង​ចូលរួម​ពិធី​ថ្វាយ​ព្រះភ្លើង​ដល់​អតីត​ព្រះ​មហា​ក្សត្រ​ថៃ​ ​ភូមិបុល អាឌុលយ៉ាតេជ ​(Bhumibol Adulyadej)​ ​ដែល​គ្រោង​ធ្វើ​ឡើង​នៅ​ថ្ងៃ​ព្រហស្បតិ៍​ ​នៅ​ទីក្រុង​បាងកក។

លោក​នាយក​រដ្ឋមន្ត្រី​ ​ហ៊ុន សែន​ ​នឹង​ដឹកនាំ​មន្ត្រី​សំខាន់ៗ​មួយ​ចំនួន​របស់​លោក​ទៅ​ចូលរួម​ពិធី​ថ្វាយ​ព្រះភ្លើង​ដល់​អតីត​ព្រះ​មហា​ក្សត្រ​ថៃ​ភូមិបុល អាឌុលយ៉ាតេជ​ ​(Bhumibol Adulyadej)​ ​ដែល​គ្រោង​ធ្វើ​ឡើង​នៅ​ថ្ងៃ​ព្រហស្បតិ៍​ ​នៅ​ទីក្រុង​បាងកក។​ ​នេះ​បើ​តាម​សេចក្តី​ប្រកាស​ព័ត៌មាន​របស់​ក្រសួង​ការ​បរទេស​ខ្មែរ​ដែល​ចេញផ្សាយ​កាលពី​ថ្ងៃអង្គារ។​

រូបឯកសារ៖ លោក​នាយករដ្ឋមន្ត្រី​ ហ៊ុន សែន​ ថ្លែងនៅក្នុង​កម្មវិធី​ប្រារព្ធ​ទិវា​ពិភពលោក​កាកបាទ​ក្រហម​ អឌ្ឍចន្ទ​ក្រហម ​៨​ ឧសភា លើក​ទី​១៥៤​នៅ​ស្នាក់ការ​របស់​កាកបាទ​ក្រហម​កម្ពុជា នៅ​រាជធានី​ភ្នំពេញ កាលពី​ថ្ងៃទី៨ ខែឧសភា ឆ្នាំ២០១៧។ (រូបថត​ដក​ស្រង់​ចេញ​ពី​ហ្វេសប៊ុក​របស់ Samdech Hun Sen, Cambodian Prime Minister)
រូបឯកសារ៖ លោក​នាយករដ្ឋមន្ត្រី​ ហ៊ុន សែន​ ថ្លែងនៅក្នុង​កម្មវិធី​ប្រារព្ធ​ទិវា​ពិភពលោក​កាកបាទ​ក្រហម​ អឌ្ឍចន្ទ​ក្រហម ​៨​ ឧសភា លើក​ទី​១៥៤​នៅ​ស្នាក់ការ​របស់​កាកបាទ​ក្រហម​កម្ពុជា នៅ​រាជធានី​ភ្នំពេញ កាលពី​ថ្ងៃទី៨ ខែឧសភា ឆ្នាំ២០១៧។ (រូបថត​ដក​ស្រង់​ចេញ​ពី​ហ្វេសប៊ុក​របស់ Samdech Hun Sen, Cambodian Prime Minister)

សេចក្តី​ប្រកាស​ព័ត៌មាន​នេះ​ឱ្យ​ដឹង​ផង​ដែរ​ថា​ ​ការចូល​រួម​របស់​គណៈ​ប្រតិភូជាន់​ខ្ពស់​នៃ​ប្រទេស​កម្ពុជា​ ​រួម​មាន​លោក​ ​ទៀ បាញ់​ ​រដ្ឋ​មន្ត្រី​ការពារ​ជាតិ​កម្ពុជា​ផង​នោះ​ «គឺ​ដើម្បី​សម្តែង​នូវ​សមាន​ចិត្ត​និង​ចូលរួម​មរណទុក្ខ​ដ៏​ស្មោះស្ម័គ្រ​ថ្វាយ​ និង​ជូន​ចំពោះ​រាជ​វង្សានុវង្ស​ ​រាជរដ្ឋាភិបាល​ និង​ប្រជាជនថៃ​ ព្រមទាំង​សម្តែង​ការគោរព​ចុងក្រោយ​ចំពោះ​ព្រះ​វិញ្ញាណ​ក្ខន្ធ​អតីត​ព្រះ​មហា​ក្សត្រ​ថៃ»។​

យ៉ាង​ហោច​ណាស់​ ​គេ​រំពឹង​ថា​ មាន​ពល​រដ្ឋ​ថៃ​ប្រមាណ​២៥​ម៉ឺន​នាក់​ ​និង​ប្រមុខ​រដ្ឋ​នៃ​ប្រទេស​ជា​ច្រើន​ក្នុង​តំបន់​ នឹងចូលរួម​ក្នុង​ពិធី​ជូន​ដំណើរ​ចុង​ក្រោយ​សម្រាប់​អតីត​ព្រះ​មហា​ក្សត្រ​ថៃ ​ភូមិបុល អាឌុលយ៉ាតេជ​ ​(Bhumibol Adulyadej)​ ​ដែល​នឹង​ធ្វើឡើង​នៅថ្ងៃ​ព្រហស្បតិ៍។​ ​អតីព្រះ​មហា​ក្សត្រ​ថៃ ​ភូមិបុល អាឌុលយ៉ាតេជ​ ​ឬ​ Rama IX​ ​ដែល​បាន​សោយរាជ្យ​សម្បត្តិ​យូរ​ជាង​គេ​បង្អស់​ក្នុង​ប្រវត្តិសាស្ត្រ​ថៃ​ដល់​ទៅ​៧០​ឆ្នាំ​ ​បាន​សោយ​ទិវង្គត​កាលពី​ថ្ងៃទី​១៣​ ខែ​តុលា​ ​ឆ្នាំមុន៕

XS
SM
MD
LG