នាយករដ្ឋមន្ត្រីកម្ពុជាលោក ហ៊ុន សែន នៅថ្ងៃអង្គារនេះ បានគំរាមកាត់ផ្ដាច់ការផ្គត់ផ្គង់អគ្គិសនីនៅតាមផ្ទះរបស់អ្នករិះគន់រដ្ឋាភិបាល ដែលបានលើកហេតុផលផ្សេងៗចំពោះការផ្អាកការផ្គត់ផ្គង់អគ្គិសនីប្រចាំថ្ងៃចាប់តាំងពីដើមខែមីនាមក។
ថ្លែងក្នុងពិធីសម្ពោធដាក់ឱ្យដំណើរការជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត ដែលជាជំនួយរបស់ជប៉ុន លោកនាយករដ្ឋមន្ត្រី ហ៊ុន សែន បានបង្ហាញការមិនពេញចិត្តចំពោះក្រុមអ្នកវិភាគដែលបានរិះគន់លើការផ្អាកការផ្គត់ផ្គង់អគ្គិសនី ដោយសារតែភាពរាំងស្ងួតនិងខ្វះទឹកក្នុងទំនប់អគ្គិសនី។
ដោយមិនបញ្ចេញចំឈ្មោះអ្នករិះគន់នោះ លោក ហ៊ុន សែន បានបញ្ជាឱ្យមន្ត្រីលោកកាត់ផ្ដាច់ការផ្គត់ផ្គង់អគ្គិសនីដល់លំនៅស្ថានអ្នកទំាងនោះ។
ថ្លែងនៅចំពោះមុខពលរដ្ឋក្នុងខេត្តកំពត និងឯកអគ្គរាជទូតជប៉ុន លោក ហ៊ុន សែន ព្រមានយ៉ាងដូច្នេះ៖
«មើលអាអ្នកវិភាគហ្នឹង ទៅកាត់ភ្លើងអាផ្ទះហ្នឹងហ្មងមើល ដើម្បីឲ្យហ្អែងដឹងថា វាខ្វះអគ្គិសនីមិនមែនយកហេតុផលដើម្បីនឹងធ្វើវារីអគ្គិសនី។ វាថាយើងហ្នឹង ធ្វើឲ្យដាច់ភ្លើង ដើម្បីបង្កើតលេសបង្កើតវារីអគ្គិសនី។ ចង្រៃ វាដូចហួសហេតុពេក វាអយុត្តិធម៌»។
ការគំរាមនេះ បានធ្វើឡើង បន្ទាប់ពីមានមតិរិះគន់មួយចំនួនចំពោះការផ្ដាច់ថាមពលអគ្គិសនីសម្រាប់ប្រើប្រាស់ប្រចាំថ្ងៃ និងការចោទប្រកាន់រដ្ឋាភិបាលរបស់លោក ហ៊ុន សែន ថាបានកាត់ផ្ដាច់ថាមពលដ៏សំខាន់មួយនេះ ដើម្បីយកលេសសាងសង់វារីអគ្គិសនីបន្ថែម ដើម្បីផ្គត់ផ្គង់ការប្រើប្រាស់ដ៏ច្រើនសន្ធឹកសន្ធាប់។
លោកនាយករដ្ឋមន្ត្រី ហ៊ុន សែន បានបន្តថា៖
«បើទោះបីទៅវិនិយោគធ្វើវារីអគ្គិសនីកន្លែងណា ក៏គ្មានកន្លែងធ្វើតទៅទៀតដែរ។ សូម្បីតែធ្វើលើក្បាលដែលមានទឹកហុងចេញនេះ វាខ្វះទាំងទឹកទៅទៀត ចុះអាណាទៅធ្វើលើគោក។ ឲ្យវាចេះខ្លះផង វាចង្រៃសព្វចង្រៃគ្រប់ ពួកអ្ហានេះចង្រៃមែនហ្មង»។
VOA មិនអាចទាក់ទងលោក កែវ រតនៈ ដែលជាអគ្គនាយកអគ្គិសនីកម្ពុជា ដើម្បីសុំការអធិប្បាយបានទេនៅល្ងាចថ្ងៃអង្គារនេះ។
ទោះជាយ៉ាងណាក៏ដោយ លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ប្រាប់ VOA កាលពីរសៀលថ្ងៃអង្គារនេះ ទាក់ទងនឹងការព្រមានរបស់លោក ហ៊ុន សែន ថា រដ្ឋាភិបាលគួរតែធ្វើការឆ្លើយតបបែបបច្ចេកទេស ជាជាងធ្វើការព្រមានជាសាធារណៈ។
លោកបាននិយាយថា៖
«រដ្ឋាភិបាលមានសិទ្ធិគ្រប់គ្រាន់ក្នុងការឆ្លើយតបទៅវិញ ក៏ប៉ុន្តែយើងចង់បានការឆ្លើយតបដែលមានលក្ខណៈជាបច្ចេកទេស ជាការបដិសេធចោលទៅនឹងការលើកឡើង ជាជាងការព្រមានធ្ងន់ៗ ដូចជាការផ្ដាច់ភ្លើងទៅដល់លំនៅឋានរបស់អ្នកវិភាគជាដើម។ រឿងបែបនេះ មិនគួរកើតមានទេ ព្រោះអីតួអង្គទាំងអស់សុទ្ធតែជាតួអង្គដែលមានចំណែកនៅក្នុងសង្គម»។
តាំងពីពាក់កណ្ដាលខែមីនាមក រដ្ឋាភិបាលកម្ពុជាបានកាត់ផ្ដាច់ចរន្តអគ្គិសនី ៦ម៉ោងជារៀងរាល់ថ្ងៃ ដែលលើកលែងតែថ្ងៃអាទិត្យនិងថ្ងៃបុណ្យជាតិប៉ុណ្ណោះ ដើម្បីសន្សំសំចៃថាមពលអគ្គិសនីដែលកំពុងមានកង្វះខាតនៅក្នុងដើមឆ្នាំ ២០១៩ នេះ ដែលរដ្ឋាភិបាលបានដាក់ការបន្ទោសទៅលើកំណើននៃការប្រើប្រាស់ថាមពលយ៉ាងគំហុកក្នុងវិស័យសំណង់អាគារនានា ដែលទាញយកថាមពលអគ្គិសនីដ៏ច្រើននិងគ្រោះរាំងស្ងួត។
តាមសេចក្ដីប្រកាសព័ត៌មានរបស់អគ្គិសនីកម្ពុជា ការផ្ដាច់ចរន្តថាមពលអគ្គិសនីនឹងបន្តរហូតដល់ចុងខែឧសភា លើកលែងតែមានភ្លៀងធ្លាក់មុនចុងខែឧសភាប៉ុណ្ណោះទើបការផ្គត់ផ្គង់ត្រឡប់មកប្រក្រតីវិញ៕
