ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ​ហ៊ុន សែន ​ប្រាប់​រដ្ឋមន្រ្តី​អាស៊ាន​ថា​​ កម្ពុជា​​បន្ត​ជំរុញ​ការ​ប្រើប្រាស់​ថាមពល​កកើត​ឡើង​វិញ ​


លោក​នាយក​រដ្ឋ​មន្ត្រី ​ហ៊ុន សែន ថ្លែង​នៅ​ក្នុង​កិច្ច​ប្រជុំ​រដ្ឋ​មន្ត្រី​ថាមពល​អាស៊ាន​លើក​ទី​៤០​ និង​កិច្ច​ប្រជុំ​ពាក់​ព័ន្ធ​រួម​ទាំង​វេទិកា​ធុរកិច្ច​ថាមពល​អាស៊ាន​ឆ្នាំ​២០២២​ កាល​ពី​ថ្ងៃ​ទី​១៥ ខែ​កញ្ញា ឆ្នាំ​២០២២។ (Facebook/Samdech Hun Sen, Cambodian Prime Minister)

លោក​នាយក​រដ្ឋ​មន្ត្រី ​ហ៊ុន សែន ​បាន​បង្ហាញ​ការ​ប្តេជ្ញា​ទៅ​កាន់រដ្ឋ​មន្ត្រី​ថាមពលអាស៊ាន​ នៅ​ថ្ងៃ​ព្រហ​ស្បតិ៍​នេះ​ថា​ កម្ពុជានឹង​ព្យាយាម​ជំរុញ​លើ​ការ​ប្រើ​ប្រាស់​ថាមពល​កកើត​ឡើង​វិញ ​និង​កាត់​បន្ថយ​ការ​អភិវឌ្ឍ​គម្រោង​ថាមពល​ដែល​ប្រើ​ប្រាស់​ឥន្ធនៈ​ហ្វូស៊ីល ​ដែល​ទាញ​យក​ថាមពល​ពី​ការ​ដុត​ធ្យូង​ថ្ម។​

លោក​នាយក​រដ្ឋមន្រ្តី​ថ្លែង​បែប​នេះ​នៅ​ក្នុង​កិច្ច​ប្រជុំ​រដ្ឋ​មន្ត្រី​ថាមពល​អាស៊ាន​លើក​ទី​៤០​ និង​កិច្ច​ប្រជុំ​ពាក់​ព័ន្ធ​រួមទាំង​វេទិកា​ធុរកិច្ច​ថាមពល​អាស៊ាន​ឆ្នាំ​២០២២​ ដែល​កម្ពុជា​ជា​ប្រធាន​អាស៊ាន។​

លោក ​ហ៊ុន សែន ​ថ្លែង​ថា ការ​កើន​ឡើង​នូវ​តម្រូវ​ការថាមពល ​និង​អស្ថិរ​ភាព​តម្លៃ​ប្រេង​ឥន្ធនៈ​លើ​ទីផ្សារ​អន្តរ​ជាតិ ​បាន​កំពុង​បង្ក​ឱ្យ​មាន​អតិ​ផរណា​ខ្ពស់ ​បូក​រួម​ការ​រឹត​បន្តឹង​គោល​នយោបាយ​រូបិយ​វត្ថុ​ដោយ​ធនាគារ​កណ្តាល​ និង​ការ​ប្រែ​ប្រួល​អាកាស​ធាតុ ការ​កើន​ឡើង​កម្តៅ​ផែនដី ​និង​គ្រោះ​ធម្ម​ជាតិ ​ដែល​កំពុង​លេច​រូប​រាង​ និង​មាន​ឥទ្ធិ​ពល​កាន់​តែ​ខ្លាំង​ក្នុង​ការ​បង្ក​ឱ្យ​មាន​ការ​ផ្លាស់​ប្តូរ​ពាក់​ព័ន្ធសេដ្ឋ​កិច្ច ​និង​ការ​ធ្លាក់​ចុះ​ដ៏គួរ​ឱ្យ​ព្រួយ​បារម្ភ​នៃ​សង្វាក់​តម្លៃ ​និង​ផលិត​ភាពសកល។ ​

លោក ​ហ៊ុន សែន​ បន្ត​ថា ​អាស៊ាន​ទាំង​មូល​ត្រូវ​តែ​យក​ចិត្ត​ទុក​ដាក់​លើ​អន្តរ​កាល​ថាមពល​ក្នុង​ការ​ស្តារ ​និង​អភិវឌ្ឍ​សង្គម-សេដ្ឋ​កិច្ច​ឡើង​វិញ។​

ជា​មួយ​គ្នា​នេះ​ លោក​នាយក​រដ្ឋ​មន្ត្រី ​ហ៊ុន សែន ​បញ្ជាក់​ថា​ កម្ពុជា​ដែល​ជា​សមាជិក​អាស៊ាន​នឹង​បន្តយក​ចិត្ត​ទុក​ដាក់​លើ​ការ​ប្រើប្រាស់​ថាមពល​កកើត​ឡើង​វិញ​ឱ្យ​បានកម្រិត​មួយ​ខ្ពស់​បំផុត។​

លោក​ ហ៊ុន សែន ​ថ្លែងនៅ​ថ្ងៃ​ព្រហស្បតិ៍​នេះ​ថា៖​ «សម្រាប់​ទិស​ដៅ​ទៅ​មុខ​ កម្ពុជា​នឹង​បន្ត​ជំរុញ​ការ​យក​ចិត្ត​ទុក​ដាក់​លើ​ការ​អភិវឌ្ឍ​ប្រសិទ្ធ​ភាព​ថាម​ពល ​និង​ថាមពល​កកើត​ឡើង​វិញ​ឱ្យ​បាន​អតិ​បរមា ​និង​ជា​បន្ត​បន្ទាប់​ទៅ​តាម​លទ្ធ​ភាព​ទទួល​បាន​របស់​ប្រព័ន្ធ​ផ្គត់​ផ្គង់​ថាមពល​កម្ពុជា​ជាមួយ​នឹង​ការ​កាត់​បន្ថយ​ការ​អភិវឌ្ឍ​គម្រោង​ប្រភព​ថាមពល​ដែល​ប្រើ​ប្រាស់​ឥន្ធនៈ​ហ្វូស៊ីល​ ដែល​មាន​ធ្យូង​ថ្ម ​និង​ប្រេង​ជា​ដើម»។​

លោក ​ហ៊ុន សែន ​បន្ថែម​ថា ​កម្ពុជា​កំពុង​សហ​ការ​ជាមួយ​ដៃ​គូ​អភិវឌ្ឍន៍​នានា​ក្នុង​ការ​សិក្សា ​និង​រៀប​ចំ​ផែន​ការ​មេ​អភិវឌ្ឍន៍​វិស័យ​ថាមពល​កម្ពុជា​រហូត​ដល់ឆ្នាំ​២០៤០​ គោល​នយោបាយ​ជាតិ​ស្តី​ពី​ប្រសិទ្ធ​ភាព​ថាមពល​ ផែន​ទី​បង្ហាញ​ផ្លូវ​ស្តី​ពី​ការ​អភិវឌ្ឍ​អន្តរ​កាល ​ថាមពល​ស្អាត​ឆ្ពោះ​ទៅ​ធ្វើ​តុល្យភាពកាបូន​ និង​គោល​នយោបាយ​អភិវឌ្ឍន៍​ថាមពល​ពន្លឺ​ព្រះ​អាទិត្យ​លើ​ដំបូល​នៅ​កម្ពុជា​ដើម្បី​ឱ្យ​សម្រេច​តាម​ទិស​ដៅដែល​បាន​កំណត់នេះ។​

រូប​ឯកសារ នេះ​ជា​រោងចក្រ​សូឡា​ដើរ​ដោយថាមពលព្រះអាទិត្យ ដែល​អាច​ផ្តល់​ថាមពល​១០មេហ្គាវ៉ាត់​នៅ​ក្នុង​ក្រុង​បាវិត ខេត្ត​ស្វាយរៀង កាល​ពី​ថ្ងៃ​ទី​១៧ ខែ​មិថុនា ឆ្នាំ២០១៧។ (ស៊ុន ណារិន/VOA)
រូប​ឯកសារ នេះ​ជា​រោងចក្រ​សូឡា​ដើរ​ដោយថាមពលព្រះអាទិត្យ ដែល​អាច​ផ្តល់​ថាមពល​១០មេហ្គាវ៉ាត់​នៅ​ក្នុង​ក្រុង​បាវិត ខេត្ត​ស្វាយរៀង កាល​ពី​ថ្ងៃ​ទី​១៧ ខែ​មិថុនា ឆ្នាំ២០១៧។ (ស៊ុន ណារិន/VOA)

ក្នុង​ឆ្នាំ​២០២១ ​ថាមពល​ដែល​បាន​មកពី​ប្រភព​ថាម​ពល​កកើតឡើង​វិញ​ រួម​មាន​វារី​អគ្គិសនី​ ថាមពល​ដើរ​ដោយ​ពន្លឺ​ព្រះ​អាទិត្យ​ ​និង​ថាមពល​ជីវ​ម៉ាស់ ​បាន​កើន​ឡើង​ដល់​៤០%​នៃ​ថាម​ពល​សរុប​របស់​កម្ពុជា។​ នេះ​បើ​តាម​លោក​នាយក​រដ្ឋ​មន្ត្រី ​ហ៊ុន សែន។ ​

ប្រទេស​កម្ពុជា​ក៏​មាន​រោងចក្រ​ដុត​ធ្យូង​ថ្ម​មួយ​ចំនួន​ផង​ដែរ ​នៅ​ក្នុង​ខេត្ត​ព្រះ​សីហនុ​ កោះកុង ​និង​ឧត្តរមានជ័យ។​ ក្រោយ​រង​ការ​រិះគន់​ចំពោះ​ការ​បង្កើត​រោងចក្រ​ដុត​ធ្យូង​ថ្មី​ កម្ពុជា​បាន​ប្រកាស​កាលពី​ចុង​ឆ្នាំ​២០២១​ថា ​នឹងមិន​ផ្ដល់​អាជ្ញា​បណ្ណ​ថ្មី​ផ្សេង​ទៀត​ដល់​គម្រោង​អភិវឌ្ឍ​រោងចក្រ​អគ្គិសនី​ដើរ​ដោយ​ធ្យូង​ថ្ម​នោះ​ទេ។ ​កម្ពុជា​ក៏​មាន​ទំនប់​វារី​អគ្គិសនីសេសាន​ក្រោម​២ ​នៅ​ក្នុង​ខេត្ត​ស្ទឹងត្រែង​ផង​ដែរ។​

វីអូអេ​មិន​ទាន់​អាច​សុំ​ការ​បញ្ជាក់​ពីលោក ​ហេង គុណលាង​ អគ្គ​នាយក​នៃអគ្គ​នាយក​ដ្ឋាន​ថាមពល​ ​និង​លោក ​អ៊ិត ប្រាំង​ រដ្ឋ​លេខាធិការ​ក្រសួង​រ៉ែ ​និង​ថាមពល​បាន​នៅ​ឡើយ​ទេ។ ​

លោក ​ហែម ឧត្តម​ អ្នក​ជំនាញ​ឯករាជ្យ​ផ្នែក​បរិស្ថាន កត់​សម្គាល់​ឃើញ​ថា ​ការ​ប្រើប្រាស់ថាម​ពល​របស់​កម្ពុជា​គឺពឹង​ផ្អែកច្រើនលើ​ការ​ប្រើប្រាស់ហ្វូស៊ីល​ ដែល​រួម​មាន​ប្រេង​ឥន្ធនៈ ​និង​ធ្យូង​ថ្ម ដែល​រួម​ចំណែក​ធ្វើ​ឱ្យមាន​ការ​ប្រែប្រួល​អាកាស​ធាតុ​ និង​ប៉ះពាល់​ដល់​បរិស្ថាន​ជាដើម។​

​លោក​យល់​ថា​ ទាំង​ក្រសួង​រ៉ែ ​ក្រសួង​បរិស្ថាន​ ក្រសួង​កសិកម្ម ​ក្រសួង​ធនធាន​ទឹក ​និង​អ្នក​ពាក់​ព័ន្ធ​ផ្សេង​ទៀត ​ត្រូវ​ធ្វើ​ផែន​ការ​ និង​អនុវត្ត​រួម​គ្នា​លើ​ការសិក្សាថាម​ពលកកើត​ឡើង​វិញ ​ដោយ​ត្រូវ​សិក្សា​ពី​ផល​ប៉ះ​ពាល់​បរិស្ថាន​ឱ្យ​បាន​ច្បាស់​លាស់ ​ត្រូវពង្រឹង​យន្ត​ការ​មាន​ស្រាប់​ និង​បង្កើត​យន្ត​ការ​ថ្មី​បន្ថែម​ទៀត ​និងត្រូវ​ស្តាប់​មតិ​យោបល់​ពី​ប្រជា​ពល​រដ្ឋ​មូលដ្ឋាន​ និងអ្នក​ពាក់ព័ន្ធ​ផ្សេង​ទៀត​ជាដើម។

លោក​ថ្លែង​ថា៖ ​«​ឧទាហរ​ណ៍​ផែន​ការ​ថាម​ពល​ រដ្ឋា​ភិបាល​ចង់​ផលិត​ប៉ុន្មាន​ភាគ​រយ​នៃ​ថាម​ពលពី​ទំនប់​ខ្នាត​ធំ ​ពី​ធ្បូង​ថ្មពី​អ្វី​ផ្សេងៗ ​អ៊ីចឹង​ឱ្យ​មាន​ធាតុ​ចូល​ពី​សាធារណ​ជន​ ពី​ Academic មាន​ន័យ​ថា ​អ្នក​សិក្សា​ស្រាវ​ជ្រាវ​ពី​សកល​វិទ្យាល័យ​ផ្សេងៗ​ផង​ដែរ។​ អា​ហ្នឹង​ទើប​បាន​វា​បំពេញ​នូវ​គ្រប់រូប​ភាព​ទាំង​មូល»។ ​

លោក ​ហេង គឹមហុង ​ប្រធាន​កម្មវិធី​ផ្នែក​ស្រាវ​ជ្រាវ ​និង​តស៊ូ​មតិ​នៃ​សមាគម​បណ្ដាញ​យុវជន​កម្ពុជា ​(CYN) ​កត់​សម្គាល់​ឃើញ​ថា​ បច្ចុប្បន្ន​កម្ពុជា​កំពុង​ពឹង​ផ្អែក​យ៉ាង​ខ្លាំង​លើ​ប្រេង​ឥន្ធនៈ​ដែល​នាំ​ចូល​ ដូច្នេះ​កម្ពុជា​គួរ​កំណត់​ទិស​ដៅ​ឈាន​ទៅ​រក​ការប្រើ​ប្រាស់​គោល​នយោបាយ​តុល្យភាព​កាបូន ​និង​ការ​ប្រើ​ប្រាស់​ថាម​ពល​អគ្គិសនី​ឱ្យ​បាន​ច្រើន​ដើម្បី​កាត់​បន្ថយ​ការ​ប្រើ​ប្រាស់​ឥន្ធនៈ។​

លោក​បន្ថែម​ថា ​កម្ពុជា​ក៏​គួរ​តែ​សិក្សា​អំពី​តំបន់​ណា​ដែល​មាន​សក្តានុពល​ដែល​អាច​សាង​សង់​ទំនប់វារី​អគ្គិសនី ​ដោយ​មិន​ធ្វើ​ឱ្យ​ប៉ះ​ពាល់​ខ្លាំង​ដល់​ជីវភាព​ ប្រពៃណី ​ទំនៀម​ទម្លាប់​ពលរដ្ឋ​ក្នុង​តំបន់​ និង​កុំ​ឱ្យ​ប៉ះ​ពាល់​ដល់​ធនធាន​ធម្ម​ជាតិ ​ហើយត្រូវចៀស​វាង​ការ​សាង​សង់​ទំនប់​វារី​អគ្គិសនី​នៅ​តាម​តួ​ទន្លេ​មេគង្គ។​

លោក​ថ្លែង​ថា៖ ​«ជារួម​កម្ពុជា ​គួរ​តែ​យកចិត្ត​ទុក​ដាក់​បន្ថែម​ទៀត​ក្នុង​ការ​សិក្សា​អំពី​លទ្ធ​ភាព​ និង​គោល​នយោបាយ​ផែនការ​រយៈ​ពេ​លខ្លី ​និង​វែង​ដើម្បីទាញ​យក​ថាម​ពលអគ្គិសនី​យក​មក​ប្រើ​ប្រាស់​ជា​ពិសេស​ថាម​ពល​ស្អាត​ និង​ថាម​ពលកកើត​ឡើង​វិញ​ ដែល​ប្រភេទ​ថាម​ពល​កកើត​ឡើង​វិញ​ទាំង​អស់​ហ្នឹង​គួរ​តែ​យក​ ឬ​បង្កើត​ទំនប់​វារី​អគ្គិ​សនី​នៅ​តំបន់​ទាំង​ឡាយ​ណា​ដែល​មិន​ប៉ះ​ពាល់​ធ្ងន់​ធ្ងរ​ទៅ​ដល់​ជីវភាព​ប្រជា​ពល​រដ្ឋ​...»។

​លោក​បន្ត​ថា៖ ​«ប៉ុន្តែ​យ៉ាង​ណា​មិញ ​តួ​ឬ​ដង​ទន្លេ​មេគង្គ​មិន​គួរ​កសាង​ទំនប់​វារី​អគ្គិសនី​នោះ​ទេ ​ព្រោះ​បើ​កសាង​នៅ​តាម​ជួរ ​ឬ​បណ្តោយ​ដង​ទន្លេ​មេគង្គ ​វា​នឹង​ធ្វើ​ឱ្យ​ប៉ះ​ពាល់​ធ្ងន់​ធ្ងរ​ដល់​ប្រជា​ពលរ​ដ្ឋ​រស់​នៅ​ផ្នែក​ខាង​លើ ​ធន​ធាន​មច្ឆា​ជាតិ ​ធនធាន​ធម្ម​ជាតិ ​និង​ប្រជា​ពល​រដ្ឋ​ដែល​មាន​គ្រឹះ​វប្ប​ធម៌ ​និង​ប្រវត្តិ​សាស្រ្ត​ជា​យូរ​លង់​មក​ហើយ​នោះ»។​

លោក​បន្ថែម​ថា រដ្ឋា​ភិបាល​ក៏គួរ​ពង្រីក​វិសាល​ភាព​ក្នុង​ការ​ជំរុញ​ការ​ប្រើ​ប្រាស់ថាម​ពល​ពន្លឺ​ព្រះ​អាទិត្យតាម​រយៈ​ផ្ទាំង​សូឡា​នៅ​តាម​សហ​គ្រាស ​និង​តាម​មូល​ដ្ឋាន​ជា​ដើម ​និង​ត្រូវ​ពិនិត្យ​មើល​លក្ខ​ខណ្ឌបន្ធូរ​បន្ថយ​ ឬ​បញ្ចុះតម្លៃ​ពន្ធនាំ​ចូល​ផ្ទាំង​សូឡានេះ ​ដើម្បី​រួម​ចំណែក​ឱ្យ​មានថាម​ពល​ប្រើ​ប្រាស់​គ្រប់​គ្រាន់ ​ដោយពុំ​ចាំ​បាច់​នាំ​ចូល​ពី​ប្រទេស​ថៃ​ ឡាវ ​និង​វៀត​ណាម​បន្ត​ទៀត៕

XS
SM
MD
LG