ក្នុងសុន្ទរកថានៅពិធីរំឭកខួប២០ឆ្នាំនៃការបង្កើតបញ្ជាការដ្ឋានកងទ័ពជើងគោក លោក ហ៊ុន សែនបាននិយាយថា លោកបញ្ចេញអាថ៌កំបាំងមួយដែលថា ត្រូវចាប់ខ្លួនដោយក្រុមដែលមិនទទួលស្គាល់លទ្ធផលនៃការបោះឆ្នោត វៀបចំដោយអ.ស.ប.អ៊ុនតាក់កាលពីឆ្នាំ១៩៩៣។
លោកបន្ថែមថា លោកត្រូវបានចាប់ខ្លួនព្រោះលោកចង់ទទួលស្គាល់លទ្ធផលនៃការបោះឆ្នោតឆ្នាំ១៩៩៣ តែក្រុមដែលចាប់ខ្លួនលោកនោះមិនចង់ឲ្យលោកទទួលស្គាល់លទ្ធផលនៃការបោះឆ្នោតនោះទេ។
លោកបន្តថា លោកសុខចិត្តលាលែងពីតំណែងនាយករដ្ឋមន្ត្រីជាជាងបដិសេធលទ្ធផលនៃការបោះឆ្នោតដើម្បីចៀសវាងការបង្ហូរឈាមនិងដើម្បីរក្សាសន្តិភាព។
អាថ៌កំបាំងដែលលោក ហ៊ុន សែន ទម្លាយនេះមិនស៊ីគ្នានិងព័ត៌មាននិងព្រឹត្តិការណ៍កន្លងមកដែលថា លោកប្រឆាំងលទ្ធផលនៃការបោះឆ្នោត ដែលគណបក្សរាជានិយមហ៊្វុនស៊ីនប៉ិចជាអ្នកឈ្នះនោះទេ។ ទោះជាយ៉ាងណាក្តី លោក ហ៊ុន សែន នៅតែហៅថា ការបោះឆ្នោតរៀបចំដោយអ.ស.ប.នោះជា«ការបោះឆ្នោតស្មោកគ្រោក»។
ក្នុងការទម្លាយអាថ៌កំបាំងនេះ លោក ហ៊ុន សែន មិនបានលាតត្រដាងឈ្មោះឬក្រុមដែលចាប់ខ្លួនលោកនោះទេ។ លោកនិយាយថា កាលណោះលោកទៅផ្ទះរបស់គេដោយមិនមានអង្គរក្សការពារក្នុងនាមជានាយករដ្ឋមន្ត្រី។ លោក ហ៊ុន សែន ទម្លាយអាថ៌កំបាំងដើម្បីបង្ហាញហេតុផលដែលនាំឲ្យលោកបង្កើតកងអង្គរក្សផ្ទាល់ខ្លួន។
លោក ហ៊ុនសែន ទម្លាយអាថ៌កំបាំងនេះដោយភ្ជាប់ទៅនឹងគម្រោងបង្កើតតំបន់អបគមន៍រដ្ឋប្រហារមិនបានសម្រេចកាលពីឆ្នាំ១៩៩៤ ក្រោយពេលគណបក្សប្រជាជនកម្ពុជាចាញ់ឆ្នោត ៕
